ഫ്രാന്‍സുകാരായ ഫാബിയന്‍ കൊറേച്ചിയേയും സാമിയയേയും പ്രണയത്തിലെത്തിച്ച പൊതുതാല്‍പര്യവിഷയം ആയുര്‍വേദം!
ഒരേ നാട്ടുകാരാണ് ഫാബിയനും സാമിയയും. ഫ്രഞ്ച് പൗരന്‍മാരായ ഇരുവരം പക്ഷേ ഫ്രാന്‍സില്‍ വച്ച് തമ്മില്‍ കണ്ടിട്ടേയില്ല. ഏലൂക്കര സാരഥി ആയുര്‍വേദ ആശുപത്രിയിലാണ് അവര്‍ ഇരുവരും ആദ്യമായി കണ്ടത്. പാരിസില്‍ ആയുര്‍വേദ സ്ഥാപനം നടത്തുന്നയാളാണ് ഫാബിയന്‍. ആയുര്‍വേദ ചികിത്സയെ കുറിച്ചു ഫ്രഞ്ച് ഭാഷയില്‍ പുസ്തകം രചിച്ചിട്ടുമുണ്ട്. ആയുര്‍വേദ ഗവേഷണ വിദ്യാര്‍ഥിയാണ് സാമിയ.
ആയുര്‍വേദ പഠനത്തിന് കേരളത്തിലെത്തിയ ഇരുവരും പെരിയാര്‍ തീരത്ത് ഒരുക്കിയ കതിര്‍മണ്ഡപത്തില്‍ ഹിന്ദു ആചാരപ്രകാരം വിവാഹിതരായി. ജന്മനാട്ടിലെ ലളിതമായ വിവാഹച്ചടങ്ങിനു പകരം ഹിന്ദു രീതി തിരഞ്ഞെടുക്കാന്‍ കാരണം അതിന്റെ വര്‍ണപ്പൊലിമയെന്നു നവദമ്പതികള്‍. കേരളീയ വേഷം ധരിച്ചെത്തിയ വധൂവരന്മാരെ കതിര്‍മണ്ഡപത്തില്‍ പെണ്‍കുട്ടികള്‍ താലപ്പൊലിയോടെ വരവേറ്റു. തുടര്‍ന്നു മുതിര്‍ന്നവര്‍ക്കു ദക്ഷിണ നല്‍കി അനുഗ്രഹം വാങ്ങി.
പാരിസില്‍ നിന്ന് ഇവരുടെ 2 സുഹൃത്തുക്കള്‍ ചടങ്ങിനു സാക്ഷ്യം വഹിക്കാന്‍ എത്തിയിരുന്നു, കസവു സാരിയില്‍ അണിഞ്ഞൊരുങ്ങിയാണ് സുഹൃത്തുക്കളായ കരോലീനയും മേരിസും എത്തിയത്. നിറപറയും നിലവിളക്കും അനുഗ്രഹപ്രഭ ചൊരിഞ്ഞ അന്തരീക്ഷത്തില്‍ താലി ചാര്‍ത്തി, മണ്ഡപം വലംവച്ചു താഴെ ഇറങ്ങിയപ്പോള്‍ അതിഥികളെ നോക്കി മലയാളത്തില്‍ ഫാബിയന്‍ പറഞ്ഞു: 'അടിപൊളി'. വിവാഹ കര്‍മങ്ങള്‍ക്കു നേതൃത്വം നല്‍കിയത് സാരഥി ആയുര്‍വേദ ആശുപത്രി ഉടമ ഡോ. പി.കെ. ലതികയാണ്.
https://www.facebook.com/Malayalivartha
