ചിറ്റൂരിനടുത്ത് കൊഴിഞ്ഞാമ്പാറയിലെ അതിഥി തൊഴിലാളികളായ ബബിലുവും കുടുംബവും ലേബര്‍ ഓഫിസര്‍ ജോബി തോമസിനും കൊഴിഞ്ഞാമ്പാറ പൊലീസ് ഉദ്യോഗസ്ഥര്‍ക്കും സര്‍ക്കാരിനും ഒക്കെ നിറഞ്ഞ മനസ്സോടെ നന്ദി പറയുകയാണ്.

നാട്ടുകല്ലിലെ ഐസ് കമ്പനിയില്‍ കഴിഞ്ഞ ഡിസംബറിലാണു ബബിലുവും കുടുംബവും ജോലിക്കായെത്തിയത്. ഉത്തര്‍പ്രദേശ് സ്വദേശിയായ ബബിലുവിന്റെ ഭാര്യ പൂനം (30) യുപിയില്‍നിന്നു വരുമ്പോള്‍ത്തന്നെ നാലാമതു ഗര്‍ഭം ധരിച്ചിരുന്നു. മറ്റു മൂന്നു കുഞ്ഞുങ്ങളില്‍ ഒരു കുഞ്ഞ് മരിച്ചു. രണ്ടു കുട്ടികള്‍ ഭിന്നശേഷിക്കാരാണ്. അതില്‍ ഒരു കുട്ടി ഇവര്‍ക്കൊപ്പവും മറ്റൊരു കുട്ടി നാട്ടിലുമാണുള്ളത്.

നാലാമത്തെ പ്രസവം നാട്ടില്‍ ആകാമെന്നാണു കരുതിയിരുന്നത്. അതിനുള്ള ഒരുക്കങ്ങള്‍ക്കിടെയാണ് ലോക്ഡൗണ്‍ പ്രഖ്യാപിച്ചത്. അതിഥി തൊഴിലാളികളെക്കുറിച്ചുള്ള അന്വേഷണത്തിനിടെ പൊലീസ് അറിയിച്ചതിനെ തുടര്‍ന്നാണ് നല്ലേപ്പിള്ളി നവുക്കോണം പ്രാഥമിക ആരോഗ്യ കേന്ദ്രത്തിലെ ജൂനിയര്‍ പബ്ലിക് ഹെല്‍ത്ത് നഴ്‌സ് ഹാജിറയും ആശാ വര്‍ക്കര്‍ ശിവലക്ഷ്മിയും ഇവരുടെ താമസ സ്ഥലത്തെത്തിയത്.

ഗര്‍ഭകാല പരിശോധനകളൊന്നും പൂനം യഥാസമയം നടത്തിയിരുന്നില്ല. ഇടയ്ക്ക് താമസ സ്ഥലത്തെത്തി നടത്തിയ പരിശോധനയില്‍ ആരോഗ്യസ്ഥിതി വളരെ മോശമാണെന്നു മനസ്സിലായ ആരോഗ്യ പ്രവര്‍ത്തകര്‍ ജില്ലാ ആശുപത്രിയില്‍ പ്രവേശിപ്പിച്ചു. 4 യൂണിറ്റ് രക്തം നല്‍കി. ഇവരുടെ ആരോഗ്യ സ്ഥിതി മെച്ചപ്പെട്ട ശേഷമാണു വീട്ടിലേക്കയച്ചത്.

ദിവസങ്ങള്‍ക്കു ശേഷം രക്തസ്രാവമുണ്ടായ പൂനത്തെ ആരോഗ്യ പ്രവര്‍ത്തകരും സമീപവാസികളും ചേര്‍ന്നു താലൂക്ക് ആശുപത്രിയില്‍ പ്രവേശിപ്പിച്ചു. അവിടെവച്ചാണു മാസം തികയാതെ പ്രസവിച്ചത്. പ്രസവത്തിനു ശേഷം താമസ സ്ഥലത്തെത്തിയ ഇവര്‍ക്കു തിരിച്ചു നാട്ടിലേക്കു പോകാന്‍ അവസരം ലഭിച്ചിട്ടും പോയില്ല. കഴിഞ്ഞമാസം 23-നാണ് പെണ്‍കുഞ്ഞിനു ജന്മംനല്‍കിയത്. അമ്മയും കുഞ്ഞും ഇപ്പോള്‍ ആരോഗ്യവതികളാണ്.

നാട്ടില്‍ ഇത്രത്തോളം പരിചരണം കിട്ടില്ലെന്നും തല്‍ക്കാലം ഇവിടെത്തന്നെ ജോലിചെയ്തു ജിവിക്കാനാണ് ഉദ്ദേശിക്കുന്നതെന്നും ഈ ദമ്പതികള്‍ പറഞ്ഞു. യഥാസമയം സഹായങ്ങള്‍ നല്‍കി ജീവിതത്തിലേക്കു കൈപിടിച്ചുയര്‍ത്തിയ ഹാജിറയ്ക്കും ശിവലക്ഷ്മിക്കും ലേബര്‍ ഓഫിസര്‍ ജോബി തോമസിനും കൊഴിഞ്ഞാമ്പാറ പൊലീസ് ഉദ്യോഗസ്ഥര്‍ക്കും സര്‍ക്കാരിനും എല്ലാവരോടും ഹൃദയത്തിന്റെ ഭാഷയില്‍ അവര്‍ നന്ദി പറയുന്നു.