കോതനല്ലൂര് ഫൊറോന പള്ളിയില് ഇരട്ടകളുടെ മഹാസംഗമം നടന്നു
പാരമ്പര്യത്തിന്റെയും വിശ്വാസത്തിന്റെയും നിറവില് കോതനല്ലൂര് ഫൊറോന പള്ളിയിലെ ഇരട്ടകളുടെ മഹാസംഗമം നടത്തി. പങ്കെടുത്തത് 680 ജോഡി ഇരട്ട സഹോദരങ്ങളാണ്.
കഴിഞ്ഞ വര്ഷത്തെക്കാള് 14 ഇരട്ടകള് കൂടുതലായി എത്തി. ഇടവക മധ്യസ്ഥരും ഇരട്ടവിശുദ്ധരുമായ വിശുദ്ധ ഗര്വ്വാസീസിന്റെയും വിശുദ്ധ പ്രോത്താസീസിന്റെയും (കന്തീശങ്ങള്) അനുഗ്രഹം തേടിയാണ് കോതനല്ലൂരില് ഇരട്ട സഹോദരങ്ങളുടെ സംഗമം നടത്തുന്നത്.
ഇടവകയിലെ അറുപതിലധികം ഇരട്ടകള് സംഗമത്തിലുണ്ടായിരുന്നു. വയലാ തന്നടിയില് അഭിലാഷിന്റെയും സുജിതാ ലക്ഷ്മിയുടെയും മക്കളായ 60 ദിവസം മാത്രം പ്രായമുള്ള കാര്ത്തികും കാര്ത്തികയുമാണ് സംഗമത്തിലെ ഇളംതലമുറക്കാര്. കോതനല്ലൂര് ഫൊറോന പള്ളി ഇടവകാംഗങ്ങളായി ഇരട്ട പുണ്യവാളന്മാരുടെ നാമധാരികളായി 1927 ഒക്ടോബര് മൂന്നിന് ജനിച്ച പുളിക്കാനിക്കല് ഗര്വ്വാസീസും പ്രോത്താസീസുമാണ് സംഗമത്തിനെത്തിയവരിലെ മുതിര്ന്നവര്.
ഇരട്ടകള് ഇരട്ടകളെ ജീവിത പങ്കാളികളാക്കിയവരും സംഗമത്തില് പങ്കെടുത്തു. ഇരട്ട വൈദികരാണ് സമൂഹബലിക്ക് കാര്മികത്വം വഹിച്ചത് എന്ന കൗതുകമുണ്ട്. ഫാ.റോമ്പി കണ്ണഞ്ചിറ, ഫാ.റോയി കണ്ണഞ്ചിറ, ഫാ.തോമസ് ചൂളപ്പറമ്പില്, ഫാ.ജോസഫ് ചൂളപ്പറമ്പില്, ഫാ.റോജി മനയ്ക്കപ്പറമ്പില്, ഫാ.റെജി മനയ്ക്കപ്പറമ്പില്, ഫാ.ജെന്നി കായംകുളത്തുശ്ശേരി, ഫാ.ജസ്റ്റിന് കായംകുളത്തുശ്ശേരി, ഫാ.ജോസഫ് കൊല്ലകൊമ്പില്,ഫാ.ആന്റണി കൊല്ലകൊമ്പില് എന്നിവരാണ് സംഗമത്തിനെത്തിയ ഇരട്ട സഹോദരങ്ങളായ വൈദീകര്.
ശുശ്രൂഷകള്ക്ക് ബിഷപ്പ് മാര് ജോസഫ് കല്ലറങ്ങാട്ട് മുഖ്യകാര്മികത്വം വഹിച്ചു. വികാരി റവ.ഡോ. ജോര്ജ് വര്ഗീസ് ഞാറക്കുന്നേലിന്റെ നേതൃത്വത്തിലാണ് തിരുനാളും ഇരട്ടകളുടെ മഹാസംഗമവും നടന്നത്.
https://www.facebook.com/Malayalivartha
