ഗ്രിഗറ്റി ബ്രെട്ടണും സംഘവും കഴിഞ്ഞ നാലു വര്‍ഷമായി അന്വേഷിച്ചു നടക്കുകയായിരുന്നു അവയെ. അതും മൊറൊക്കോയിലെ സഹാറ മരുഭൂമിയുടെ മണല്‍ക്കാടുകള്‍ക്കിടയില്‍. ഇതിനോടകം 30 എണ്ണത്തെ കണ്ടെത്തി, 13 എണ്ണത്തിന് റേഡിയോ കോളറും ഘടിപ്പിച്ചു. പക്ഷേ എന്നിട്ടും അവരുടെ കൂട്ടത്തിലെ കുഞ്ഞന്മാരെ മാത്രം കണ്ടില്ല. ഒടുവില്‍ 2013 മുതലുള്ള അധ്വാനത്തിന്റെ ഫലമായി 'പാന്ഥറ ഫ്രാന്‍സ്' എന്ന ആ ഗവേഷകസംഘത്തിലെ ഒരാള്‍ക്കു മുന്നില്‍ മൂന്നു കുഞ്ഞന്മാരെത്തി. 'വൈല്‍ഡ് സാന്‍ഡ് ക്യാറ്റ്' എന്നറിയപ്പെടുന്ന പൂച്ചക്കുഞ്ഞുങ്ങളെയായിരുന്നു ഗവേഷക സംഘം അന്വേഷിച്ചു കൊണ്ടിരുന്നത്. ആഫ്രിക്കന്‍ മേഖലയില്‍ നിന്ന് ഇതാദ്യമായി മൂന്നു 'വൈല്‍ഡ് സാന്‍ഡ്' പൂച്ചക്കുഞ്ഞുങ്ങളുടെ വിഡിയോ ദൃശ്യങ്ങള്‍ ക്യാമറയില്‍ പതിയുകയും ചെയ്തു.

വിടര്‍ന്ന കണ്ണുകളും അതിനുള്ളില്‍ തിളങ്ങുന്ന വലിയ കൃഷ്ണമണിയുമൊക്കെയായി പകച്ചു നോക്കുന്ന പൂച്ചകളുടെ വിഡിയോ പുറത്തു വിട്ടപ്പോള്‍ ജന്തുലോകത്തെ ഏറ്റവും മികച്ച 'ക്യൂട്ട്' കാഴ്ചകളില്‍ ഒന്നെന്നാണ് പരിസ്ഥിതി സ്‌നേഹികള്‍ പ്രകീര്‍ത്തിച്ചത്. അപൂര്‍വങ്ങളില്‍ അപൂര്‍വമായ കാഴ്ചയായതിനാല്‍ അതിനു ഭംഗിയും ഏറി.

 കാഴ്ചയില്‍ നാടന്‍ പൂച്ചയെപ്പോലെയാണെങ്കിലും കണ്ണുകളാണ് ഇവയെ വേറിട്ടു നിര്‍ത്തുന്നത്. ഒപ്പം ദേഹത്ത് വരകള്‍ കുറവായിരിക്കും. മണലിന്റെ നിറമായതിനാല്‍ മരുഭൂമിയില്‍ ഒളിച്ചിരിക്കാനും എളുപ്പം. മികച്ച വേട്ടക്കാരുമാണ്. ഇന്റര്‍നാഷനല്‍ യൂണിയന്‍ ഫോര്‍ കണ്‍സര്‍വേഷന്‍ ഓഫ് നേച്ചറും ഇവയെപ്പറ്റി വിശദീകരിച്ചിട്ടുണ്ട്. വടക്കന്‍ ആഫ്രിക്ക, മധ്യപൗരസ്ത്യ ദേശം, മധ്യേഷ്യ എന്നിവിടങ്ങളിലെ മരുഭൂമികളിലാണ് ഈ പൂച്ചകളെ പ്രധാനമായും കാണുക. എന്നാല്‍ വിശാലമായിക്കിടക്കുന്ന മരുഭൂമികളില്‍ ചിതറിയ നിലയിലാണ് ഇവയുടെ ജീവിതം. അതായത്, മരുഭൂമികളില്‍ തന്നെ ചില പ്രത്യേക ഭാഗങ്ങളിലേ ഇവയെ കാണാനാകൂ.

ഇക്കഴിഞ്ഞ ഏപ്രിലിലാണ് ആഫ്രിക്കന്‍ മേഖലയില്‍ നിന്ന് ഈ പൂച്ചകളിലെ നവജാതരുടെ വിഡിയോ ആദ്യമായി ലഭിച്ചത്. അതും രാത്രി രണ്ടു മണി സമയത്ത്. മണല്‍ക്കാട്ടില്‍ പൂച്ചകളെ അന്വേഷിച്ചു തിരിച്ചു വരുന്ന വഴി ഡോ.അലക്‌സാണ്ടര്‍ സില്‍വയ്ക്കു മുന്നില്‍ അപ്രതീക്ഷിതമായിട്ടായിരുന്നു പൂച്ചക്കൂട്ടം പ്രത്യക്ഷപ്പെട്ടത്. ഏകദേശം ആറു മുതല്‍ എട്ടാഴ്ച വരെയായിരുന്നു കാഴ്ചയില്‍ ഇവയുടെ പ്രായം. കഴിഞ്ഞ ദിവസം ഇവയെപ്പറ്റിയുള്ള പഠനം ആരംഭിച്ചതിന്റെ വിവരങ്ങളും പുറത്തുവിട്ടു സംഘം. മരുഭൂമിയില്‍ ഒളിച്ചിരിക്കുന്ന രീതികള്‍, സന്ധ്യയ്ക്കും രാത്രിയിലും സജീവമാകുന്ന ഇവരുടെ വേട്ടയാടല്‍, പെട്ടെന്നു പിടിതരാതെ രക്ഷപ്പെട്ട് ഒളിച്ചു കളിക്കാന്‍ സഹായിക്കുന്നതെന്താണ് തുടങ്ങിയ കാര്യങ്ങളാണ് പഠനവിധേയമാക്കുന്നത്.

മരുഭൂമിയില്‍ ചില ഭാഗങ്ങളില്‍ മാത്രം കാണുന്നതിന്റെ കാരണവും അന്വേഷിക്കും. ഫെലിസ് മാര്‍ഗരിറ്റ ആണ് വൈല്‍ഡ് സാന്‍ഡ് ക്യാറ്റിന്റെ ശാസ്ത്രനാമം. മരുഭൂമികളിലെ പല്ലികളും ചെറു എലികളുമൊക്കെയാണ് ഭക്ഷണം. മണല്‍ക്കാട്ടിലെ ചെടികള്‍ക്കിടയിലും മാളങ്ങളിലും പാറകള്‍ക്കിടയിലുമൊക്കെയാണ് താമസം. ഇത്തവണ കണ്ടെത്തിയ മൂന്നു പൂച്ചക്കുഞ്ഞുങ്ങള്‍ക്കും റേഡിയോ കോളര്‍ ഘടിപ്പിക്കാനായില്ല. പക്ഷേ സമീപത്തു കണ്ടെത്തിയ ഒരുപെണ്‍പൂച്ചയ്ക്ക് കോളര്‍ ഘടിപ്പിച്ചു. അത് ഈ കുഞ്ഞുങ്ങളുടെ അമ്മയാണെന്നാണു കരുതുന്നത്. അങ്ങനെയെങ്കില്‍, പൂച്ചക്കുഞ്ഞുങ്ങളെ നിരീക്ഷിക്കുക വഴി അവയുടെ കൃത്യമായ ജീവിതരീതി ഇതാദ്യമായി ലോകത്തിനു മുന്നിലെത്തും. പ്രത്യുല്‍പാദനരീതിയും കുഞ്ഞുങ്ങളെ വളര്‍ത്തി വലുതാക്കുന്നത് എങ്ങനെയാണെന്നതിനെപ്പറ്റിയുമെല്ലാം പഠിക്കും സംഘം. എല്ലാ വിവരങ്ങളും സാന്‍ഡ് ക്യാറ്റ് സഹാറ റിസര്‍ച് സംഘത്തിന്റെ ഫെയ്‌സ്ബുക് പേജില്‍ അപ്‌ഡേറ്റ് ചെയ്യുന്നുമുണ്ട്.