അമേരിക്കന് പ്രസിഡന്റായിരുന്ന ലിങ്കന്റെ മുടിച്ചുരുളിന് ലേലത്തില് ലഭിച്ചത് 59 ലക്ഷം രൂപ!
1865-ല് അമേരിക്കന് പ്രസിഡന്റായിരുന്ന ഏബ്രഹാം ലിങ്കണ് കൊല്ലപ്പെട്ടതായി അറിയിച്ച, രക്തക്കറ പുരണ്ട ടെലിഗ്രാമും അദ്ദേഹത്തിന്റെ മുടിച്ചുരുളും ലേലത്തില് വച്ചപ്പോള് ലഭിച്ചത് 81,000 ഡോളര് (ഏകദേശം 59.51 ലക്ഷം രൂപ).
ഈ അപൂര്വ വസ്തുക്കള് ബോസ്റ്റണിലെ ആര് ആര് ഓക്ഷന് കേന്ദ്രമാണ് കഴിഞ്ഞ ദിവസം ലേലത്തിനുവച്ചത്. മുക്കാല് ലക്ഷം ഡോളര് വില ലഭിക്കുമെന്ന് ഓക്ഷന് ഹൗസ് പ്രതീക്ഷിച്ച വസ്തുക്കള് ഉയര്ന്ന വിലയ്ക്ക് സ്വന്തമാക്കിയ വ്യക്തി ആരെന്ന് സംഘാടകര് വെളിപ്പെടുത്തിയില്ല.
ജോണ് വില്യംസ് ബൂത്തിന്റെ വെടിയേറ്റ് വാഷിങ്ടനിലെ ഫോഡ് തിയറ്ററിനു സമീപം വീണ ലിങ്കന്റെ മൃതദേഹത്തില് നിന്നു മൃതദേഹപരിശോധനാവേളയില് നീക്കം ചെയ്ത മുടിച്ചുരുളിനു രണ്ട് ഇഞ്ചോളം (അഞ്ചു സെന്റീമീറ്റര്) ആയിരുന്നു നീളം.
കെന്റക്കിയിലെ പോസ്റ്റ് മാസ്റ്ററും ലിങ്കന്റെ ഭാര്യ മേരി ടോഡ് ലിങ്കന്റെ ബന്ധുവുമായിരുന്ന ഡോ ലിമന് ബീച്ചര് ടോഡിന്റെ കൈവശമുണ്ടായിരുന്നതായിരുന്നു ഈ മുടിച്ചുരുള്. ലിങ്കന്റെ ഇന്ക്വസ്റ്റ് വേളയില് ഡോ. ടോഡും സന്നിഹിതനായിരുന്നെന്ന് ആര്.ആര് ഓക്ഷന് വെളിപ്പെടുത്തി.
കെന്റക്കി ലെക്സിങ്ടണിലെ പോസ്റ്റ് ഓഫിസില് ഡോ . ടോഡിന്റെ സഹായിയായിരുന്ന ജോര്ജ് കിന്നിയര്, ഡോ ടോഡിന് അയച്ച ഔദ്യോഗിക ടെലിഗ്രാമില് പിടിപ്പിച്ച നിലയിലായിരുന്നു മുടിച്ചുരുള്. 1865 ഏപ്രില് 11-നു രാത്രി 11-മണിക്കാണ് ഈ ടെലിഗ്രാം വാഷിങ്ടനില് മേല്വിലാസക്കാരന് ലഭിക്കുന്നത്.
ഈ മുടിച്ചുരുള് ടോഡ് കുടുംബത്തിന്റെ പക്കല് ഭദ്രമായി സൂക്ഷിച്ചിരുന്ന കാര്യം 1945-ല് എഴുതിയ കത്തില് ഡോ ടോഡിന്റെ മകന് ജയിംസ് ടോഡും വ്യക്തമാക്കിയിട്ടുണ്ട്. ലിങ്കന്റെ മുടിച്ചുരുളിന്റെയും ടെലിഗ്രാമിന്റെയും ആധികാരികത ആര് ആര് ഓക്ഷന് സ്ഥിരീകരിച്ചിട്ടുണ്ട്.
https://www.facebook.com/Malayalivartha
