ബിഹാറില്‍ 60കാരിക്ക്​ അഞ്ചുമിനിറ്റിനിടെ ലഭിച്ചത്​ രണ്ടു ഡോസ്​ വാക്​സിന്‍ കുത്തിവെപ്പ്​. ആദ്യം കുത്തിവെച്ചത്​ കോവിഷീല്‍ഡും രണ്ടാമത്​ കോവാക്​സിനും.

പട്​നയിലെ ഗ്രാമപ്രദേശത്തെ 60കാരിയായ സുനില ദേവിക്കാണ്​ ദുരനുഭവം. സ്​ത്രീ വീട്ടിലെത്തി കുടുംബാംഗങ്ങളോട്​ പറഞ്ഞപ്പോഴാണ്​ സംഭവം പുറത്തറിയുന്നത്​.

ഉടന്‍ തന്നെ ബന്ധുക്കള്‍ സ്​​ത്രീയുമായി ആശുപത്രിയിലെത്തി. തുടര്‍ന്ന്​ ആരോഗ്യവകുപ്പ്​ രണ്ടു നഴ്​സുമാര്‍ക്ക്​ കാരണം കാണിക്കല്‍ നോട്ടീസ്​ നല്‍കി.

ജൂണ്‍ 16നാണ്​ സംഭവം. ജൂണ്‍ 19​വരെ സുനില ഡോക്​ടര്‍മാരുടെ നിരീക്ഷത്തിലായിരിക്കും. വാക്​സിന്‍ സ്വീകരിച്ചതിന്​ ശേഷം സുനിലക്ക്​ കടുത്ത ക്ഷീണം അനുഭവപ്പെട്ടിരുന്നു.
ബെല്ലാര്‍ചക്ക്​ മിഡില്‍ സ്​കൂള്‍ വാക്​സിനേഷന്‍ സെന്‍ററില്‍നിന്ന്​ ആദ്യഡോസ്​ വാക്​സിന്‍ സ്വീകരിച്ചശേഷം സുനിലയോട്​ തൊട്ടടുത്ത മുറിയില്‍ വിശ്രമിക്കാനാവശ്യപ്പെട്ടിരുന്നു.

തുടര്‍ന്ന്​ അവര്‍ മറ്റൊരു നിരയില്‍ നില്‍ക്കുകയായിരുന്നു. അത്​ കോവാക്​സിന്‍ സ്വീകരിക്കുന്നവരുടെ വരിയായിരുന്നു. 'എനിക്ക്​ എങ്ങോട്ടുപോകണമെന്ന്​ അറിയില്ലായിരുന്നു. ചിലര്‍ എന്‍റെ അടുത്ത്​ വരികയും അടുത്ത ഡോസ്​ വാക്​സിന്‍ നല്‍കുകയും ചെയ്​തു.

അഞ്ചുമിനുട്ട്​ മുമ്ബ്​ എനിക്ക്​ മറ്റൊരു നഴ്​സ്​ വാക്​സിന്‍ നല്‍കിയെന്ന്​ പറ​ഞ്ഞെങ്കിലും കുത്തിവെപ്പെടുത്ത നഴ്​സ്​ കേട്ടില്ല' -സുനില പറഞ്ഞു. ഒരു കൈയില്‍ തന്നെയാണ്​ രണ്ടു ഡോസ്​ വാക്​സിന്‍ കുത്തിവെപ്പെടുത്തതെന്നും അവര്‍ കൂട്ടിച്ചേര്‍ത്തു.

ഇതോടെ സുനില വീട്ടിലെത്തി മകനോട്​ കാര്യം പറഞ്ഞു. തുടര്‍ന്ന്​ കുടുംബാംഗങ്ങളും സുഹൃത്തുക്കളും വാക്​സിനേഷന്‍ സെന്‍ററിലെത്തുകയായിരുന്നു.

സംഭവത്തില്‍ ആരോഗ്യ വകുപ്പ്​ പ്രതികരിക്കാന്‍ തയാറായിട്ടില്ല. ​അതേസമയം, രണ്ടു നഴ്സുമാര്‍ക്ക്​ കാരണം കാണിക്കല്‍ നോട്ടീസ്​ അയച്ച്‌​ വകുപ്പുതല അന്വേഷണം ആരംഭിച്ചതായാണ്​ വിവരം.