ലോറി തടഞ്ഞു നിര്ത്തി വൈക്കോല് തട്ടിയിടുന്ന ആനയുടെ ദൃശ്യങ്ങള് കൗതുകമാകുന്നു(വീഡിയോ)
വെള്ളത്തിലും മണ്ണിലും മാത്രമല്ല, വൈക്കോലിലും കളിക്കുന്നത് ഇഷ്ടമാണ് ഈ കൊമ്പന്. എന്നാല് തനിക്ക് കളിക്കാനുള്ള വൈക്കോല് ലോറിയില് നിന്ന് മോഷ്ടിക്കുകയാണ് ഇവന്റെ പതിവ്. സമൂഹ മാധ്യമങ്ങളിലും വൈറലാണ് വൈക്കോലിലുള്ള ഈ കൊമ്പന്റെ കുരുത്തക്കേട്. ഘോവോ യായ് ദേശീയ പാര്ക്കിലൂടെ പോവുകയായിരുന്ന ലോറിയില് നിന്നായിരുന്നു ആനയുടെ വൈക്കോല് മോഷണം. മോഷണം എന്നു പറയുന്നതിലും നല്ലത് വണ്ടിതടഞ്ഞു ഭീഷണിപ്പെടുത്തി കൊള്ളയടിച്ചുവെന്നു വേണമെങ്കില് പറയാം.
കാരണം വഴിയില് കയറി നിന്ന് ലോറി തടഞ്ഞു നിര്ത്തിയാണ് ആന വൈക്കോല് ദേഹത്തേക്ക് വാരിയെറിഞ്ഞത്. കൂട്ടത്തില് അത് കഴിക്കാനും ശ്രമിക്കുന്നുണ്ട്. വൈക്കോല് കെട്ട് അല്പ്പ നേരം റോഡിലിട്ട് തട്ടിക്കളിച്ച ശേഷമാണ് ആന പതിയെ കഴിക്കാന് തുടങ്ങിയത്. ആനയുടെ ഈ മോഷണവും കുസൃതിയുമെല്ലാം ലോറിക്കു പിന്നിലുണ്ടായിരുന്ന കാറിലെ യാത്രക്കാരാണ് ക്യാമറയില് പകര്ത്തിയത്.
ആന വൈക്കോലില് ശ്രദ്ധിക്കാന് തുടങ്ങിയതോടെ ആശ്വാസമായത് ലോറി ഡ്രൈവര്ക്കാണ്. ഈ സമയം നോക്കി ഡ്രൈവര് പതിയെ ലോറി മുന്നോട്ടെടുത്തു. ഇതിനു പിന്നാലെ ആന വഴിമുടക്കിയതു മൂലം ലോറിക്കു പിന്നില് കുടുങ്ങിയ മറ്റു വാഹനങ്ങളും മുന്നോട്ടെടുത്തു. മാര്ക് എന്ന ഈ കൊമ്പനാന ലോറിയില് നിന്നു വൈക്കോല് മോഷ്ടിക്കുന്നത് ഇതാദ്യമായല്ല. വൈക്കോല് മോഷണം പതിവായതോടെ ആനയുടെ കൊതി തീര്ക്കാനും റോഡില് നിന്ന് അകറ്റി നിര്ത്താനും മാര്ക്കിന് വൈക്കോല് വാങ്ങി നല്കാനാണ് പാര്ക്കിന്റെ മേധാവിയുടെ നിര്ദ്ദേശം.
ഇങ്ങനെ വൈക്കോല് കൊതിതീരെ കഴിക്കാന് കിട്ടിയാല് ലോറിക്കാരുടെ വഴി മുടക്കാന് മാര്ക് വരില്ലെന്നാണ് പ്രതീക്ഷ. വൈക്കോലുണ്ടെങ്കിലും ഇല്ലെങ്കിലും ഈ ഹൈവേയില് മിക്കവാറും ആനകളിറങ്ങാറുണ്ട്. പലപ്പോഴും ഇവ അക്രമാസക്തരാകാറുമുണ്ട്. 2015-ല് ഇങ്ങനെ ഹൈവേയില് ഇറങ്ങിയ ആന റോഡില് കുടുങ്ങിയ കാറുകളില് ഒന്നിന്റെ മുകളില് കയറിയിരുന്നു നശിപ്പിക്കാന് ശ്രമിക്കുന്ന ദൃശ്യം സമൂഹമാധ്യമങ്ങളില് ചര്ച്ചയായിരുന്നു.
https://www.facebook.com/Malayalivartha
