വിവാഹം കഴിയാതെ മരിച്ചുപോയ ആത്മാക്കള്‍ക്ക് വിവാഹവും ആദ്യരാത്രിയും ; വിചിത്രാചാരം നമ്മുടെ സ്വന്തം കേരളത്തില്‍...
കൊട്ടും കുരവയും സദ്യയുമായി ഭൂമിയില്‍ ബന്ധുക്കള്‍ കല്യാണം നടത്തി; ഭൂമിയില്‍ കല്യാണം നടത്തി എന്നു പറഞ്ഞത് വിവാഹങ്ങള്‍ സ്വര്‍ഗ്ത്തില്‍ തീരുമാനിക്കപ്പെടുന്നതാണ് എന്നോര്‍മ്മിപ്പിക്കാനല്ല. കഴിഞ്ഞദിവസം കാസര്‍ഗോട്ടെ അതിര്‍ത്തിഗ്രാമമായ പെര്‍ളയിലായില്‍ നടന്നത് ഒരു പ്രേതക്കല്യാണമായിരുന്നു അതുകൊണ്ടാണ്!
മൂന്നാംവയസില്‍ മരിച്ച രമേശനും രണ്ടാംവയസില്‍ മരിച്ച സുകന്യയുമാണ് പരലോകത്ത് ദാമ്പത്യത്തിലേക്കു പ്രവേശിച്ചത്! പരേതരുടെ കല്യാണമാണെങ്കിലും ബന്ധുക്കള്‍ ഭൂമിയിലെ നിയമം തെറ്റിച്ചില്ല. ഇരുവരുടെയും ആത്മാക്കള്‍ക്ക് പ്രായപൂര്‍ത്തിയായശേഷമാണു കെട്ടിച്ചത്.
ഉത്തരകേരളത്തില്‍ കര്‍ണാടകത്തോടു ചേര്‍ന്ന ഗ്രാമങ്ങളിലാണു ദോഷപരിഹാരാര്‍ത്ഥം പ്രേതക്കല്യാണങ്ങള്‍ എന്ന വിചിത്രാചാരം മടങ്ങിയെത്തിയത്. കണ്‍മുന്നില്‍ വധൂവരന്‍മാര്‍ ഇല്ലെന്നതൊഴിച്ചാല്‍, പെണ്ണുചോദിക്കലും ജാതകപ്പൊരുത്തം നോക്കലും ഉള്‍പ്പെടെ മറ്റു ചടങ്ങുകളെല്ലാം സാധാരണ വിവാഹങ്ങളുടേതുപോലെതന്നെ. ശേഷം, ക്ഷണിക്കപ്പെട്ടവരെല്ലാം 'സങ്കടക്കണ്ണീര്‍' തുടച്ച്, സദ്യയുമുണ്ടു പിരിയും. കുടുംബത്തിലെയും ഗ്രാമത്തിലെയും ദോഷപരിഹാരത്തിനും യുവതീയുവാക്കളുടെ മംഗല്യഭാഗ്യത്തിനുമായി ജ്യോത്സ്യനിര്‍ദേശപ്രകാരമാണു പ്രേതക്കല്യാണം നടത്തുന്നത്. വിവാഹത്തിനു മുമ്പേ മരിച്ച ഹതഭാഗ്യരുടെ ആത്മാക്കളെയാണ് ഇങ്ങനെ ''പിടിച്ചുകെട്ടിക്കുന്നത്''.
കുടുംബത്തിലോ ഗ്രാമത്തിലോ എന്തെങ്കിലും അനിഷ്ടസംഭവങ്ങളുണ്ടാവുകയും പ്രതിവിധിയായി ജോത്സ്യന്‍ പ്രേതക്കല്യാണം നിര്‍ദേശിക്കുകയും ചെയ്താല്‍ ചടങ്ങുകള്‍ക്കു തുടക്കമായി. കുടുംബത്തില്‍ വിവാഹം നടക്കാതെ മരിച്ചയാള്‍ക്കു പെണ്ണുതേടലാണ് ആദ്യം. സുന്ദരിയും സുശീലയും ''പരേതയു''മായ പെണ്‍കുട്ടിയെ സ്വസമുദായത്തില്‍നിന്നുതന്നെ കണ്ടെത്തും. മിശ്രവിവാഹങ്ങള്‍ പ്രോത്സാഹിപ്പിക്കണമെന്നൊക്കെ കോടതി പറഞ്ഞാലും മിശ്രപ്രേതവിവാഹങ്ങള്‍ക്കു വകുപ്പില്ല. ജാതകങ്ങള്‍ തമ്മില്‍ ചേര്‍ന്നാല്‍ വിവാഹത്തീയതി കുറിക്കുകയായി. കുടുംബക്കാരെയും നാട്ടുകാരെയും കല്യാണക്കുറി നല്‍കിത്തന്നെ ക്ഷണിക്കും. വിവാഹം വധൂഗൃഹത്തിലാണ്.
പരേതരായ വധൂവരന്മാരുടെ രൂപമുണ്ടാക്കി വിവാഹവസ്ത്രങ്ങള്‍ അണിയിക്കും. മോതിരം െകെമാറി, മാലയിട്ടാല്‍ ഇരുവരും ദമ്പതികളായി. തുടര്‍ന്ന് സദ്യയുണ്ട്, പ്രേതനവവധുവുമായി വരന്റെ ആത്മാവും കൂട്ടരും മടങ്ങും. ഗൃഹപ്രവേശത്തിനുശേഷം വധൂവരന്‍മാരെ പാലച്ചോട്ടില്‍ കുടിയിരുത്തും. ''ആദ്യരാത്രി''യില്‍ ആത്മാക്കളെ അവരുടെ പാട്ടിനുവിടുന്നതോടെ ചടങ്ങുകള്‍ അവസാനിക്കും. കര്‍ണാടകത്തിലെ ഗ്രാമങ്ങളിലും പ്രേതക്കല്യാണങ്ങള്‍ നടക്കാറുണ്ട്. അവിടെ പക്ഷേ, ചടങ്ങുകള്‍ കുറേക്കൂടി ലളിതമാണ്.
ക്ഷേത്രത്തിലെത്തുന്ന വീട്ടുകാര്‍ ആത്മാക്കളെ ഓരോ തേങ്ങയിലേക്ക് ആവാഹിക്കും. പിന്നീടു ഹോമകുണ്ഡത്തിനു മുന്നില്‍ വധൂവരന്മാരുടെ വസ്ത്രങ്ങള്‍ െകെമാറും. ഒടുവില്‍ കമുകിന്‍പൂക്കുലയ്ക്കു മേല്‍ തേങ്ങകള്‍ വച്ച് െകെമാറുന്നതോടെ വിവാഹം കഴിയും. വിവാഹിതരാകാതെ മരിക്കുന്നവരുടെ ആത്മാക്കള്‍ക്കു മോക്ഷം ലഭിക്കില്ലെന്നും അവര്‍ വീട്ടുകാര്‍ക്കു ശല്യമുണ്ടാക്കുമെന്നുമാണ് ഈ ആചാരത്തിനു പിന്നിലെ വിശ്വാസം.
https://www.facebook.com/Malayalivartha
