മുരളീധരന്റെ കലിപ്പ് മാറുന്നില്ല; നിയമസഭാ തിരഞ്ഞെടുപ്പ് പ്രചാരണത്തിന് ഇറങ്ങുക വടകരയില് മാത്രം; നിയമസഭാ തിരഞ്ഞെടുപ്പില് സ്വര്ണത്തിന്റെ മാറ്റ് കൂടുമെന്ന് കെ മുരളീധരന്; വടകര സീറ്റ് ആര്എംപിക്ക് നല്കുന്നത് യു.ഡി.എഫ് ചര്ച്ച ചെയ്യണമെന്നും ആവശ്യം
തദ്ദേശ തിരഞ്ഞെടുപ്പില് കോണ്ഗ്രസിനുണ്ടായ പരാജയത്തിന് ഉത്തരവാദികളായ നേതൃത്വം മാറണമെന്ന ആവശ്യമാണ് കെ. മുരളീധരന് ഉന്നയിക്കുന്നത്. ഹൈകമാന്റ് പ്രതിനിധികളുമായി ചര്ച്ച നടത്തി പ്രശ്നം ഡല്ഹിയില് എത്തി നില്ക്കുമ്പോഴും കെ. മുരളീധരന്റെ വാക്കുകളില് പാര്ട്ടി നേതാക്കള്ക്കെതിരെയുള്ള നിരസം വ്യക്തമാണ്. ഇന്ന് കോഴിക്കോട് മാധ്യമപ്രവര്ത്തകരോട് സംസാരിക്കുമ്പോഴും ഇത് വ്യക്തമാകുന്നുണ്ട്. വരുന്ന നിയമസഭാ തിരഞ്ഞെടുപ്പില് വടകരയിലെ ഏഴ് നിയമസഭാ മണ്ഡലത്തില് ഒഴികെ മറ്റെവിടെയും പ്രചരണത്തിന് പോകുന്നില്ലെന്നും ഉറച്ച തീരുമാനമാണെന്നും അതില് യാതൊരു മാറ്റവുമില്ലെന്നും മുരളീധരന് പറഞ്ഞു. തനിക്കൊരു ഉത്തരവാദിത്വവും വേണ്ടെന്നും ഒരു ഉത്തരവാദിത്വവും ഏറ്റെടുക്കില്ലെന്നും അദ്ദേഹം വ്യക്തമാക്കുകയും ചെയ്തു.
തദ്ദേശ തിരഞ്ഞെടുപ്പില് ആര്.എം.പിക്ക് സീറ്റ് നല്കുന്നതുമായി ബന്ധപ്പെട്ട് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രമനും കെ. മുരളീധരനും ഏറ്റുമുട്ടിയിരുന്നു. ഇത് തദ്ദേശ തിരഞ്ഞെടുപ്പ് ഫലത്തെ ബാധിക്കുകയും ചെയ്തു. ഇതാണ് പിന്നീട് മുല്ലപ്പള്ളിക്കെതിരെ കടുത്ത നിലപാട് സ്വീകരിക്കണമെന്ന ആവശ്യത്തിലേക്ക് കെ. മുരളീധരനെ കൊണ്ട് എത്തിച്ചത്. അതിനിടെ തദ്ദേശ തിരഞ്ഞെടുപ്പില് ആര്എംപി സഖ്യം യുഡിഎഫിന് ഗുണം ചെയ്തുവെന്നും മുരളീധരന് അഭിപ്രായപ്പെട്ടു. അതുകൊണ്ടു തന്നെ വടകര സീറ്റ് ആര്എംപിക്ക് നല്കുന്നത് തെറ്റില്ലെന്ന വാദമാണ് മുരളീധരന് ഉയര്ത്തുന്നത്. എന്നാല് യു.ഡി.എഫിന് പുറത്തുള്ളവര്ക്ക് സീറ്റ് നല്കുന്ന കാര്യം മുന്നണി ചര്ച്ച ചെയ്ത് തീരുമാനിക്കേണ്ടതാണെന്നും അദ്ദേഹം കൂട്ടിചേര്ത്തു.
ആര്എംപിയുമായുള്ള സഹകരണം വടകര മേഖലയില് യുഡിഎഫിന്റെ വിജയത്തില് കാര്യമായ സംഭാവന നല്കി. എല്ജെഡി പോയിട്ട് പോലും നാല് പഞ്ചായത്തുകളില് മൂന്ന് എണ്ണത്തിലും യുഡിഎഫിന്റെ ഭരണസമിതി വന്നു. പക്ഷേ, നിയമസഭ തിരഞ്ഞെടുപ്പിന്റെ കാര്യം തീരുമാനിക്കേണ്ടത് മുന്നണിക്കുള്ളിലെ ചര്ച്ചയിലൂടെയാണെന്നും അദ്ദേഹം പറഞ്ഞു.
തദ്ദേശ തിരഞ്ഞെടുപ്പില് തോറ്റു എന്നതിനാല് സംസ്ഥാനത്ത് കോണ്ഗ്രസ് ദുര്ബലമാണെന്ന് കരുതേണ്ട. നിയമസഭാ തിരഞ്ഞെടുപ്പില് സ്വര്ണത്തിന്റെ മാറ്റ് കൂടുമെന്നും മുരളീധരന് അഭിപ്രായപ്പെട്ടു. പുനസംഘടനയെക്കുറിച്ച് പറയേണ്ടതെല്ലാം പാര്ട്ടിയില് പറഞ്ഞിട്ടുണ്ട്. തീരുമാനമെടുക്കേണ്ടത് നേതൃത്വമാണ്. തിരഞ്ഞെടുപ്പ് ജയപരാജയങ്ങളുടെ ഉത്തരവാദിത്തം നേതൃത്വത്തിന് മാത്രമാണ്. ഗുണദോഷങ്ങളുടെ ഉത്തരവാദിത്വം അവര്ക്കാണ്. പാര്ട്ടിയില് പുതിയ പദവികള് ഒന്നും ഏറ്റെടുക്കാനില്ല. കെ പി സി സി അദ്ധ്യക്ഷന് മത്സരിക്കുമോ എന്ന് തീരുമാനിക്കേണ്ടത് പാര്ട്ടിയാണ്. മുല്ലപ്പളളി മത്സരിക്കാന് താത്പര്യം പ്രകടിപ്പിച്ചിട്ടുണ്ടോ എന്ന് അറിയില്ലെന്നും മുരളീ പറഞ്ഞു. അതെ സമയം ഡി.സി.സി പുനര് സംഘടിച്ചേ മതിയാകുവെന്ന നിലപാടില് ഹൈകമാന്റ് ഉറച്ചു നില്ക്കുന്നതായിയാണ് വിവരം.
https://www.facebook.com/Malayalivartha