സന്ധിവേദന മാറണോ... ക്രൂഡ് ഓയിലില് മുങ്ങിക്കുളിച്ചാല് മതി!
സുല്ഫിയ എന്ന 60-കാരി റഷ്യയില്നിന്നും അസെര്ബൈജാനിലെ വിമാനത്താവളത്തില് വന്നിറങ്ങുമ്പോള് ഒറ്റ ആഗ്രഹമെ ഉണ്ടായിരുന്നുള്ളു. വര്ഷങ്ങളായി താന് അനുഭവിക്കുന്ന സന്ധിവേദനയില്നിന്ന് ഒരു മോചനമുണ്ടാകണം. അതിനായി അസെര്ബൈജാനില്നിന്ന് അവര് നേരെ പോയത് നഫ്റ്റലന് എന്ന നഗരത്തിലേക്കാണ്. അവരുടെ ഒരു സുഹൃത്താണ് ഇവിടത്തെ പ്രാദേശിക ആരോഗ്യ കേന്ദ്രങ്ങളില് തന്റെ അവസ്ഥയ്ക്കുള്ള ഒരു പ്രത്യേക ചികിത്സയുണ്ടെന്ന് സുല്ഫിയയോട് പറഞ്ഞത് . ചികിത്സ വളരെ ലളിതമാണ്. ക്രൂഡ് ഓയില് നിറച്ചിരിക്കുന്ന ബാത്ത് ടബ്ബില് നഗ്നയായി 10 മിനിറ്റ് കിടക്കണം. ശരീര ഊഷ്മാവിനേക്കാള് അല്പ്പംകൂടി ഉയര്ന്ന താപനിലയിലായിരിക്കും ക്രൂഡ് ഓയില് ക്രമീകരിച്ചിരിക്കുന്നത്. ക്രൂഡ് ഓയിലിലുള്ള കുളി കഴിഞ്ഞാല് ഈ ആരോഗ്യകേന്ദ്രത്തിലുള്ള ജീവനക്കാരുടെ സഹായത്തോടെ ശരീരത്തില് പറ്റിപ്പിടിച്ച എണ്ണയെല്ലാം തൂത്തുകളയണം. അതിനുശേഷം നല്ല പച്ചവെള്ളത്തില് ഒരു കുളികൂടി പാസാക്കിയാല് സന്ധികള്ക്കുണ്ടാകുന്ന എല്ലാ വേദനകളും പമ്പ കടക്കുമെന്നാണ് നഫ്ത്തലാനിലുള്ളവര് പറയുന്നത്.
രോഗമുക്തി തേടി ഇവിടെ എത്തുന്നവര്ക്ക് ഇത്തരത്തില് 10 ദിവസത്തെ ക്രൂഡ് ഓയില് കുളിയാണ് ചികിത്സയായി നല്കുന്നത്. സംഘര്ഷഭൂമിയാണെങ്കിലും അസെര്ബൈജാനിലുള്ള ഇത്തരം ക്രൂഡ് ഓയില് കുളികേന്ദ്രങ്ങളിലേക്ക് ലോകത്തിന്റെ വിവിധ ഭാഗങ്ങളില്നിന്നായി നിരവധിയാളുകളാണ് എത്തുന്നത്.നമ്മുടെ നാട്ടില് വെള്ളംകിട്ടുന്നതുപോലെ ഇവിടങ്ങളില് ഭൂമികുഴിച്ചാല് ക്രൂഡ് ഓയില് കിട്ടുമെന്നതിനാല് ഇത് അത്ര ചെലവുള്ള ഏര്പ്പാടുമല്ല. ഇവിടെ വന്ന് ചികിത്സതേടുന്നവര് ആശ്വാസത്തോടെയാണ് മടങ്ങുന്നതെന്ന് പറയപ്പെടുന്നു.
എന്നാല് ഈ പ്രാദേശിക ചികിത്സാ രീതിക്ക് ആധുനിക വൈദ്യശാസ്ത്രത്തിന്റെ പിന്തുണയില്ല. മാത്രമല്ല ഈ ക്രൂഡ് ഓയില് കുളി ആരോഗ്യത്തിന് ഹാനികരമാകാമെന്നും ചിലപ്പോള് കാന്സറിന് പോലും കാരണമാകാമെന്നും ചില ഡോക്ടര്മാര് മുന്നറിയിപ്പ് നല്കുന്നു. 1920-കള് മുതല് ഹെല്ത്ത് റിസോര്ട്ടുകള്ക്ക് പ്രശസ്തമാണ് നഫ്ത്തലാന്. ഇവിടത്തെ ഈ ക്രൂഡ് ഓയില് ചികിത്സയ്ക്ക് പിന്നില് ഒരു കഥയും ഉണ്ട്. പണ്ടുപണ്ട് ഈ പ്രദേശത്തുള്ള ഒരാളുടെ ഒട്ടകത്തിന് എന്തോ അസുഖം പിടിപെട്ടു. അയാള് അതിനെ ഒരു എണ്ണത്തടാകത്തിന് സമീപം ഉപേക്ഷിച്ചിട്ട് പോയി. എണ്ണത്തടാകത്തില് വീണ ഒട്ടകം കുറച്ചു കഴിഞ്ഞപ്പോള് അസുഖമെല്ലാം മാറി പൂര്ണ ആരോഗ്യത്തോടെ എഴുന്നേറ്റു വന്നത്രെ. അന്നുമുതലാണ് ഇന്നാട്ടുകാര് ക്രൂഡ് ഓയിലിന്റെ ഈ പ്രത്യേക ശക്തി മനസിലാക്കിയത്.
https://www.facebook.com/Malayalivartha
