കീഴടക്കാന്‍ വന്ന മരണത്തിന്റെ മുഖത്തേയ്ക്കു നോക്കി ഉച്ചത്തിലൊന്നു കുരച്ച് വിരട്ടിഓടിച്ച ശേഷം ജൂലി ഇപ്പോള്‍ സ്വന്തം കൂട്ടിലുണ്ട്. സ്വന്തം രക്ഷ നോക്കാതെ നാലു പേരുടെ ജീവന്‍ കാത്തതാണവള്‍. അവളെ മരണത്തിനു വിട്ടുകൊടുക്കാതിരിക്കാന്‍ പരിശ്രമം നടത്തിയ വീട്ടുകാര്‍ക്കും ഡോക്ടര്‍മാര്‍ക്കും പോലും അദ്ഭുതമാണ് അവളുടെ മടങ്ങിവരവ്.

അക്കഥ ഇങ്ങനെ; മാന്നാര്‍ വിഷവര്‍ശേരിക്കര കുന്നുംപുറത്ത് പരേതനായ ജേക്കബ് ജോണിന്റെ ഭാര്യ മണിയമ്മാള്‍, മക്കളായ കാര്‍ത്തിക, കീര്‍ത്തി, മരുമകന്‍ ശിവജിത്ത് എന്നിവര്‍ താമസിക്കുന്ന ചെന്നിത്തലയിലെ വാടകവീട്ടില്‍ ഇക്കഴിഞ്ഞ 15-ന് രാത്രി, ജൂലിയെന്ന ഏഴു വയസുകാരി ജര്‍മന്‍ ഷെപ്പേഡ് നായയുടെ കുര കേട്ട് വീട്ടുകാര്‍ പുറത്തിറങ്ങി. കണ്ടത് പത്തി വിടര്‍ത്തി നില്‍ക്കുന്ന മൂര്‍ഖനെ.

വീട്ടുകാര്‍ പുറത്തിറങ്ങിയതും ജൂലി പാമ്പിനെ കടിച്ചു കുടഞ്ഞതും ഒരുമിച്ച്. പിന്നാലെ കൂട്ടില്‍ പോയി കിടന്നു അവള്‍. പിറ്റേന്നു രാവിലെ കൂട്ടില്‍ ഛര്‍ദ്ദിച്ച് അവശയായി, മുഖത്ത് നീരു വച്ചു കിടന്ന ജൂലിയെ കണ്ടപ്പോഴാണ് പാമ്പുകടിയേറ്റ വിവരം വീട്ടുകാര്‍ അറിയുന്നത്. ഉടന്‍ ചെങ്ങന്നൂര്‍ വെറ്ററിനറി പോളി ക്ലിനിക്കിലെത്തിച്ചു. സീനിയര്‍ വെറ്ററിനറി സര്‍ജന്‍ ഡോ.ദീപു ഫിലിപ് മാത്യുവിന്റെ നേതൃത്വത്തില്‍ ചികിത്സ തുടങ്ങി.

അപ്പോഴാണ് അടുത്ത വെല്ലുവിളി. മൂര്‍ഖന്റെ വിഷത്തിനുള്ള ആന്റിവെനം കിട്ടാന്‍ പ്രയാസം. മനുഷ്യന് അത്യാവശ്യമുള്ളത് ആയതിനാല്‍ മൃഗങ്ങള്‍ക്കു നല്‍കരുതെന്ന സര്‍ക്കുലര്‍ പോലും നിലവിലുണ്ട്.

ഏറെ പാടുപെട്ട് കോഴഞ്ചേരിയില്‍ നിന്നു 3 കുപ്പി ആന്റിവെനം സംഘടിപ്പിച്ചു. 10 മണിയോടെ കുത്തിവയ്‌പെടുത്തിട്ടും മാറ്റമൊന്നും കണ്ടില്ല. വൈകിട്ട് അഞ്ചരയോടെ അവള്‍ കണ്ണു തുറന്നപ്പോഴാണ് വീട്ടുകാരുടെ കണ്ണീര്‍ തോര്‍ന്നത്. 3 ദിവസത്തെ ചികിത്സയ്‌ക്കൊടുവില്‍ ആരോഗ്യം വീണ്ടെടുത്തു. ഇനി ഗുളികകള്‍ മതി. തലച്ചോറിനെ ബാധിക്കുന്നതാണു മൂര്‍ഖന്റെ വിഷം. വിഷമിറങ്ങി ജീവന്‍ തിരികെ കിട്ടുന്നത് അപൂര്‍വം.