കരിപ്പൂര് കള്ളക്കടത്ത് കേസ് അന്വേഷണത്തിന് അനുമതി തേടി സി.ബി.ഐ; സംസ്ഥാന സര്ക്കാരിന് കത്ത് നല്കി; കേസ് അന്വേഷണം വൈകുന്നത് പ്രതികള് അവസരമാക്കുന്നു; സി.ബി.ഐക്കുള്ള പൊതു അനുമതി സംസ്ഥാന സര്ക്കാര് പിന്വലിച്ചതിന് ശേഷമുള്ള ആദ്യ സി.ബി.ഐ കേസ്
സി.ബി.ഐ അന്വേഷണത്തിനുള്ള പൊതു അനുമതി സംസ്ഥാന സര്ക്കാര് പിന്വലിച്ചതോടെ കരിപ്പൂര് കള്ളക്കടത്ത് കേസ് അന്വേഷണം വൈകുന്നു. ലൈഫ് മിഷന് കേസില് സംസ്ഥാന സര്ക്കാര് പ്രതിസന്ധിയിലായതിനെ തുടര്ന്ന് നേരിട്ട് കേസ് ഏറ്റെടുക്കുന്നതിനുള്ള അവകാശം സംസ്ഥാന സര്ക്കാര് സി.ബി.ഐയില് നിന്നും എടുത്ത് മാറ്റിയിരുന്നു. ഇതോടെ കരിപ്പൂരില് ഉന്നത കസ്റ്റംസ് ഉദ്യോഗസ്ഥര് ഉള്പ്പെട്ട കള്ളക്കടത്ത് കേസില് അന്വേഷണത്തിന് അനുമതി തേടി സിബിഐ സംസ്ഥാന സര്ക്കാരിന് കത്ത് നല്കി കാത്തിരിക്കേണ്ട അവസ്ഥയിലാണ്.
സിബിഐക്കുള്ള പൊതു അനുമതി സംസ്ഥാന സര്ക്കാര് പിന്വലിച്ചതിന് ശേഷമുള്ള ആദ്യ സിബിഐ കേസാണിത്. ഓരോ കേസിനും ഇപ്പോള് പ്രത്യേകം അനുമതി തേടേണ്ട ഗതികേടിലാണ് സിബിഐ ഇപ്പോള്. ഇതോടെ ഉന്നതതല ഗൂഢാലോചന വ്യക്തമായ കേസിന്റെ അന്വേഷണം വൈകുകയാണ്. ഇത് കേസ് അന്വേഷണത്തെ സാരമായി ബാധിക്കുമെന്നും സി.ബി.ഐ ഉദ്യോഗസ്ഥര് കരുതുന്നു.
രഹസ്യവിവരത്തിന്റെ അടിസ്ഥാനത്തില് സിബിഐയും ഡിആര്ഐയും കരിപ്പൂരില് മിന്നല് പരിശോധന നടത്തിയത്. കഴിഞ്ഞ ചൊവ്വാഴ്ച പുലര്ച്ചെ കസ്റ്റംസ് ഉദ്യോഗസ്ഥരുടെ സഹായത്തോടെ വന്തോതില് കള്ളക്കടത്ത് നടക്കുന്നു എന്നായിരുന്നു ആ രഹസ്യ വിവരം. ഷാര്ജയില് നിന്നുള്ള എയര് അറേബ്യ വിമാനം എത്തിയതിന് പിന്നാലെ വിമാനത്താവളത്തിലെ കസ്റ്റംസ് ഏരിയയില് നിന്ന് കണ്ടെടുത്തത് മൂന്നര ലക്ഷം രൂപയും 81 പവന് സ്വര്ണവും. ഇമിഗ്രേഷന് പരിശോധന കഴിഞ്ഞ് പുറത്തിറങ്ങിയ യാത്രക്കാരില് നിന്ന് കണ്ടെടുത്തത് ഒന്നേകാല്കോടി രൂപയുടെ സ്വര്ണവും സിഗരറ്റ് പാക്കറ്റുകളും.
സാധാരണ ഗതിയില് കേസെടുത്ത് കസ്റ്റംസ് ഉദ്യോഗസ്ഥര് ഉള്പ്പെടെയുള്ള പ്രതികളെ അറസ്റ്റ് ചെയ്യുന്ന നടപടികളിലേക്ക് സിബിഐ കടക്കേണ്ടതാണ്. എന്നാല് ഈ കേസില് അതിന് കഴിഞ്ഞില്ല. കേന്ദ്ര അന്വേഷണ ഏജന്സികളുമായുള്ള തര്ക്കങ്ങളെ തുടര്ന്ന് സിബിഐക്കുള്ള പൊതു അനുമതി കഴിഞ്ഞ നവംബറില് സംസ്ഥാന സര്ക്കാര് പിന്വലിച്ചതാണ് കാരണം.
നിലവില് ഒരോ കേസിനും പ്രത്യേകം പ്രത്യേകം അനുമതി തേടി സംസ്ഥാന സര്ക്കാരിനെ സമീപിക്കേണ്ട ഗതികേടിലാണ് സിബിഐ. കള്ളക്കടത്ത് കേസില് അന്വേഷണത്തിന് അനുമതിക്കായി ഉടന് ചീഫ് സെക്രട്ടറിക്ക് കത്ത് നല്കുമെന്ന് സിബിഐ വൃത്തങ്ങല് അറിയിച്ചു.ഈ അനുമതി ലഭിച്ചാലേ എഫ്ഐആര് രജിസ്റ്റര് ചെയ്യാനാകൂ.
സിബിഐ റിപ്പോര്ട്ടിനെ തുടര്ന്ന് നാല് കസ്റ്റംസ് ഉദ്യോഗസ്ഥരെ കസ്റ്റംസ് പ്രിവന്റീവ് കമീഷണറേറ്റ് സസ്പെന്ഡ് ചെയ്തിരിക്കുകയാണ്. സൂപ്രണ്ട് ഗണപതി പോറ്റി, ഇന്സ്പെക്ടര്മാരായ നരേഷ്, യോഗേഷ്, ഹെഡ് ഹവില്ദാര് ഫ്രാന്സിസ് എന്നിവരെയാണ് സസ്പെന്ഡ് ചെയ്തത്. ആഭ്യന്തര അന്വേഷണത്തിന് ശേഷം ഈ ഉദ്യോഗസ്ഥര്ക്കതിരെ കള്ളക്കടത്തിന് കേസെടുക്കാനാണ് കസ്റ്റംസിന്റെ തീരുമാനം.
സിബിഐയുടെ റെയ്ഡില് വിമാനത്താവളത്തില് ഡ്യൂട്ടിയിലുണ്ടായിരുന്ന കസ്റ്റംസ് ഉദ്യോഗസ്ഥരില്നിന്നും പിടിച്ച പണവും കൃത്യമായ പരിശോധന നടത്താതെ വിട്ട യാത്രക്കാരില് നിന്നുള്ള സ്വര്ണവുമടക്കം ഒരു കോടി രൂപയ്ക്കു മുകളില് വരും. കസ്റ്റംസ് ഉദ്യോഗസ്ഥരില് നിന്നും മൂന്ന് ലക്ഷം രൂപയോളം വിമാനത്താവളത്തില് പിടിച്ചു. ഇതിന് പുറമേ അവരുടെ വീടുകള് റെയ്ഡ് ചെയ്തതില് അഞ്ചുലക്ഷം രൂപയും കണ്ടെടുത്തു. കരിപ്പൂരിലെ രണ്ട് കസ്റ്റംസ് ഉദ്യോഗസ്ഥര്ക്കെതിരേ സി.ബി.ഐ. കേസ് രജിസ്റ്റര് ചെയ്തു. ഡ്യൂട്ടിയിലുണ്ടായിരുന്ന എല്ലാ കസ്റ്റംസ് ഉദ്യോഗസ്ഥരോടും വിശദമായ ചോദ്യം ചെയ്യലിനായി കൊച്ചി സി.ബി.ഐ. ഓഫീസിലെത്താന് നോട്ടീസ് നല്കും. പക്ഷേ ഇതിന് സര്ക്കാര് സി.ബി.ഐക്ക് കേസ് അന്വേഷിക്കാന് അനുമതി നല്കിയാലേ സാധിക്കു.
കേരളത്തില് ഏറ്റവും കൂടുതല് സ്വര്ണക്കള്ളക്കടത്ത് നടക്കുന്നത് കരിപ്പൂരിലെ അന്താരാഷ്ട്ര വിമാനത്താവളം വഴിയാണ്. ഉദ്യോഗസ്ഥരുടെ ഒത്താശ ഇതിനുണ്ടെന്ന് പേരുകള് സഹിതം സി.ബി.ഐ.ക്ക് രഹസ്യവിവരം ലഭിച്ചിരുന്നു. ഇതിന്റെ അടിസ്ഥാനത്തിലാണ് രണ്ടു ദിവസമുമ്പ് സി.ബി.ഐ ഉദ്യോഗസ്ഥര് മിന്നല് പരിശോധന നടത്തിയത്.
https://www.facebook.com/Malayalivartha