ന്യൂയോര്‍ക്കിലെ റോചെസ്റ്ററിലുള്ള മിയ ഫൗണ്ടേഷന്‍, ജന്മനാ വൈകല്യമുള്ള മൃഗങ്ങളുടെ സംരക്ഷണത്തിന് വേണ്ടി പ്രവര്‍ത്തിക്കുന്ന സന്നദ്ധ സംഘടനയാണ്.

വാലന്റൈന്‍സ് ഡേ-യോട് അനുബന്ധിച്ച് മിയ ഫൗണ്ടേഷന്‍ സോഷ്യല്‍മീഡിയയില്‍ പങ്കുവച്ച ഒരു ചിത്രം സകലരുടേയും ഹൃദയം കവര്‍ന്നു.

എട്ട് ആഴ്ച പ്രായമുള്ള ലൂണ്ടി എന്ന നായ്ക്കുട്ടിയും ഹെര്‍മന്‍ എന്ന് പേരുള്ള പ്രാവും തമ്മിലുള്ള സൗഹൃദത്തിന്റെ ചിത്രമാണ് അവര്‍ പോസ്റ്റ് ചെയ്തത്.

ലൂണ്ടിക്ക് പിന്‍കാലുകള്‍ ഉപയോഗിച്ച് നടക്കുവാന്‍ സാധിക്കില്ല. പ്രാവാണ് ലൂണ്ടിയുടെ ഏറ്റവും അടുത്ത സുഹൃത്ത്. തലയ്ക്ക് ഏറ്റ ക്ഷതത്തെ തുടര്‍ന്ന് ഹെര്‍മന് പറക്കാന്‍ സാധിക്കില്ല. അടുത്ത സുഹൃത്തുക്കളായ ഇരുവരും എപ്പോഴും ഒരുമിച്ചാണുള്ളത്.

ഇരുവരും ഒന്നിച്ചുള്ള മനോഹര ചിത്രം നിമിഷങ്ങള്‍ക്കുള്ളില്‍ വൈറലായി മാറി. ഇരുവരും തമ്മിലുള്ള സ്‌നേഹം ഇന്റര്‍നെറ്റ് ലോകത്ത് വലിയ ചര്‍ച്ചയായിരിക്കുകയാണ്.