യു.ഡി.എഫ് മുസ്ലിം വര്‍ഗ്ഗീയ പാര്‍ട്ടികളുമായി ബന്ധം ഉറപ്പിക്കുന്നു; വെല്‍ഫര്‍ പാര്‍ട്ടിയുമായി ധാരണയില്‍ എത്തി; ജമാഅത്തെ ഇസ്ലാമിയുമായി ചര്‍ച്ച; സി.പി.എമ്മിന് മൃദുഹിന്ദുത്വ നിലപാടെന്ന് വെല്‍ഫയര്‍ പാര്‍ട്ടി; തദ്ദേശ തിരഞ്ഞെടുപ്പിലെ സഖ്യം വരുന്ന നിയമസഭാ തിരഞ്ഞെടുപ്പിലും തുടരും
ന്യൂനപക്ഷത്തിന്റെ വോട്ട് ഉറപ്പിക്കാന്‍ മുസ്ലിം ലീഗിന്റെ മാത്രം സഹായം പോരെന്ന വിലയിരുത്തലിലാണ് യു.ഡി.എഫ്. ഈ കണക്ക് കൂട്ടലിലാണ് ആദ്യം വെന്‍ഫര്‍ പാര്‍ട്ടിയുമായും ഇപ്പോള്‍ മുസ്ലിം തീവ്ര നിലപാടുകള്‍ സ്വീകരിക്കുന്ന ജമാഅത്തെ ഇസ്ലാമി നേതാക്കളുമായി യു.ഡി.എഫ് നേതാക്കള്‍ ചര്‍ച്ച നടത്തുന്നത്. വെല്‍ഫയര്‍ പാര്‍ട്ടിയുമായി സഖ്യത്തിലെത്താന്‍ മുന്‍കൈയെടുത്ത് മുസ്ലിംലീഗാണെങ്കില്‍ ജമാഅത്തെ പാര്‍ട്ടികളുമായിയുള്ള സഖ്യത്തിന് നേതൃത്വം നല്‍കുന്നത് കോണ്‍ഗ്രസ് നേരിട്ടാണ്.
അതെ സമയം യുഡിഎഫ് സഖ്യത്തില്‍ നിലപാട് വ്യക്തമാക്കി വെല്‍ഫയര്‍ പാര്‍ട്ടി രംഗത്ത് വന്നു. വെല്‍ഫയര്‍ പാര്‍ട്ടിയുടെ പേരില്‍ പാര്‍ട്ടി ചിഹ്നത്തില്‍ തന്നെ യുഡിഎഫ് സ്ഥാനാര്‍ത്ഥികളായി മത്സരിക്കും. സംസ്ഥാനത്തെ എല്ലാ തദ്ദേശ ഭരണ സ്ഥാപനങ്ങളിലേക്കും ഇത്തവണ വെല്‍ഫയര്‍ പാര്‍ട്ടിക്ക് സ്ഥാനാര്‍ത്ഥികളുണ്ടാവും. യുഡിഎഫുമായി നേതൃതല ചര്‍ച്ചകള്‍ പൂര്‍ത്തിയാക്കിയെന്നും വെല്‍ഫയര്‍ പാര്‍ട്ടി സംസ്ഥാന പ്രസിഡണ്ട് ഹമീദ് വാണിയമ്പലം പറഞ്ഞു.
സിപിഎം വെല്‍ഫയര്‍ പാര്‍ട്ടിയില്‍ തീവ്രവാദം ആരോപിക്കുന്നത് മൃദുഹിന്ദുത്വ നിലപാടുകൊണ്ടാണെന്നും ഹമീദ് വാണിയമ്പലം ഏഷ്യാനെറ്റ് ന്യൂസിനോട് പറഞ്ഞു. കഴിഞ്ഞ തദ്ദേശഭരണ തെരെഞ്ഞെടുപ്പില്‍ സിപിഎം നേതാക്കളുമായാണ് ചര്‍ച്ച നത്തിയതും ധാരണയുണ്ടാക്കിയതും. അഴിമതിക്കാരെന്ന് പറഞ്ഞവരെ കൂടെകൂട്ടുന്നു, കൂടെ കൂട്ടിയവരെ തീവ്രവാദികളെന്ന് ആരോപിക്കുന്നു. ഇക്കാര്യത്തിലൊന്നും സത്യസന്ധമായ നിലപാട് സ്വീകരിക്കുന്നവരല്ല സിപിഎം നേതാക്കളെന്നും അദ്ദേഹം പറഞ്ഞു.
യുഡിഎഫുമായി ധാരണയുള്ള തദ്ദേശഭരണ സ്ഥാപനങ്ങളില്‍ മുന്നണിയായും അല്ലാത്ത സ്ഥലങ്ങളില്‍ ഒറ്റയ്ക്കും സംസ്ഥാനത്തെ എല്ലാ തദ്ദേശഭരണ സ്ഥാപനങ്ങളിലേക്കും ഇത്തവണ വെല്‍ഫയര്‍ പാര്‍ട്ടിക്ക് സ്ഥാനാര്‍ത്ഥികളുണ്ടാവും. യുഡിഎഫുമായുണ്ടാക്കിയ ഈ നീക്കുപോക്ക് തദ്ദേശഭരണ തെരെഞ്ഞെടുപ്പിലേക്ക് മാത്രമുള്ളതാണെന്നും നിയമസഭ തെരെഞ്ഞെടുപ്പില്‍ അപ്പോഴത്തെ രാഷ്ട്രീയ സാഹചര്യം പരിഗണിച്ച് പാര്‍ട്ടി നിലപാട് എടുക്കുമെന്നും ഹമീദ് വാണിയമ്പലം പറഞ്ഞു.
അതെ സമയം ജമാഅത്തെ ഇസ്ലാമിയുടെ നേതാക്കളുമായി രഹസ്യകൂടിക്കാഴ്ച്ച നടത്തിയത് യുഡിഎഫ് കണ്‍വീനര്‍ എംഎം ഹസനാണ്. ഇന്നലെ നിലമ്പൂരിലെത്തിയാണ് ജമാഅത്ത് നേതാവായ എം ഐ അബ്ദുള്‍ അസീസുമായി ഹസന്‍ കൂടിക്കാഴ്ച്ച നടത്തിയത്. തദ്ദേശഭരണ തെരെഞ്ഞെടുപ്പില്‍ ജമാ അത്തെ ഇസ്ലാമിയുടെ രാഷ്ട്രീയ സംഘടനയായ വെല്‍ഫെയര്‍ പാര്‍ട്ടി യുഡിഎഫുമായി ധാരണയുണ്ടാക്കാന്‍ തീരുമാനിച്ചിട്ടുണ്ട്. ഈ സാഹചര്യത്തിലായിരുന്നു ഹസന്‍ അബ്ദുള്‍ അസീസ് കൂടിക്കാഴ്ച്ചയെന്നാണ് പുറത്തുവരുന്നത്. നേതാക്കളെ അറിയിക്കാതെയായിരുന്നു ഹസന്റെ കൂടിക്കാഴ്ച്ച. ഇക്കാര്യങ്ങള്‍ മാധ്യമങ്ങള്‍ ചോദിച്ചെങ്കിലും കൂടുതല്‍ വിശദീകരിക്കാന്‍ ഹസന്‍ തയാറായില്ല. തെരഞ്ഞെടുപ്പില്‍ മുസ്ലീം മതതീവ്ര ശക്തികളുടെ പിന്തുണയോടെ ജയിച്ചു വരാനുള്ള ശ്രമമാണ് കോണ്‍ഗ്രസ് നടത്തുന്നത്.
മുസ്ലിം ലീഗിന്റെ നേതൃത്വത്തില്‍ വെല്‍ഫയര്‍ പാര്‍ട്ടിയുമായി തെരഞ്ഞെടുപ്പ് സഖ്യത്തിലേര്‍പ്പെടാനുള്ള നീക്കത്തിനെതിരെ കോണ്‍ഗ്രസില്‍ നേരത്തെ എതിര്‍പ്പുയര്‍ന്നിരുന്നു. ഇതെല്ലാം തള്ളിയാണ് ജമാ അത്തെ ഇസ്ലാമിയുമായി കോണ്‍ഗ്രസ് കൂട്ടുകൂടുന്നത്. ലീഗ് വെല്‍ഫെയര്‍ പാര്‍ട്ടി സഖ്യത്തിനെതിരെ സമസ്തയും ശക്തമായ എതിര്‍പ്പുമായി രംഗത്തുവന്നിരുന്നു. വെല്‍ഫയര്‍ പാര്‍ട്ടിയുമായി സഖ്യമുണ്ടാക്കുന്നതിനെതിരെ പ്രാദേശികതലങ്ങളിലും കോണ്‍ഗ്രസ് നേതാക്കള്‍ എതിര്‍പ്പുയര്‍ത്തിയിരുന്നു.
കഴിഞ്ഞ നിയമസഭാ തിരഞ്ഞെടുപ്പില്‍ മുസ്ലിം ന്യുനപക്ഷത്തിന്റെ വോട്ടുകളില്‍ നല്ലൊരു ശതമാനം സി.പി.എമ്മിന് ലഭിച്ചിരുന്നു. ഇത് അവരെ അധികാരത്തില്‍ വരുന്നതിന് സഹായിച്ചു. എന്നാല്‍ കഴിഞ്ഞ പാര്‍ലമെന്റ് തിരഞ്ഞെടുപ്പില്‍ രാഹുല്‍ ഗാന്ധി വയനാട് മത്സരിച്ചത് മുസ്ലിം സംഘടനകളുടെ നിലപാട് മാറ്റി. ഇതിനെ തുടര്‍ന്ന് യു.ഡി.എഫിന് നഷ്ടമായ മുസ്ലിം ന്യുനപക്ഷ വോട്ടുകള്‍ തിരികെ കോണ്‍ഗ്രസിനെ തന്നെ ലഭിക്കുകയും ചെയ്തിയിരുന്നു.
https://www.facebook.com/Malayalivartha
