ഈ യന്ത്രമുണ്ടെങ്കില്‍ തെങ്ങില്‍ ഇരുന്നു കയറാം, ഒരുക്കിയത് ഐടിഐ അധ്യാപകന്‍!
ചേറൂര്‍ മലബാര്‍ ഐടിഐയില്‍ അധ്യാപകനായ കര്‍ഷകന്‍ കൂടിയായ ഇസ്മായില്‍ കോവിഡ് കാലത്ത് ജോലിയില്ലാതായതോടെയാണ് ഒരു തെങ്ങുകയറ്റയന്ത്രം നിര്‍മ്മിക്കുന്നതിനെകുറിച്ച് ആലോചിച്ചത്. ഒരാഴ്ച കൊണ്ട് നിര്‍മാണം പൂര്‍ത്തിയായി. 800 രൂപ മാത്രമാണ് നിര്‍മാണച്ചെലവ്. സ്വന്തം ആവശ്യത്തിനായാണ് ഉപകരണം നിര്‍മിച്ചത്.
പുതിയ യന്ത്രം നാട്ടില്‍ പരിചിതമായ തെങ്ങുകയറ്റ യന്ത്രത്തില്‍നിന്നും വ്യത്യസ്തമാണ്. ഏത് വളഞ്ഞ തെങ്ങിലും അനായാസം കയറാമെന്നതും ഇരുന്ന് കയറാനും തേങ്ങയിടാനും പറ്റുമെന്നതുമാണ് പ്രത്യേകത. ഇരിക്കാന്‍ സൗകര്യമുള്ളതായതിനാല്‍ തെങ്ങില്‍ കയറുന്നതിനിടെ ക്ഷീണമുണ്ടായാല്‍ ഇരുന്ന് വിശ്രമിക്കാനുമാകും. യന്ത്രം എളുപ്പത്തില്‍ തെങ്ങില്‍ സ്ഥാപിക്കാനും തിരിച്ചെടുക്കാനും സാധിക്കും.
സുരക്ഷിതത്വം, വിലക്കുറവ്, ഏതു ഭാഗത്തേക്കും തിരിയാനുള്ള സൗകര്യം എന്നിവ പ്രത്യേകതയാണെന്ന് ഇസ്മായില്‍ പറഞ്ഞു. പുതിയ യന്ത്രം ഉപയോഗിച്ച് തേങ്ങയിടുന്നതിന്റെ വിഡിയോ കൃഷിഭവന്‍ ഗ്രൂപ്പില്‍ പ്രചരിച്ചതോടെ ഒട്ടേറെപ്പേര്‍ യന്ത്രം നിര്‍മിച്ചു നല്‍കണമെന്ന ആവശ്യവുമായി എത്തിയിട്ടുണ്ട്. ഇനി ഏത് വലുപ്പത്തിലുമുള്ള മറ്റു മരങ്ങളിലും കയറാന്‍ പറ്റുന്ന യന്ത്രം തയാറാക്കാനുള്ള ഒരുക്കത്തിലാണ് ഇസ്മായില്‍. കൊടിഞ്ഞി പയ്യോളിയിലെ കാരാംകുണ്ടില്‍ അബ്ദുറഹ്മാന്‍ ഹാജിയുടെ മകനാണ് 35- കാരനായ ഇസ്മായില്‍.
https://www.facebook.com/Malayalivartha
