കര്‍ണാടകയിലെ മല്ലേശ്വരം കോളജിലെ ബി.ഇ.എസ് വിദ്യാര്‍ഥിമറ്റു വിദ്യാര്‍ഥികളെപ്പോലെയല്ല. മനസുണ്ടെങ്കില്‍ മാര്‍ഗവുമുണ്ട്, എന്ന പഴമൊഴിയുടെ ജീവിക്കുന്ന ഉദാഹരണമാണ് കനയ്യ.

അപൂര്‍വ്വ ജനിതകരോഗമാണ് കനയ്യയ്ക്ക് എന്ന് ഏഴാം വയസിലാണ് തിരിച്ചറിയുന്നത്. പേശികള്‍ തളര്‍ന്നുപോകുന്ന രോഗമാണ്. രോഗം കനയ്യയെ വീല്‍ചെയറിലാക്കി. തുടക്കകാലത്ത് കോളേജില്‍ വീല്‍ചെയറില്‍ കനയ്യ ക്ലാസുകളില്‍ പങ്കെടുക്കുമായിരുന്നു. എന്നാല്‍ രോഗം മൂര്‍ച്ഛിച്ചതോടെ പൂര്‍ണ്ണമായും കിടപ്പിലായി.

എന്നാല്‍ ആ കിടപ്പില്‍ ജീവിതം അവസാനിച്ചെന്ന് കരുതാന്‍ കനയ്യയ്ക്ക് ആകുമായിരുന്നില്ല. കിടക്കയില്‍ കിടന്നുകൊണ്ട് തന്നെ കനയ്യ പാഠങ്ങള്‍ പഠിച്ചു.

പ്രത്യേകരീതിയില്‍ തയാറാക്കിയ പഠനമേശ തലയ്ക്ക് മുകളില്‍ ഘടിപ്പിച്ച് അതില്‍ പുസ്തകങ്ങള്‍ വെച്ചായിരുന്നു പഠനം. ഒരു പേജ് കഴിയുമ്പോള്‍ അമ്മയെ വിളിക്കും. അമ്മ വന്ന് അടുത്ത പേജ് മറിക്കും. അങ്ങനെയായിരുന്നു പഠനം.

മോശം ആരോഗ്യസ്ഥിതിയെത്തുടര്‍ന്ന് പരീക്ഷയ്ക്ക് പോകേണ്ടെന്ന് അമ്മ പറഞ്ഞെങ്കിലും കനയ്യ വാശി പിടിച്ചു. അവസാനം കനയ്യയുടെ വാശി തന്നെ ജയിച്ചു. പരീക്ഷാഹാളില്‍ കനയ്യയ്ക്കായി പ്രത്യേകം കട്ടില്‍ തയാറാക്കി. അതില്‍ കിടന്നുകൊണ്ട് കനയ്യ എഴുതി നേടിയത് 72 ശതമാനം മാര്‍ക്ക്. രോഗത്തിന്റെ കാഠിന്യം കാരണം നൂറ് മാര്‍ക്കിനുള്ള മുഴുവന്‍ ചോദ്യവും പൂര്‍ത്തിയാക്കാന്‍ കനയ്യയ്ക്ക് സാധിച്ചില്ല.

എല്ലാ പരിമിതികളെയും അതിജീവിച്ച് നേടിയ ഈ 72 ശതമാനത്തിന്റെ നൂറിന്റെ തിളക്കമുണ്ടെന്നാണ് അധ്യാപകര്‍ പറയുന്നത്. ബികോമിന് ചേരണമണെന്നാണ് കനയ്യയുടെ ആഗ്രഹം.