ലുറെ സു എന്ന സുന്ദരി മോഡലിംഗ് ലോകത്ത് ഒരു ചര്‍ച്ചാ വിഷയമാണ്. തായ്‌വാനീസ് ഫാഷന്‍ ഡിസൈനറാണ് കക്ഷി. ലുറെയെ കണ്ടവര്‍ കക്ഷി ഒരു മോഡല്‍ ആണെന്നുള്ള വിചാരത്തിലാണ്. ഏതൊരു തായ്‌വാനീസ് മോഡലിനെയും കടത്തിവെട്ടുന്ന സൗന്ദര്യമാണ് ഈ സുന്ദരിക്കുള്ളത്. ഫാഷന്റെ പ്രതീകമായി ചുരുങ്ങിയ സമയത്തിനുള്ളില്‍ സോഷ്യല്‍ മീഡിയ ലോകം കീഴടക്കിയ ലുറെയുടെ പ്രായമാണ് കഴിഞ്ഞവാരം ഏറെ ചര്‍ച്ച ചെയ്യപ്പെട്ടത്.

ലുറെയുടെ സൗന്ദര്യത്തില്‍ വീണുപോയ ആരാധകര്‍ 17 മുതല്‍ 22 വയസു വരെയാണ് ലുറെയുടെ പ്രായമെന്നു വിലയിരുത്തി. എന്നാല്‍ എല്ലാ വിലയിരുത്തലുകള്‍ക്കും ചര്‍ച്ചകള്‍ക്കും ഒടുവില്‍ ലുറെ തന്റെ പ്രായം വ്യക്തമാക്കി, 42 വയസ്സ്. കേട്ട് നിന്നവര്‍ക്ക് അമ്പരക്കാന്‍ വേറെ വല്ലതും വേണോ? ആര്‍ക്കും വിശ്വാസം വരുന്നില്ല ലുറെ സു 42 വയസുള്ള വ്യക്തിയാണെന്ന്.വെജിറ്റേറിയന്‍ ഡയറ്റാണ് തന്റെ സൗന്ദര്യ രഹസ്യമെന്ന് ഈ തായ്‌വാനീസ് യുവതി വ്യക്തമാക്കുന്നു. ദിവസവും ധാരാളം വെള്ളം കുടിക്കും, പഴങ്ങളും പച്ചക്കറികളും കൂടിയ തോതില്‍ തന്നെ അകത്താക്കും. പിന്നെ, ദിനചര്യയുടെ ഭാഗമായുള്ള വ്യായാമമുറകളും കൂടിയാകുമ്പോള്‍ ലുറെ എന്നും മധുരപ്പതിനേഴിനു ഉടമയാകുന്നു എന്നതാണ് സത്യം. ആര്‍ക്കും പരീക്ഷിക്കാവുന്ന ഒന്നാണ് തന്റെ സൗന്ദര്യ രഹസ്യമെന്ന് ലുറെ വ്യക്തമാക്കുന്നു.ഇന്‍സ്റ്റാഗ്രാമില്‍ 230,000 ആളുകളും ഫേസ്ബുക്കില്‍ 341,000 ആളുകളുമാണ് ലുറെ സുവിനെ പിന്തുടരുന്നത്. ഫാഷന്‍ ഡിസൈനിംഗിന് പുറമെ, ടിവി ഷോ അവതാരകയായും ലുറെ തകര്‍ക്കുന്നുണ്ട്. കാര്യം എല്ലാം ശരി തന്നെ എന്നാല്‍ 42 വയസ്സുണ്ട് തങ്ങള്‍ ആരാധിക്കുന്ന ലുറെക്ക് എന്ന് വിശ്വസിക്കാന്‍ മാത്രം ആരധകര്‍ തയ്യാറല്ല. പക്ഷെ, അതാണ് സത്യം!