ജര്‍മ്മനിയിലെ യൂട്ടിനില്‍ ഒരു മരമുണ്ട്. പ്രണയ സാഫല്യത്തിനായി കെട്ടു കണക്കിന് കത്തുകള്‍ വര്‍ഷങ്ങളായി ഈ മരത്തെ തേടി എത്തിക്കൊണ്ടിരിക്കുകയാണ്. ഈ മരത്തിന് ഒരു കത്തെഴുതിയാല്‍ പ്രണയിക്കുന്നവര്‍ ഒന്നാകുമെന്നാണത്രേ വിശ്വാസം.

പതിനായിരത്തിലേറെ കത്തുകളാണ് ഇതിനോടകം ഈ മരത്തെ തേടിയെത്തിയിരിക്കുന്നത്. പ്രണയിതാക്കളുടെ കത്തുകള്‍ സ്വീകരിക്കാനായി സ്വന്തമായി പോസ്റ്റല്‍ അഡ്രസുവരെ ഈ മരത്തിനുണ്ട്. നിലത്ത് നിന്നു മൂന്ന് മീറ്ററോളം ഉയരത്തിലാണ് മരത്തിന്റെ പോസ്റ്റ് ബോക്‌സ് എന്നറിയപ്പെടുന്ന പൊത്തുള്ളത്. ഈ പൊത്തിലാണ് കത്തുകള്‍ നിക്ഷേപിക്കുക.

ഈ കത്തുകള്‍ ആര്‍ക്കു വേണമെങ്കിലും തുറന്നു വായിക്കാം. മറുപടി എഴുതാം. അതായത് പ്രണയില്ലാത്തവര്‍ക്കു പോലും വേണമെങ്കിലും മരത്തിന് കത്തെഴുതാമെന്ന പ്രത്യേകതയുമുണ്ട്. കത്ത് തുറന്നു വായിച്ച് മറുപടി എഴുതുന്ന ആള്‍ ഒരു പക്ഷേ പിന്നീട് നിങ്ങളുടെ പ്രണയിതാവായേക്കാം. അങ്ങനെ രണ്ടു പേര്‍ക്കിടയില്‍ പ്രണയം ഉടലെടുക്കാനും ഈ മരം കാരണമാകുന്നു.

ഇതിനു പിന്നില്‍ ഒരു കഥയുണ്ട് കേട്ടോ...സെല്‍റ്റിക് ഗോത്രത്തലവന്‍ തന്റെ മകനെ കാട്ടിലെ ഏതോ ഒരു മരത്തില്‍ കെട്ടിയിട്ടെന്നും ഇയാളെ ഒരു ക്രിസ്ത്യന്‍ യുവതി മോചിപ്പിച്ചുവെന്നും തന്റെ മോചനത്തിന്റെ ഓര്‍മ്മയ്ക്കായി യുവാവ് ഈ 'പ്രണയമരം' നട്ടശേഷം ക്രിസ്ത്യന്‍ മതം സ്വീകരിച്ചെന്നുമാണ് കഥ. എന്നാല്‍ ഇതില്‍ സത്യമില്ലെന്ന് ചരിത്രകാരന്‍മാര്‍ പറയുന്നു.

ഓഹര്‍ട്ട് എന്ന യുവതിയുടെ പ്രണയത്തെ അച്ഛന്‍ എതിര്‍ത്തെന്നതാണ് മറ്റൊരു കഥ. അച്ഛന്‍ കാണാതെ കാമുകനു കത്തു നല്‍കാന്‍ ഓഹര്‍ട്ട് കണ്ടെത്തിയ വഴിയായിരുന്നു ഈ മരത്തിന്റെ പൊത്ത്. കത്തുകളിലൂടെ പ്രണയം വീണ്ടും കടുത്തപ്പോള്‍ അച്ഛന്‍ വിട്ടുവീഴ്ചയ്ക്കു തയ്യാറാവുകയും ഇരുവരും വിവാഹിതരാവുകയും ചെയ്തു. ഈ മരത്തിന്റെ മുന്നിലാണ് ഇരുവരും വിവാഹിതരായത്. അന്നു മുതല്‍ മരം മുഖേന കത്ത് കൈമാറിയാല്‍ തടസ്സങ്ങള്‍ മാറി പ്രണയം സഫലമാകുമെന്ന ചിന്ത എല്ലാവരിലുമെത്തി. ഇതോടെ ആയിരക്കണക്കിന് കത്തുകളും മരത്തിനു കിട്ടിത്തുടങ്ങിയെന്നാണ് കഥ.