1898-ല്‍ അമേരിക്കന്‍ എഴുത്തുകാരനായ മോര്‍ഗന്‍ റോബര്‍ട്ട്‌സണ്‍ ഒരു നോവല്‍ എഴുതി. 'ഫ്യൂട്ടിലിറ്റി ഓര്‍ റെക് ഒഫ് ദ ടൈറ്റന്‍' എന്നായിരുന്നു നോവലിന്റെ പേര്.

ടൈറ്റന്‍ എന്നു പേരുള്ള ഒരു പടുകൂറ്റന്‍ ആഡംബര കപ്പല്‍ നോര്‍ത്ത് അറ്റ്‌ലാന്റിക് സമുദ്രത്തിലെ മഞ്ഞുമലയില്‍ ഇടിച്ചു തകരുന്നതിനെ കുറിച്ചാണ് നോവലില്‍ പ്രതിപാദിക്കുന്നത്. ടൈറ്റന്‍ എന്ന കപ്പലില്‍ ജോലിചെയ്യുന്ന, മദ്യപാനത്തിന് അടിമയായ ഒരു മുന്‍ യു.എസ് നേവി ഉദ്യോഗസ്ഥന്റെ കഥയാണ് ഈ നോവല്‍ പറയുന്നത്. നോവലിലെ കപ്പലായ ടൈറ്റന്‍ തകരുന്നത് ഏപ്രില്‍ മാസത്തെ ഒരു തണുത്ത രാത്രിയില്‍ മഞ്ഞുമലയില്‍ ഇടിച്ചാണ്.

മോര്‍ഗന്‍ റോബര്‍ട്ട്‌സണ്‍ ഈ നോവല്‍ എഴുതി പതിനാല് വര്‍ഷങ്ങള്‍ക്ക് ശേഷം 1912 ഏപ്രില്‍ 15-ന് രാത്രിയാണ് ആണ് ആര്‍.എം.എസ് ടൈറ്റാനിക് എന്ന പടുകൂറ്റന്‍ കപ്പല്‍ മഞ്ഞുമലയില്‍ ഇടിച്ച് തകര്‍ന്നത്. പതിനാല് വര്‍ഷങ്ങള്‍ക്ക് മുമ്പ് എഴുതപ്പെട്ട ആ പുസ്തകത്തിലെ സംഭവങ്ങളും, യഥാര്‍ത്ഥത്തില്‍ മുങ്ങിയ ടൈറ്റാനിക്കുമായി അമ്പരപ്പിക്കുന്ന സാമ്യങ്ങളാണുള്ളത്.

നോവലില്‍ ലോകത്തെ ഏറ്റവും വലിയ കപ്പലായാണ് ടൈറ്റനെ അവതരിപ്പിച്ചിട്ടുള്ളത്. ഒരിക്കലും മുങ്ങാത്ത കപ്പല്‍ എന്നാണ് നോവലിലെ ടൈറ്റനെ വിശേഷിപ്പിച്ചിരിക്കുന്നത്.

2,500 യാത്രക്കാരുമായി നോവലിലെ ടൈറ്റന്‍ മുങ്ങുമ്പോള്‍, ഒരിക്കലും മുങ്ങാത്ത കപ്പല്‍ എന്നു കരുതിയിരുന്നതിനാല്‍ രക്ഷപ്പെടാന്‍ 24 ലൈഫ് ബോട്ടുകളേ കരുതിയിട്ടുണ്ടായിരുന്നുള്ളു. 2,220ലേറെ യാത്രക്കാരുമായി പുറപ്പെട്ട യഥാര്‍ത്ഥ ടൈറ്റാനിക്കില്‍ ഉണ്ടായിരുന്നത് വെറും 20 ലൈഫ് ബോട്ടുകളും!

നോവലിലെ കപ്പലിന്റെയും യാഥാര്‍ത്ഥത്തിലെ കപ്പലിന്റെയും വലതുഭാഗമാണ് മഞ്ഞുമലയില്‍ ഇടിച്ചത്. നോവലില്‍ ടൈറ്റന് 800 അടി നീളമാണെന്നാണ് പറയുന്നത്. എന്നാല്‍ ടൈറ്റാനിക്കിന് 882 അടി 9 ഇഞ്ചുമാണുണ്ടായിരുന്നത്. അന്ന് നിര്‍മിക്കപ്പെട്ടിട്ടുള്ളതില്‍ വച്ച് ലോകത്തെ ഏറ്റവും വലിയ കപ്പലായിരുന്നു ടൈറ്റാനിക്. ടൈറ്റാനിക്കിനെയും ലോകം വിശേഷിപ്പിച്ചത് ഒരിക്കലും മുങ്ങാത്ത കപ്പല്‍ എന്നായിരുന്നു. ടൈറ്റാനിക് തകര്‍ന്നിട്ട് ഇപ്പോള്‍ 107 വര്‍ഷം തികഞ്ഞു.

ടൈറ്റാനിക് അപകടത്തില്‍പെട്ടതോടെയാണ് ഈ നോവലിന് ആഗോളപ്രശസ്തി കൈവന്നത്.