റോസ് മരിയ സെബാസ്റ്റ്യന് എന്ന മിടുക്കി 13 വയസ്സിനിടെ വരച്ചത് 4500 ചിത്രങ്ങള്!
പൊന്മുടി അമ്പഴത്തിനാല് സെബാസ്റ്റ്യന് -ഷേര്ളി ദമ്പതികളുടെ ഇളയ മകളായ റോസ് മരിയ സെബാസ്റ്റ്യന് വയസ് 13 മാത്രം. മൂന്നാം ക്ലാസ് മുതല് തന്റെ മാന്ത്രിക വിരലുകള്കൊണ്ട് വര്ണ വിസ്മയം തീര്ക്കാന് തുടങ്ങിയ റോസ് ഇതുവരെ വരച്ചത് ജീവന് തുടിക്കുന്ന 4500 ചിത്രങ്ങള്.
തൊടുപുഴ ന്യൂമാന് കോളജ് ഗ്രൗണ്ടില് നടന്നുവരുന്ന സംസ്ഥാന കാര്ഷിക മേളയില്, ഇപ്പോള് തൊടുപുഴ സെന്റ് സെബാസ്റ്റ്യന് യുപി സ്കൂളില് പഠിക്കുന്ന ഈ കൊച്ചു മിടുക്കിയുടെ ചിത്രപ്രദര്ശന സ്റ്റാള് ഒരുക്കിയിട്ടുണ്ട്.
രാജാക്കാട് ജിഎച്ച്എസ്എസില് അധ്യയനം നടത്തിയിരുന്ന കാലത്ത് ചിത്രരചനയിലുള്ള താത്പര്യവും അഭിരുചിയും കണ്ടപ്പോള് സ്കൂളിലെ ചിത്രരചന അധ്യാപകനായ തോമസ് മാഷിന്റെ കീഴില് പരിശീലനം നല്കി. അന്ന് മുതല് മിന്നിമറയുന്ന കാഴ്ചകള് കാന്വാസില് പകര്ത്തി സൃഷ്ടിയുടെ വസന്തം തീര്ക്കുകയാണ് ഈ കൊച്ചുമിടുക്കി.
പ്രകൃതിയും പൂക്കളും പക്ഷികളും ജനനേതാക്കളും ക്രിക്കറ്റ് താരങ്ങളും എല്ലാം റോസിന്റെ വരയുടെ ലോകത്തെ നിറക്കാഴ്ചകളാണ്. ഈശോ, മാതാവ്, മദര് തെരേസ, ഫ്രാന്സിസ് പാപ്പ, സിസ്റ്റര് റാണി മരിയ, ശ്രീനാരായണഗുരു തുടങ്ങി ആത്മീയ പരിവേഷമുള്ള ചിത്രങ്ങളും ഒട്ടനവധി.
സ്വപ്നത്തിലെ അമ്മയോടൊപ്പം എന്ന അടിക്കുറിപ്പോടെ , രക്ഷിതാക്കളുടെ ക്രൂരപീഡനത്തിനിരയായ ഷെഫീക്കിനെ വരച്ചപ്പോള് അത് കാണികളുടെ മുക്തകണ്ഠമായ പ്രശംസ പിടിച്ചുപറ്റി. പതിനാലാം കേരള നിയമസഭയിലെ എല്ലാ സാമാജികരുടെയും മിഴിവാര്ന്ന ചിത്രം വരച്ചതും ശ്രദ്ധപിടിച്ചുപറ്റുകയുണ്ടായി. 20 ദിവസം കൊണ്ടാണ് 140 എംഎല്എമാരുടെയും ചിത്രം വരച്ചു തീര്ത്തത്.
വാട്ടര് കളര്, ഓയില് പെയിന്റിംഗ് തുടങ്ങിയ സാങ്കേതങ്ങളാണ് ചിത്രരചനയ്ക്ക് ഉപയോഗിക്കുന്നത്. ഫാബ്രിക് പെയിന്റിംഗിനോടും ഓയില് പെയിന്റിംഗിനോടുമാണ് ഏറെ പ്രിയം. ആകാശനീലിമയാണ് ഇഷ്ടനിറം.
വിരല്ത്തുമ്പില് ഒരു ചിത്രം പൂര്ത്തിയാക്കാന് ഒരു മണിക്കൂര് മതി. മാതാപിതാക്കളുടെയും മധുര അണ്ണാ ഫാത്തിമ കോളജില് പഠിക്കുന്ന സഹോദരന് കിരണിന്റേയും അധ്യാപകരുടെയും പ്രോത്സാഹനമാണ് ചിത്രരചനയ്ക്ക് പ്രചോദനം പകരുന്നതെന്ന് റോസ് പറഞ്ഞു.
https://www.facebook.com/Malayalivartha