സൈനിക സേവനത്തിനു ശേഷം നാട്ടിലെത്തിയപ്പോള്‍, ആലപ്പുഴ പല്ലന മങ്ങാട്ട് വി.അജിതിന് ഒരു മീന്‍കട തുടങ്ങാനാണ് തോന്നിയത്. നേവിയിലെ ജോലിക്കിടെ അനവധി രാജ്യങ്ങളിലെ മത്സ്യ ബന്ധന വിപണന മേഖലയുമായി പരിചയപ്പെടാന്‍ കഴിഞ്ഞതിന്റെ പിന്‍ബലത്തിലാണ് മീന്‍ കട തുടങ്ങാന്‍ അജിത് തീരുമാനിച്ചത്. തിരുവനന്തപുരം ആക്കുളത്താണ് മീന്‍ കട തുടങ്ങിയത്. കുമരകത്തെ കരിമീനിന് അങ്ങു തിരുവനന്തപുരത്തും ആവശ്യക്കാരുണ്ടെന്ന തിരിച്ചറിവാണ് ഇത്തരം ഒരു തീരുമാനമെടുക്കാന്‍ ഇടയാക്കിയത്.

കച്ചവടം ഉഷാറായപ്പോള്‍ കരിമീന്‍ കൂടാതെ മറ്റു നാടന്‍ മത്സ്യങ്ങളും കടല്‍ മത്സ്യങ്ങളും വില്‍ക്കാന്‍ തുടങ്ങി. വാഹനത്തില്‍ കുമരകം ബോട്ട് ജെട്ടിയിലെത്തിയാണ് അജിത് മീന്‍ വാങ്ങുന്നത്. മറ്റു സ്ഥലങ്ങളിലെ കരിമീനിനെക്കാള്‍ രുചി ഏറെയുള്ളത് കുമരകം കരിമീനിനാണെന്ന് അജിത് പറയുന്നു.

ഒരുതവണ കൊണ്ടു പോകുന്നത് 150/200 കിലോ കരിമീനാണ്. മത്സ്യം 4 ദിവസം വരെ യാതൊരു കേടും സംഭവിക്കാതെ സൂക്ഷിക്കാന്‍ കഴിയും. 4 ദിവസം കഴിഞ്ഞുള്ള മീനുകള്‍ വില്‍പന നടത്താതെ ഉണക്കി എടുക്കും പരമ്പരാഗതമായുള്ള മത്സ്യബന്ധന രീതിയിലൂടെ പിടിക്കുന്ന മത്സ്യം മാത്രമേ വാങ്ങുകയുമുള്ളൂ.

1993 മുതല്‍ 2010 വരെ കരസേനയിലായിരുന്നു അജിത്തിന്റെ ജോലി. പിന്നീടു 2018 വരെ നാവിക സേനയിലും ജോലി ചെയ്തു.