55 കിലോമീറ്റര്‍ നീളത്തില്‍ ചൈന നിര്‍മിച്ച കടല്‍പാലം ഏവരെയും അത്ഭുതപ്പെടുത്തുന്നു. ആധുനിക ലോകത്തെ മഹാത്ഭുതങ്ങളില്‍ ഒന്നായ ഈ കടല്‍പാലം ഈ വര്‍ഷം ഒടുവില്‍ ഗതാഗതത്തിനായി തുറന്നു കൊടുക്കും എന്നാണ് അറിയുന്നത്. 'വൈ' ആകൃതിയിലുള്ള പാലത്തില്‍ രണ്ടിടത്ത് ദ്വീപുകളും തുരങ്കങ്ങളും നിര്‍മിച്ചിട്ടുണ്ട്. ഇതാണ് പാലത്തെ അത്ഭുതമാക്കുന്നത്.

ഹോങ്കോങ്ങിലെ ലന്താവു ദ്വീപില്‍ നിന്ന് തുടങ്ങുന്ന പാലത്തിന്റെ നീളം 55 കിലോമീറ്ററാണ്. മക്കാവുവിലേക്കും സുഹായിയിലേക്കും രണ്ടായി പിരിഞ്ഞാണ് പാലം അവസാനിക്കുന്നത്. ഏതു ചുഴലിക്കാറ്റിനേയും കടല്‍ത്തിരമാലകളേയും പ്രതിരോധിച്ച് നില്‍ക്കാന്‍ കഴിയുന്ന എന്‍ജിനീയറിംഗ് അത്ഭുതമെന്നാണ് ചൈന പാലത്തെ കുറിച്ച് അവകാശപ്പെടുന്നത്.

പാലത്തിനിടയില്‍ നിര്‍മിച്ചിട്ടുള്ള രണ്ടു കൃത്രിമ ദ്വീപുകളും അവയെ കടലുമായി ബന്ധിപ്പിച്ചിട്ടുള്ള തുരങ്കങ്ങളുമാണ് ഈ കടല്‍പാലത്തിന്റെ പ്രത്യേകതയായി പറയപ്പെടുന്നത്. കപ്പലുകള്‍ക്ക് കടന്നു പോകുന്നതിനായിട്ടാണ് ഈ രണ്ടു തുരങ്കങ്ങളും നിര്‍മിച്ചിട്ടുള്ളത്. 6.7 കിലോമീറ്ററാണ് തുരങ്കങ്ങളുടെ ദൈര്‍ഘ്യം. ഈ രണ്ടു തുരങ്കങ്ങള്‍ക്കിടയിലെ ദൂരം 22.9 കിലോമീറ്ററാണ്. ഈ രണ്ടു ഭാഗങ്ങള്‍ നിര്‍മിക്കാനായി മാത്രം നാലു ലക്ഷം ടണ്‍ സ്റ്റീലാണ് ഉപയോഗിച്ചത്. അതായത് 60 ഈഫില്‍ ടവറുകള്‍ നിര്‍മ്മിക്കുന്നതിനുള്ള അത്രയും സ്റ്റീല്‍.

ട്യൂബ് തുരങ്കങ്ങള്‍ നിര്‍മ്മിച്ച് വെള്ളത്തില്‍ താഴ്ത്തുകയായിരുന്നു. കടലിനടിയില്‍ വച്ച് ഈ ട്യൂബ് തുരങ്കങ്ങള്‍ വെള്ളത്തില്‍ ഒഴുകുന്ന കൂറ്റന്‍ ക്രെയിനുകള്‍ ഉപയോഗിച്ചാണ് തമ്മില്‍ ബന്ധിപ്പിച്ചത്. പാലം യാഥാര്‍ത്ഥ്യമാകുന്നതോടെ ഹോങ്കോംഗില്‍ നിന്നുള്ള യാത്രയുടെ സമയദൈര്‍ഘ്യം പത്തിലൊന്നായി ചുരുങ്ങും. നാലു മണിക്കൂര്‍ സഞ്ചാര ദൂരം 45 മിനിറ്റ് കൊണ്ട് പൂര്‍ത്തിയാക്കാന്‍ സാധിക്കും.

തെക്കന്‍ ചൈനയിലെ ഗുവാംഗ്‌ടോംഗ് പ്രവിശ്യയിലെ സുഹായ് നഗരത്തില്‍ നിന്ന് ഹോങ്കോംഗിലെ മക്കാവുവിലേക്കാണ് കടലിനു കുറുകെ പാലം നിര്‍മ്മിച്ചത്. കഴിഞ്ഞ സെപ്തംബറില്‍ നിര്‍മ്മാണം പൂര്‍ത്തിയായ പാലത്തിന്റെ അനുബന്ധജോലികളാണ് ഇപ്പോള്‍ നടന്നുവരുന്നത്.

120 വര്‍ഷത്തെ ആയുസ്സാണ് പാലത്തിന് നിര്‍മ്മാതാക്കള്‍ അവകാശപ്പെടുന്നത്. പാലത്തിന്റെ ഡോള്‍ഫിന്റെ ആകൃതിയിലുള്ള 2786 ടണ്‍ ഭാരം വരുന്ന ടവറുകള്‍ പ്ലാന്റുകളില്‍ ഉണ്ടാക്കി കൂട്ടിച്ചേര്‍ക്കുകയായിരുന്നു.