2.5 കോടിയുടെ എസ്യുവി ഹെലികോപ്റ്ററില് നിന്ന് താഴേയ്ക്കിട്ട് തകര്ത്തു!
ലോകമെമ്പാടും ആരാധകരുള്ളതും ലോകത്തിലെ ഏറ്റവും മികച്ച ആഡംബര എസ്യുവികളിലൊന്നുമാണ് മെഴ്സിഡീസ് ജി 63 എഎംജി അഥവാ ജി വാഗണ്.
എന്നാല് ഈ വാഹനം, ഹെലികോപ്റ്ററില് കയറ്റി 1000 അടി ഉയരത്തിലെത്തിച്ചതിന് ശേഷം താഴേയ്ക്കിട്ട് മോശമെന്ന് പറഞ്ഞ് യുവാവിന്റെ വ്യത്യസ്ത പ്രതിഷേധം.
തന്റെ എസ്യുവി തകര്ത്തതും അതു വിഡിയോയായി ചിത്രീകരിച്ച് യൂട്യൂബില് അപ്ലോഡ് ചെയ്തതും റഷ്യന് സ്വദേശിയും വ്ലോഗറുമായ മോറോസ് ഇഗോ എന്ന യുവാവാണ് . മോറോസ് 2018-ലാണ് എസ്യുവി സ്വന്തമാക്കിയത്. വാഹനത്തിന്റെ പ്രകടനത്തില് താന് തൃപ്തനല്ലെന്നും വാഹനം സര്വീസിനെത്തിച്ചപ്പോള് വാറന്റി കാലാവധി അവസാനിച്ചെന്ന് കാണിച്ച് ഷോറൂം ജീവനക്കാര് വാഹനം നന്നാക്കി നല്കാന് വിസമ്മതിക്കുകയും ചെയ്തെന്ന് മോറോസ് ആരോപിക്കുന്നു. ഇതേ തുടര്ന്നാണ് വാഹനം നശിപ്പിക്കാന് തീരുമാനിച്ചതെന്നാണ് യുവാവിന്റെ വാദം.
എന്നാല് വാഹനത്തെ 1000 അടി ഉയരത്തില് നിന്ന് താഴെയിടുമെന്ന് തന്റെ സുഹൃത്തുമായി പന്തയം വച്ചതിനെ തുടര്ന്നാണ് മോറോസ് ഇത്തരത്തില് ചെയ്തതെന്നും ആരോപണമുണ്ട്. താഴേക്ക് വീണ വാഹനം പൂര്ണമായും തകര്ന്നു കിടക്കുന്നത് വിഡിയോയില് കാണാം.
വിഡിയോ വൈറലായതിനെ തുടര്ന്ന് റഷ്യന് പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. മെഴ്സിഡീസിന്റെ ഏറ്റവും പ്രശസ്തമായ എസ്യുവികളിലൊന്നാണ് ജി63 എഎംജി. 4.0 ലിറ്റര് വി8 പെട്രോള് എന്ജിന് ഉപയോഗിക്കുന്ന വാഹനത്തിന് 577 ബിഎച്ച്പി കരുത്തും 760 എന്എം ടോര്ക്കുമുണ്ട്. ഏകദേശം 2.5 കോടി രൂപയാണ് വാഹനത്തിന്റെ ഇന്ത്യന് എക്സ്ഷോറൂം വില.
https://www.facebook.com/Malayalivartha
