കോട്ടയം മുന്‍ ജില്ലാ പൊലീസ് മേധാവി എന്‍. രാമചന്ദ്രന്‍, അടുത്തിടെ അമേരിക്കയില്‍ സാന്‍ ഡീഗോ ആശുപത്രിയില്‍ നിന്ന് ഒരു കുഞ്ഞിനെ മോഷ്ടിച്ച സംഭവം വായിച്ചു. അപ്പോഴാണ് 1987-ല്‍ താന്‍ പൊന്‍കുന്നം എസ്‌ഐയായിരുന്ന കാലത്ത് കാഞ്ഞിരപ്പള്ളി താലൂക്ക് ആശുപത്രിയില്‍നിന്നും മോഷ്ടിക്കപ്പെട്ട ആറുമാസം പ്രായമുള്ള ഒരു കുഞ്ഞിനെ തെരഞ്ഞു കണ്ടുപിടിച്ച കാര്യം ഓര്‍മ്മയിലെത്തിയത്.

ആ കുട്ടി ഇപ്പോള്‍ എവിടെയുണ്ടെന്നായി അതോടെ ചിന്ത. അവനെയൊന്ന് കണ്ടാലോ എന്നു ചിന്തിച്ച് കാഞ്ഞിരപ്പള്ളി ഡിവൈഎസ്പി ജെ. സന്തോഷ് കുമാറിന്റെ സഹായം തേടി. പൊലീസ് അന്വേഷണം ചെറുവള്ളി ബാവലുപറമ്പില്‍ വീട്ടിലെത്തി. അങ്ങനെ കോട്ടയം തിരുനക്കര കാരൂര്‍ വീട്ടില്‍ ആ കൂടിക്കാഴ്ചയ്ക്ക് വേദിയൊരുങ്ങി. സുമേഷ് എന്നാണ് ഇപ്പോള്‍ 32-കാരനായ ആ പഴയ കുട്ടിയുടെ പേര്. അങ്ങനെ രാമചന്ദ്രനെ കാണാന്‍ 32 വര്‍ഷത്തിനു ശേഷം സുമേഷുമായി സുധ എന്ന ആ അമ്മ കാരൂര്‍ എത്തി.

രാമചന്ദ്രനു മുന്നിലേക്ക് സുമേഷിനെ നീക്കിനിര്‍ത്തി സുധ പറഞ്ഞു, 'കാണാതായ പൊന്നാണിത്. ഇവനെ തിരിച്ചു തന്നത് അങ്ങാണ്. ഒരിക്കലും മറക്കില്ല.' കേട്ടു മാത്രം പരിചയമുള്ള ആ പൊലീസുദ്യോഗസ്ഥനെ സുമേഷ് ആദ്യമായി കണ്ടു.

വൈദ്യുതിമുടക്കത്തിനിടെയാണ് അന്നു കുഞ്ഞിനെ കാണാതായത്. കരിങ്കുന്നം സ്വദേശികളായ ബാലനും രാധാമണിയുമായിരുന്നു പ്രതികള്‍. താന്‍ ഗര്‍ഭിണിയാണെന്നു പറഞ്ഞു രാധാമണി മറ്റൊരാളില്‍ നിന്നു പണം വാങ്ങിയിരുന്നു. പ്രസവിച്ചുവെന്നു കാണിച്ചു കൂടുതല്‍ പണം വാങ്ങാനായിരുന്നു മോഷണം, രാമചന്ദ്രന്‍ പറഞ്ഞു.

'രാധാമണി കുഞ്ഞിന്റെ ചുണ്ടില്‍ പൈപ്പുവെള്ളം ഇറ്റിക്കുന്നതു കണ്ട ഹോട്ടല്‍ ജീവനക്കാരന്‍ ജബ്ബാറിനു സംശയം തോന്നിയതാണ് തുണയായത്. സ്വന്തം കുഞ്ഞിന് ആരെങ്കിലും പൈപ്പുവെള്ളം കൊടുക്കുമോ? ബസു കയറിയ രാധാമണിയും ബാലനും കരിങ്കുന്നത്ത് ഇറങ്ങിയെന്ന് അറിഞ്ഞു. അങ്ങനെ ഇവനെ കണ്ടെത്തി, സുമേഷിന്റെ കൈയില്‍ പിടിച്ച് രാമചന്ദ്രന്‍ പറഞ്ഞു. നീതുവാണു സുമേഷിന്റെ ഭാര്യ.

സാഹിത്യകാരന്‍ കാരൂര്‍ നീലകണ്ഠപ്പിള്ളയുടെ കൊച്ചുമകനാണ് എന്‍. രാമചന്ദ്രന്‍.