സ്വപ്ന സുരേഷിന്റെ പേരില്‍ വിവിധ ബാങ്കുകളിലുള്ള അമൂല്യ വസ്തുക്കള്‍ ശിവശങ്കറിന്റെ കൂടി ഉടമസ്ഥതയില്‍. അങ്ങനെയാണെന്നാണ് കസ്റ്റംസ് എന്‍ ഐ എക്ക് നല്‍കിയിരിക്കുന്ന റിപ്പോര്‍ട്ട്. ഇത് തെളിയിക്കുന്നതിന്റെ അവസാന ഘട്ടത്തിലാണ് കസ്റ്റംസ്. അപ്രകാരം തെളിയിക്കുകയാണെങ്കില്‍ ശിവശങ്കറിന്റെ കൂമ്പിടിച്ച് എന്‍ ഐ എ വാട്ടും.

സ്വപ്ന, ശിവശങ്കര്‍ ലോക്കറുകളില്‍ ഉള്ള അമൂല്യ വസ്തുക്കളില്‍ സര്‍ക്കാരിലോ സി പി എമ്മിലോ ഉള്ള ഉന്നതന് പങ്കുണ്ടോ എന്നും അന്വേഷണ ഏജന്‍സികള്‍ സംശയിക്കുന്നുണ്ട്. ശിവശങ്കര്‍ വ്യക്തിപരമായി അഴിമതിക്കാരനാണെന്ന് കരുതുന്നവര്‍ കുറവാണ്. എങ്കില്‍ ആര്‍ക്ക് വേണ്ടിയാണ് അദ്ദേഹം അഴിമതി നടത്തുന്നത്? അതാണ് ഏജന്‍സികള്‍ അന്വേഷിക്കുന്നത്.

അന്വേഷണം മുറുകുമ്പോള്‍ ഇരട്ട ചങ്കന്‍മാര്‍ അകത്താകുമെന്ന് ചില ബി ജെപി നേതാക്കള്‍ അടക്കം പറയുന്നുണ്ട്. സി പി എമ്മിലെ നവീകരണ പോരാളികളും ഇത്തരമൊരു സംഗയം ഉന്നയിക്കുന്നുണ്ട്. ചിലപ്പോള്‍ വിശ്വ പ്രസിദ്ധരായ മക്കളും ചട്ടിയിലായെന്നിരിക്കും.

കൊച്ചി എന്‍ ഐ എ ഓഫീസില്‍ നിന്ന് പാന്‍സിന്റെ പോക്കറ്റില്‍ കൈയുമിട്ട് വിശ്വപൗരനായി ഇറങ്ങിപ്പോന്ന ശിവശങ്കര്‍ ഇങ്ങനെയാണ് മുന്നോട്ടു പോകുന്നതെങ്കില്‍ നേരം ഇരുട്ടി വെളുക്കും മുമ്പ് ഉള്ളെയിലിരിക്കും.

ചാര്‍ട്ടേഡ് അക്കൗണ്ടന്റായി ഒരാളുടെ പേരിലാണ് തിരുവനന്തപുരം എസ് ബി ഐ സിറ്റി ശാഖയില്‍ സ്വപ്നക്ക് ഒപ്പം ലോക്കര്‍ എടുത്തത്. ഇയാളെ കുറിച്ചുള്ള വ്യക്തമായ വിവരം കസ്റ്റംസിന് ലഭിച്ചിട്ടുണ്ട്. തിരുവനന്തപുരം കിഴക്കേക്കോട്ട സ്വദേശിയാണ് ഈ വ്യക്തി, എന്നാല്‍ അദ്ദേഹത്തിന്റെ പേര് കസ്റ്റംസ് ഔദ്യോഗികമായി പുറത്തു വിട്ടിട്ടില്ല. ഈ വ്യക്തി സ്വപ്നയുടെ ബന്ധുവല്ലങ്കിലും ശിവശങ്കരന്റെ വിശ്വസ്തനാണ്.

ചാര്‍ട്ടേഡ് അക്കൗണ്ടിനെയും കസ്റ്റംസ് പ്രതിചേര്‍ക്കും. അങ്ങനെ ചെയ്യാനാണ് തീരുമാനം എന്നറിയുന്നു. സ്വപ്നയുടെ ലോക്കറില്‍ നിന്നും കിട്ടിയത് 120 കിലോ സ്വര്‍ണവും 65 ലക്ഷം രൂപയുമാണ്. ഇത് കള്ളപ്പണമാണെന്ന് കസ്റ്റംസും എന്‍ ഐ എയും കണ്ടെത്തിയിട്ടുണ്ട്. കള്ളപ്പണം സൂക്ഷിക്കുന്നത് നിയമവിരുദ്ധമാണ്. അത് സ്വപ്നയുടെയും ചാര്‍ട്ടേഡ് അക്കൗണ്ടന്റിന്റെയും പേരിലാകുമ്പോള്‍ മറുപടി പറഞ്ഞേ തീരൂ.

സ്വപ്നയെ ശിവശങ്കര്‍ പൂര്‍ണമായി വിശ്വസിച്ചിരുന്നില്ലെന്നാണ് ലഭിക്കുന്ന വിവരം. അതു കൊണ്ടാണ് അദ്ദേഹത്തിന്റെ വിശ്വസ്തനായ ചാര്‍ട്ടേഡ് അക്കൗണ്ടനെ കൂടി ലോക്കറില്‍ ഉടമസ്ഥാവകാശം നല്‍കിയത്. സ്വപ്ന ലോക്കര്‍ ഓപ്പറേറ്റ് ചെയ്താല്‍ അക്കാര്യം അറിയാനുള്ള സംവിധാനവും ശിവശങ്കറിന് ഉണ്ടായിരുന്നു. വിവിധ ബാങ്കുകളില്‍ ശിവശങ്കറിന് വിശ്വസ്തര്‍ ഉണ്ട്. മുഖ്യമന്ത്രിയുടെ ഓഫീസില്‍ ജോലി ചെയ്യുന്നതു കൊണ്ട് അദ്ദേഹത്തിന് ഇത് നിഷ്പ്രയാസം സാധിച്ചിരുന്നു.

സംസ്ഥാനത്തിന്റെ വിവിധ ഭാഗങ്ങളിലുള്ള ബാങ്കുകളില്‍ സ്വപ്നക്ക് അക്കൗണ്ട് ഉണ്ടോ എന്നും എന്‍ ഐ എ പരിശോധിക്കുന്നുണ്ട്. ചില സഹകരണ ബാങ്കുകളില്‍ സ്വപ്നക്ക് ലോക്കറുകള്‍ ഉണ്ടെന്നാണ് വിവരം. അതിലെല്ലാം ശിവശങ്കറിന് പിടുത്തമുണ്ടെന്നാണ് വിവരം. എല്ലാം ചേരുമ്പോള്‍ ജനത്തിന്റെ കണ്ണു തള്ളുമെന്നാണ് ലഭിക്കുന്ന വിവരം.

രാഷ്ട്രീയ നേതാക്കളുടെ സ്വത്ത് കൈകാര്യം ചെയ്യുന്നത് മറ്റു പലരുമാണ്. എന്നാല്‍ ചരിത്രത്തില്‍ ആദ്യമായാണ് ഒരു ഐ. എ എസുകാരന്‍ രാഷ്ട്രീയക്കാരുടെ ബിനാമിയാവുന്നത്. കേരളത്തിലെ സീനിയര്‍ ഉദ്യോഗസ്ഥര്‍ പുതിയ പ്രവണത കണ്ട് അത്ഭുതപ്പെടുകയാണ്.

എന്നാല്‍ കസ്റ്റംസിന്റെയും എന്‍ ഐ എയുടെയും ചോദ്യം ചെയ്യലിന് പരിമിതികള്‍ ഏറെയാണ്. കേരള പോലീസ് ആയിരുന്നെങ്കില്‍ പള്ളയില്‍ കുത്തി സത്യം പറയിച്ചേനെ. ഇത് എങ്ങനെ പ്രതിരോധിക്കാം എന്നാണ് അന്വേഷണ ഏജന്‍സികള്‍ ചിന്തിക്കുന്നത്.