ഓപ്പറേഷന്‍ നൈറ്റ് റൈഡര്‍ക്ക് മോഷണക്കേസ് തെളിയിക്കാന്‍ തുമ്പായത് ചവച്ചു തുപ്പിയ ഒരു ബസ് ടിക്കറ്റ്!
നൂറനാട്ടെ പല വീടുകളിലും മോഷണമോ ശ്രമങ്ങളോ നടന്നതോടെ ഓപ്പറേഷന്‍ നൈറ്റ് റൈഡര്‍ പൊലീസ് സംഘം വീടുകളുടെ പരിസരങ്ങളാകെ അരിച്ചുപെറുക്കി. ഒരു വര്‍ഷം മുന്‍പാണ് സംഭവം. ചവച്ചു തുപ്പിയ ഒരു കടലാസ് കഷണത്തില്‍ പൊലീസ് കണ്ണുടക്കി. ഒരു ബസ് ടിക്കറ്റാണ്. കഷണങ്ങളായിരിക്കുന്നു. എന്നാലും പോലീസ് സംഘം അത് കൈയ്യിലെടുത്തു. എല്ലാം ചേര്‍ത്തു വച്ച് ഉണക്കിയെടുത്തു.
അത് ഏത് ഡിപ്പോയിലെ ടിക്കറ്റാണെന്ന് കണ്ടെത്താനായി ശ്രമം. കൊല്ലം കെഎസ്ആര്‍ടിസി ഡിപ്പോയിലെ ടിക്കറ്റാണ് അതെന്ന് കണ്ടെത്തി. ഉടന്‍ അവിടെ പോയി തിരക്കി. ഫെയര്‍ സ്റ്റേജും മറ്റും നോക്കി ഏതു റൂട്ടിലുള്ള ബസെന്നും കണ്ടക്ടറെയും കണ്ടെത്തി. കൊല്ലം തേവലക്കര സ്വദേശിയാണു കണ്ടക്ടര്‍. ചിറ്റുമലയില്‍നിന്നുള്ള ഫെയര്‍ സ്റ്റേജ് നിരക്കാണ് ആ ടിക്കറ്റിലുള്ളത്. രാത്രി വൈകിയുള്ള ബസാണ്.
ആ റൂട്ടിലെ സിസിടിവി ദൃശ്യങ്ങള്‍ പരമാവധി ശേഖരിച്ചു പരിശോധന ആരംഭിച്ചു. ചിറ്റുമലയില്‍നിന്നു രണ്ടുപേര്‍ കയറുന്നത് ഒരു ക്യാമറയില്‍ പതിഞ്ഞിട്ടുണ്ട്. ദൃശ്യങ്ങളിലെ സൂചനകള്‍ വച്ചു പ്രാദേശികമായി അന്വേഷിച്ചപ്പോള്‍ പ്രദേശത്തു വാടകയ്ക്കു താമസിക്കുന്ന രണ്ടുപേരെപ്പറ്റി പൊലീസിനു വിവരം കിട്ടി. വീട്ടുടമയുടെ മകന്‍ കഞ്ചാവു കേസില്‍ ജയിലില്‍ കിടന്നിട്ടുമുണ്ട്. അന്വേഷണ സംഘത്തിലെ ചിലര്‍ അടുത്തു തന്നെ താമസിച്ചു നിരീക്ഷണം തുടങ്ങി.
ഒരു ദിവസം പാരിപ്പള്ളിയില്‍ ഒരു മോഷണം കഴിഞ്ഞെത്തിയ കള്ളന്‍മാരെ ചിറ്റുമലയില്‍ കാത്തിരുന്ന പൊലീസ് സംഘം തൊണ്ടിയോടെ പിടിച്ചു.രാത്രി വണ്ടികളില്‍ കയറി സൈഡ് സീറ്റിലിരുന്നു യാത്ര ചെയ്തു റോഡരികിലെ അടഞ്ഞു കിടക്കുന്ന വീടുകള്‍ ശ്രദ്ധിച്ചായിരുന്നു മോഷ്ടാക്കളുടെ ഓപ്പറേഷന്‍. പറ്റിയ വീടു കണ്ടാല്‍ അടുത്ത സ്റ്റോപ്പില്‍ ഇറങ്ങും. തിരിച്ചു നടന്നു 'പണി' നടത്തിയ ശേഷം അവിടെത്തന്നെ വിശ്രമിക്കും. പുലര്‍ച്ചെ എഴുന്നേറ്റു കുറച്ചു നടന്നു മറ്റേതെങ്കിലും സ്റ്റോപ്പില്‍നിന്നു ബസില്‍ കയറി മടങ്ങും. അങ്ങനെയാണു നൂറനാട്ടെ വീടുകളിലും എത്തിയത്. പക്ഷേ, ആ കടിച്ചു മുറിച്ച ടിക്കറ്റ് മുറികൂടി അവരെ ഒറ്റുകയായിരുന്നു.
എണ്‍പതോളം വീടുകളില്‍ മോഷണ പരമ്പര നടത്തി അറസ്റ്റിലായ കുമാരപുരം താമല്ലാക്കല്‍ മാണിക്കേത്ത് വീട്ടില്‍ അജിത് തോമസിനെ(43) കസ്റ്റഡിയില്‍ ലഭിക്കണമെന്ന് ആവശ്യപ്പെട്ട് പൊലീസ് കോടതിയില്‍ അപേക്ഷ നല്‍കി. ഇയാള്‍ പിടികിട്ടാപ്പുള്ളിയാണെന്നും 2009-ല്‍ ഒരാളെ കുത്തിയ കേസില്‍ ജാമ്യം നേടിയ ശേഷം ഒളിവില്‍ കഴിയുകയായിരുന്നെന്നും പൊലീസ് അറിയിച്ചു. ആറു ദിവസം കസ്റ്റഡിയില്‍ വേണമെന്നു കാണിച്ചാണ് ഹരിപ്പാട് ജുഡീഷ്യല്‍ ഒന്നാം ക്ലാസ് മജിസ്‌ട്രേട്ട് കോടതിയില്‍ അപേക്ഷ നല്‍കിയത്.
https://www.facebook.com/Malayalivartha
