ഇന്ത്യക്ക് ഏറ്റവും ഉയര്‍ന്ന സ്ഥാനം; ചബഹാറില്‍ ഞെട്ടിച്ച് അമേരിക്ക; ചങ്കയാല്‍ ഇങ്ങനെ വേണം; ഇന്ത്യയുടെ ത്രിരാഷ്ട്ര കരാര്‍ യാഥാര്‍ത്ഥ്യത്തിലേക്ക്; പാകിസ്ഥാനും ചൈനയും നോക്കു കുത്തികള്‍; ഇത് ഇന്ത്യയുടെ ഏറ്റവും മികച്ച നയതന്ത്ര വിജയം
28 OCTOBER 2020 04:44 PM IST
മലയാളി വാര്‍ത്ത
ഇറാനു മേലുള്ള അമേരിക്കന്‍ ഉപരോധം എല്ലാവര്‍ക്കും അറിയുന്നതാണ്. എന്നാല്‍ മുഴുവന്‍ ഇറാനു മേലും ഉപരോധം നിലനില്‍ക്കെ ഇന്ത്യക്ക് മാത്രം ഇളവുകള്‍ നല്‍കാന്‍ ഒരുങ്ങുകയാണ് അമേരിക്ക. ഇറാനിലെ ചബഹാര്‍ തുറമുഖം വികസിപ്പിക്കുന്നതിനുള്ള ഇന്ത്യന്‍ പദ്ധതിയെ 18 പ്രധാന ഇറാനിയന്‍ ബാങ്കുകള്‍ക്ക് യുഎസ് ഏര്‍പ്പെടുത്തിയ ഉപരോധം ബാധിക്കില്ലെന്ന് ട്രംപ് ഭരണകൂടം അവരുടെ ഇന്ത്യന്‍ പങ്കാളികളെ അറിയിക്കുകയുണ്ടായി. ഇതോടു കൂടി ഇന്ത്യ-യുഎസ് ബന്ധം പുതിയ ഉയരത്തിലെത്തുകയാണ് എന്ന് വ്യക്തമായിരിക്കുകയാണ്.
സണ്‍ഡേ എക്‌സ്പ്രസ് റിപ്പോര്‍ട്ട് അനുസരിച്ച് ചബഹാര്‍ തുറമുഖത്തിന്റെ വികസനം സംബന്ധിച്ച ഈ സന്ദേശം ഒക്ടോബര്‍ 12 ന് തന്നെ നയതന്ത്ര മാര്‍ഗങ്ങളിലൂടെ അമേരിക്ക ഇന്ത്യന്‍ സര്‍ക്കാരിനെ അറിയിച്ചിരുന്നു. ഇന്ത്യയും അമേരിക്കയും ഒപ്പു വച്ച ബെക്ക കരാറുമായി മുന്നോട്ട് പോകുന്നതിന് അനുബന്ധമായിട്ടാണ് അസാധാരണമായ ഈ ഒരു ഇളവ് ഇന്ത്യക്ക് ലഭിച്ചിരിക്കുന്നത് എന്ന് സവിശേഷ ശ്രദ്ധ ആകര്‍ഷിക്കുന്നതാണ്.ഒമാന്‍ ഉള്‍ക്കടലിലും ഹോര്‍മുസ് കടലിടുക്കിന്റെ പ്രവേശന കവാടത്തിലും സ്ഥിതിചെയ്യുന്നതിനാല്‍ ചബഹാര്‍ തുറമുഖത്തിന് ആഗോളപരമായി തന്നെ വലിയ പ്രാധാന്യമുണ്ട്. അതോടൊപ്പം ചബാഹര്‍ തുറമുഖം ഇന്ത്യയെ സംബന്ധിച്ചിടത്തോളം സവിശേഷ പ്രാധാന്യം അര്‍ഹിക്കുന്നതാണ്. ചൈന വികസിപ്പിച്ചുകൊണ്ടിരിക്കുന്ന ഗ്വാഡാര്‍ തുറമുഖത്തിന് വെറും കിലോമീറ്ററുകള്‍ക്ക് മാത്രം വ്യത്യാസം ഉള്ളതാണ് ചബഹാര്‍ തുറമുഖം. അങ്ങനെ, ചബഹാര്‍ തുറമുഖം വികസിപ്പിക്കുന്നതില്‍ ഏര്‍പ്പെടുന്നതിലൂടെ, ലോകത്തെ തന്നെ തന്ത്രപരമായി പ്രധാനപ്പെട്ട ഒരു പ്രദേശത്ത് ഇന്ത്യക്ക് സാന്നിധ്യമുണ്ടാകും. മാത്രമല്ല ഗ്വാഡാര്‍ തുറമുഖത്തെ ചൈനീസ് സംഭവവികാസങ്ങളെ സൂക്ഷ്മമായി നിരീക്ഷിക്കാനും ഇതിലൂടെ നമുക്ക് കഴിയും.
എന്നാല്‍ ഇറാന് മേല്‍ അമേരിക്ക തുടര്‍ച്ചയായി ഏര്‍പ്പെടുത്തി കൊണ്ടിരിക്കുന്ന ഉപരോധങ്ങള്‍ ഇന്ത്യയുടെ ചബഹാര്‍ താല്പര്യങ്ങള്ക്ക് തടസ്സം നില്‍ക്കുന്നതായിരുന്നു. എന്നാല്‍ വര്‍ധിച്ചു വരുന്ന ഇന്ത്യ അമേരിക്ക ബന്ധത്തിന്റെ തെളിവായി ഇന്ത്യയുടെ താല്പര്യങ്ങള്ക്ക് വേണ്ടി അമേരിക്ക അവരുടെ ഒരു പ്രഖ്യാപിത നിലപാടില്‍ ഭാഗികം ആയെങ്കിലും വെള്ളം ചേര്‍ക്കാന്‍ തയ്യാറായിരിക്കുകയാണ്. ഇറാനുമായി ബന്ധപ്പെടുന്ന എല്ലാ രാജ്യങ്ങളെയും അമേരിക്ക ശത്രു പക്ഷത്തു നിര്‍ത്തും എന്നതാണ് അത്.
ഇറാനെതിരെ ട്രംപ് ഭരണകൂടം കര്‍ശന നടപടിയെടുക്കുന്ന ഒരു സാഹചര്യത്തില്‍ ഇത് ഇന്ത്യയെ സംബന്ധിച്ചിടത്തോളം ഒരു വലിയ നയതന്ത്ര വിജയമായി തന്നെ കണക്കാക്കാനാകും, ഇറാനുമായി ബന്ധപ്പെട്ട് ഏതെങ്കിലും രാജ്യവുമായി അവര്‍ എന്തെങ്കിലും ഇളവ് നല്‍കിയാല്‍, യുഎസ്എയുമായി രാജ്യം വളരെ നല്ല ബന്ധം പുലര്‍ത്തുന്നു എന്ന് തന്നെയാണ് അതിനര്‍ത്ഥം. ഇറാനിലെ 18 പ്രധാന ബാങ്കുകള്‍ക്ക് യുഎസ് ട്രഷറി ഡിപ്പാര്‍ട്ട്‌മെന്റിന്റെ ഉപരോധത്തിന് ഒക്ടോബര്‍ എട്ടിന് ആരംഭിക്കുന്ന 45 ദിവസത്തെ കാലാവധിയുണ്ടായിരുന്നു, അതിനര്‍ത്ഥം എല്ലാ അമേരിക്കക്കാരല്ലാത്തവരും ഇറാനിയന്‍ ധനകാര്യ സ്ഥാപനങ്ങളുമായും മേഖലയുമായും എല്ലാവിധ ഇടപാടുകളും അവസാനിപ്പിക്കേണ്ടതുണ്ട്.
ഈ ഒരു സാഹചര്യത്തില്‍, യുഎസ്എ സര്‍ക്കാര്‍ ചബഹാര്‍ തുറമുഖത്ത് ഇന്ത്യന്‍ പദ്ധതിക്കായി ഇളവുകള്‍ നല്‍കുന്നത് ഇന്ത്യയുഎസ് ബന്ധത്തിലെ ഒരു സുപ്രധാനമായ ചുവടുവയ്പ്പ് തന്നെയാണ് . എന്നാല്‍, അതിലും പ്രധാനമായ കാര്യം, നവംബര്‍ 3 ന് നടക്കാനിരിക്കുന്ന തിരഞ്ഞെടുപ്പോടെ ട്രംപ് ഭരണകാലാവധി അവസാനിക്കുന്നതിന് തൊട്ടുമുമ്പ് ഇത് സംഭവിച്ചു എന്നതാണ്. ഇത് ഒരു പ്രധാന ഘടകമാണ്, കാരണം ട്രംപ് ഭരണകൂടം ഇറാനെ വളരെയധികം വിമര്‍ശിക്കുകയും അതിനെതിരെ നിരവധി കടുത്ത നടപടികള്‍ കൈക്കൊള്ളുകയും ചെയ്തിട്ടുണ്ട്, അതിനാല്‍, കാലാവധി അവസാനിക്കുന്നതിന് തൊട്ടു മുന്നേ ഇന്ത്യയ്ക്ക് ഇളവുകള്‍ നല്‍കുന്നത് ട്രംപ് ഭരണകൂടവും യുഎസ്എയും പൊതുവേ ഏഷ്യന്‍ മേഖലയില്‍ ഇന്ത്യക്ക് നല്‍കുന്ന ഉയര്‍ന്ന സ്ഥാനം വ്യക്തമാക്കുന്നു.
ന്യൂഡല്‍ഹിയും വാഷിംഗ്ടണും തമ്മിലുള്ള വര്‍ദ്ധിച്ചുവരുന്ന ജിയോസ്ട്രാറ്റജിക് വിന്യാസം കണക്കിലെടുക്കുമ്പോള്‍, അഫ്ഗാനിസ്ഥാനിലേക്ക് എത്താന്‍ പാകിസ്ഥാനെ മറികടക്കാന്‍ കഴിയുന്ന ഒരു തുറമുഖം ഇന്ത്യയിലുണ്ടെങ്കില്‍ അതിലൂടെ അമേരിക്കക്കും അങ്ങേയറ്റം പ്രയോജനം തന്നെയാണ്. അഫ്ഗാനിസ്ഥാന്‍ സര്‍ക്കാരും താലിബാനും തമ്മില്‍ സമാധാനം സ്ഥാപിക്കാന്‍ യുഎസ്എ ശ്രമിക്കുന്നതിനാല്‍ ഇത് കൂടുതല്‍ പ്രാധാന്യമര്‍ഹിക്കുന്നു. അഫ്ഗാനിസ്ഥാനില്‍ നിന്ന് പുറത്തുകടക്കാന്‍ യുഎസ്എ ശ്രമിക്കുന്നത് അവിടത്തെ സാഹചര്യം ഒരുപക്ഷെ കൂടുതല്‍ വഷളാക്കിയേക്കും, അത്തരം സാഹചര്യങ്ങളില്‍ യുഎസ്എയ്ക്ക് പാകിസ്ഥാനെ ആശ്രയിക്കാനാവില്ല എന്നത് തര്‍ക്കമറ്റതാണ്.
മറുവശത്ത് ഇന്ത്യയെ സംബന്ധിച്ചിടത്തോളം ഒരു ഉയര്‍ന്ന പ്രാധാന്യമുള്ള തുറമുഖം തന്നെയാണ് ചബഹാര്‍ , ഒന്നാമത്തെ കാരണം , ഇന്ത്യ തങ്ങള്‍ക്ക് തന്ത്രപരമായ പ്രാധാന്യമുള്ള എന്തെങ്കിലും ഒരു പദ്ധതി വികസിപ്പിക്കുന്നതിനായി മറ്റൊരു രാജ്യത്ത് നടത്തുന്ന ആദ്യത്തെ വലിയ നിക്ഷേപമാണിത് എന്നതാണ്. രണ്ട്, പാകിസ്ഥാനെ മറികടന്ന് അഫ്ഗാനിസ്ഥാനുമായും മധ്യേഷ്യയുമായും ബന്ധിപ്പിക്കുന്നതിന് ഇന്ത്യയ്ക്ക് ചബഹാറിലൂടെ അവസരമൊരുങ്ങുന്നു എന്നതാണ്. പാക്കിസ്ഥാന്റെ നിലപാടിനെക്കുറിച്ച് അമേരിക്കക്കാര്‍ക്ക് ഇപ്പോള്‍ വളരെ വ്യക്തതയുണ്ട്, അത് ചൈനയുടെ സ്വാധീന മേഖലയിലേക്ക് കൂടുതല്‍ വഴുതിവീഴുകയും പരാജയപ്പെട്ട രാജ്യമായി മാറുകയും ചെയ്യുമ്പോള്‍, അഫ്ഗാനിസ്ഥാനുമായുള്ള ബന്ധത്തിനായി പാകിസ്ഥാനെ ആശ്രയിക്കാന്‍ യുഎസ്എ ആഗ്രഹിക്കുന്നില്ല.
തുറമുഖത്തെ അഫ്ഗാനിസ്ഥാനുമായി ബന്ധിപ്പിക്കുന്ന ചബഹാര്‍ സഹീദാന്‍ റെയില്‍വേ പദ്ധതിയും ഇന്ത്യ വികസിപ്പിക്കുന്നു. അന്താരാഷ്ട്ര ഗതാഗത ഇടനാഴി വികസിപ്പിക്കുന്നതിനുള്ള ഇന്ത്യ, ഇറാന്, അഫ്ഗാനിസ്ഥാന്‍ എന്നീ രാജ്യങ്ങള്‍ തമ്മിലുള്ള ത്രിരാഷ്ട്ര കരാറിന്റെ ഭാഗമായാണ് ഇത് അംഗീകരിച്ചത്. ഇതോടു കൂടി ഇസ്ലാമാബാദിനെ ഇടപെടുത്താതെ മധ്യേഷ്യയില്‍ നിന്ന് പ്രകൃതിവാതകം എത്തിക്കുന്നതിനും ഈ തുറമുഖം പ്രയോജനപ്രദം ആകും. അതിനാല്‍, ഇറാന് ഉപരോധം ചബഹാര്‍ തുറമുഖത്തെ ഇന്ത്യന്‍ പദ്ധതികളെയും താല്‍പ്പര്യങ്ങളെയും ബാധിക്കില്ലെന്ന് വ്യക്തമാക്കുന്നതിലൂടെ, യുഎസ്എ ചബഹാറിലെ ഇന്ത്യന്‍ അഭിലാഷങ്ങള്‍ക്ക് വഴങ്ങിയിരിക്കുകയാണ്. ഇത് ഏഷ്യന്‍ മേഖലയില്‍ അമേരിക്ക ഇന്ത്യക്ക് നല്‍കുന്ന പ്രാധാന്യമാണ് വ്യക്തമാക്കുന്നത്.
മേഖലയില്‍ ശക്തരായ ഇന്ത്യ അമേരിക്കയുടെ താല്പര്യങ്ങള്ക്ക് അങ്ങേയറ്റം ഗുണം ചെയ്യുന്ന ഒരു സാനിധ്യം ആണെന്ന് പല വിശകലന വിദഗ്ധരും നേരത്തെ തന്നെ വ്യക്തമാക്കിയിട്ടുണ്ട് . അതിനാല്‍ തന്നെ ഇന്ത്യന്‍ താല്‍പര്യങ്ങള്‍ നടപ്പിലാക്കുന്നതില്‍ സാധ്യമായ എല്ലാ വിട്ടു വീഴ്ചകളും ചെയ്യും എന്ന് വ്യക്തമാക്കുന്ന നടപടിയാണ് ഇറാന്റെ കാര്യത്തില്‍ ചബഹാറില്‍ ഇന്ത്യക്ക് മാത്രം ഇളവ് നല്‍കുന്നതിലൂടെ അമേരിക്ക സ്വീകരിച്ചിരിക്കുന്നത്. കഴിഞ്ഞ ദിവസം ഒപ്പു വച്ച ബേക്ക കരാറിന്റെ കൂടെ പശ്ചാത്തലത്തില്‍ ഇത് അതി ശക്തമായ ഇന്ത്യ അമേരിക്ക സൈനിക, നയതന്ത്ര ബാന്ധവത്തെയാണ് കാണിക്കുന്നതെന്ന് തര്‍ക്കമറ്റ വസ്തുതയാണ്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെ ഫേസ്ബുക്ക് പേജ് LIKE ചെയ്യുക
https://www.facebook.com/Malayalivartha
https://www.facebook.com/Malayalivartha
