സിഗരറ്റ് കുറ്റികള് പെറുക്കാന് ഇനി സ്റ്റാര്ട്ടപ്പ് കമ്പനിയുടെ കാക്കകള് എത്തും!
പുകവലിച്ചതിനു ശേഷം സിഗരറ്റ് കുറ്റികള് വഴിവക്കില് വലിച്ചെറിയുമ്പോള് അത് പ്രകൃതിക്ക് വരുത്തിവയ്ക്കുന്ന ദൂഷ്യങ്ങള് ചില്ലറയൊന്നുമല്ല. ഈ സിഗരറ്റ് കുറ്റികള് പന്ത്രണ്ട് വര്ഷത്തോളം മണ്ണില് കിടന്നതിനു ശേഷം മാത്രമേ അലിഞ്ഞു പോകുകയുള്ളു എന്നാണ് പഠനം തെളിയിക്കുന്നത്.
ഇപ്പോഴിതാ ഈ പ്രശ്നത്തിന് പരിഹാരവുമായി എത്തിയിരിക്കുകയാണ് ഒരു ഡച്ച് സ്റ്റാര്ട്ടപ്പ് കമ്പനിയുടെ ഇന്ഡസ്ട്രിയല് ഡിസൈനര്മാരായ റുബെന് വാന് ദെര് ലൂട്ടെനും ബോബ് സ്പിക്മെനും.
തെരുവില് അടിഞ്ഞു കൂടുന്ന സിഗരറ്റ് കുറ്റികള് കാക്കകളെ ഉപയോഗിച്ച് എടുപ്പിച്ച് പ്രത്യേകം തയാറാക്കി നഗരത്തിന്റെ പലഭാഗങ്ങളിലും സ്ഥാപിച്ചിരിക്കുന്ന ക്രോബാഗുകളില് നിക്ഷേപിക്കുന്ന ആശയവുമായാണ് ഇവര് എത്തിയിരിക്കുന്നത്. ഓരോ സിഗരറ്റ് കുറ്റിയും കൊണ്ടിടുമ്പോള് കാക്കയ്ക്ക് പ്രതിഫലമായി ബാഗുകളില് നിന്നും ഭക്ഷണം പുറത്തേക്ക് വരും. അത് എടുത്തുകൊണ്ട് കാക്കകള്ക്ക് പറന്നു പോകുകയും ചെയ്യാം. 
ഒരാള് കാക്കകളെ നാണയം എടുക്കാന് പരിശീലിപ്പിക്കുന്നത് ശ്രദ്ധയില്പ്പെട്ടതാണ് ഏവരെയും അമ്പരപ്പിച്ച കണ്ടുപിടുത്തം നടത്താന് ഇവര്ക്ക് പ്രചോദനമായത്.
പലപ്പോഴും ശല്യക്കാരെന്നു കരുതുന്ന കാക്കകള് ഇത്രയും ഉപകാരികളാണെന്നാണ് ഇവര് മനസിലാക്കിത്തരുന്നത്. ക്രോബാഗുകളില് നിക്ഷേപിക്കാതെ സിഗരറ്റ് കുറ്റികള് ഉപയോഗിച്ച് കാക്കകള് കൂട് നിര്മിക്കുന്നുണ്ടെന്നും ഇവര് കണ്ടെത്തിയിട്ടുണ്ട്.
https://www.facebook.com/Malayalivartha
