വ്യത്യസ്തത കൊണ്ട് വൈറലായി ഈ കല്യാണ വിഡിയോ!
സേവ് ദി ഡേറ്റ് മുതല്‍ വിവാഹ ആഘോഷങ്ങള്‍ ഗംഭീരമാക്കാന്‍ വ്യത്യസ്ത മാര്‍ഗങ്ങളാണ് ഇന്ന് വധൂ-വരന്മാരും ബന്ധുക്കളും സ്വീകരിക്കുന്നത്.
ഇപ്പോള്‍ സോഷ്യല്‍ മീഡിയയില്‍ നില്‍ക്കാതെ പായുന്നത് ഒരു കിടിലന്‍ കല്യാണ ആഘോഷത്തിന്റെ വിഡിയോയാണ്. വിവാഹദിവസം കിടിലന്‍ ശിങ്കാരി മേളമാണ് ഒരുക്കിയിരുന്നത്. 'പൊന്നന്‍സ് ബ്ലൂ മാജിക്കി'ന്റെ ശിങ്കാരി മേളം കത്തി കയറിയത് വധൂ-വരന്മാര്‍ ആസ്വദിച്ചു കാണുകയായിരുന്നു.
അപ്പോഴാണ് ആ ട്വിസ്റ്റ്. മേളക്കാരിലൊരാള്‍ ഇറങ്ങിവന്ന് വരനെ ഒപ്പം കൂടാന്‍ വിളിക്കുകയായിരുന്നു. ഇതോടെ കോട്ടും കണ്ണടയും മാറ്റി വരന്‍ വേദിയിലേക്ക് കയറി. ഒന്നു കൊട്ടി പെട്ടെന്ന് വരന്‍ വേദി വിടുമെന്നാണ് ഏവരും കരുതിയത്. എന്നാല്‍ വരന്‍ മേളക്കാരേക്കാള്‍ കൊട്ടി കയറുകയായിരുന്നു. ഇതോടൊപ്പം വധുവിനെക്കൂടി വരന്‍ വേദിയിലേക്ക് ക്ഷണിച്ചു. തുടര്‍ന്ന് ഇലത്താളം വധുവിന്റെ കയ്യില്‍ കൊടുത്തു. പിന്നെയത് വിവാഹവേദി ആയിരുന്നു എന്ന് പറയാനാവില്ല. വധു-വരന്മാര്‍ ഇരുവരും കൂടിചേര്‍ന്ന്് വേദി പൂരപ്പറമ്പ് ആക്കി!
സഖില്‍ സുരേഷ്, ലക്ഷ്മി ജോഷി എന്നിവരായിരുന്നു സോഷ്യല്‍ മീഡിയയെ കൈയ്യിലെടുത്ത ഈ വധൂ-വരന്മാര്‍. ''കല്യാണം പൂരപ്പറമ്പ് ആക്കി ചെക്കനും പെണ്ണും പൊളിച്ചു'' - എന്നാണ് സോഷ്യല്‍ മീഡിയ പറയുന്നത്. ഇങ്ങനെ വേണം ആഘോഷിക്കാനെന്നും ഇതുപോലെ എന്നും സന്തോഷമായി ജീവിക്കാന്‍ സാധിക്കട്ടെയെന്നുമാണ് സോഷ്യല്‍ മീഡിയ ആശംസിക്കുന്നത്. യുട്യൂബില്‍ ഇതിനോടകം 12 ലക്ഷം പേരാണ് ഈ വിഡിയോ കണ്ടത്.
https://www.facebook.com/Malayalivartha
