ഐ.പി.എല്ലിന്റെ ചൈനീസ് ബന്ധം; ബഹിഷ്‌കരിക്കുമെന്ന് ഒരു കൂട്ടര്‍; വിവോ ഐ.പി.എല്ലിന്റെ മുഖ്യ സ്‌പോണ്‍സറായി നിലനിര്‍ത്തി; ഐ.പി.എല്‍ മത്സരങ്ങള്‍ സെപ്റ്റംബര്‍ 19 മുതല്‍
ഐ.പി.എല്‍ 2020 സീസണ്‍ യു.എ.ഇയില്‍ ആരംഭിക്കുന്നതിനുള്ള തയാറെടുപ്പുകള്‍ യുദ്ധകാല അടിസ്ഥാനത്തില്‍ മുന്നോട്ട് കൊണ്ടുപോകുകയാണ് ബി.സി.സി.ഐ. സെപ്റ്റംബര്‍ 19 ന് ഐ.പി.എല്‍ മത്സരങ്ങള്‍ ആരംഭിക്കാനാണ് തീരുമാനം. ഇതിന് ഇന്നലെ ചേര്‍ന്ന ബി.സി.സി.ഐ- ഐ.പി.എല്‍ ഭരണസമിതികള്‍ അംഗീകാരം നല്‍കുകയും ചെയ്തു. ഇതിനിടെ മറ്റൊരു വിവാദം കൂടി കത്തികയറുന്നുണ്ട്. ഐ.പി.എല്ലിലെ മുഖ്യ സ്‌പോണ്‍സര്‍മാരായ വിവോക്കെതിരെയാണ് പ്രതിഷേധം ഉയരുന്നത്. ചൈനീസ് മൊബൈല്‍ കമ്പനിയാണ്. രാജ്യത്ത് ചൈന ബഹിഷ്‌കരണം ശക്തമാണെങ്കിലും പ്രധാന സ്‌പോണ്‍സര്‍മാരായി ചൈനീസ് മൊബൈല്‍ കമ്പനിയായ വിവോ തുടരും എന്നും ഭരണസമിതി തീരുമാനിച്ചിരുന്നു. ഇതാണ് വിവാദത്തിലേക്ക് നയിച്ചിരിക്കുന്നത്.
ഐപിഎല്‍ ഭരണസമിതിയുടെ തീരുമാനം വന്നതിന് തൊട്ടുപിന്നാലെ പ്രതിഷേധവുമായി രംഗത്തെത്തിയിരിക്കുകയാണ് ഒരു വിഭാഗം ആരാധകര്‍. ഐപിഎല്‍ ബഹിഷ്‌കരിക്കണം എന്ന ആവശ്യവുമായി സാമൂഹ്യമാധ്യമങ്ങളില്‍ ക്യാംപയിന്‍ ആരംഭിച്ച ഇക്കൂട്ടര്‍ ബൈക്കോട്ട് ഐ.പി.എല്‍ ഹാഗ്ടാകും ഇറക്കി. ഈ ഹാഷ്ടാഗ് ഇതിനോടകം വൈറലാക്കുകയും ചെയ്തു. വിവോ ഉള്‍പ്പടെയുള്ള എല്ലാ സ്‌പോണ്‍സര്‍മാരെയും നിലനിര്‍ത്താനാണ് ഐപിഎല്‍ ഭരണസമിതി തീരുമാനിച്ചത്. ടൈറ്റില്‍ സ്‌പോണ്‍സര്‍മാര്‍ എന്ന നിലയില്‍ 440 കോടി രൂപയാണ് വിവോ എല്ലാ വര്‍ഷവും ഐപിഎല്ലിന് കൈമാറുന്നത്. അഞ്ച് വര്‍ഷത്തെ ഈ കരാര്‍ 2022ലാണ് അവസാനിക്കുക. കൊവിഡ് മഹാമാരിക്കിടെ ചുരുങ്ങിയ സമയത്തിനുള്ളില്‍ പുതിയ സ്‌പോണ്‍സറെ കണ്ടെത്തുക ബിസിസിഐക്ക് വെല്ലുവിളിയായിരുന്നു. ഈ സാഹര്യത്തിലാണ് വിവോയെ തുടരാന്‍ ഐ.പി.എല്‍ ഭരണസമിതി അംഗീകാരം നല്‍കിയത്.
അതിര്‍ത്തിയിലെ സംഘര്‍ഷത്തെ തുടര്‍ന്നാണ് ഇന്ത്യ- ചൈന ബന്ധങ്ങള്‍ സംഘര്‍ഷഭരിതമാകുന്നത്. ബൈക്കോട്ട് ചൈന ക്യാമ്പനുകള്‍ ശക്തമാകുകയും ചൈനീസ് മൊബൈല്‍ ആപ്പുകള്‍ ഇന്ത്യ നിരോധിക്കുകയും ചെയ്തു. ഇതിന് പിന്നാലെ ഇന്ത്യയില്‍ നിരവധി കരാറുകളില്‍ നിന്നും ചൈനീസ് കമ്പനികളെ ഒഴിവാക്കി. ചൈനീസ് കമ്പനികളെയും ചൈനീസ് ഉല്‍പ്പന്നങ്ങളെയും ഒഴിവാക്കുന്നതിന് വേണ്ടി പ്രധാനമന്ത്രി നരേന്ദ്രമോദി ആത്മനിര്‍ഭര്‍ പദ്ധതിക്ക് തുടക്കം കുറിക്കുകയും ചെയ്തു. ഇങ്ങനെ ഇന്ത്യ ചൈനയെ ബഹിഷ്‌കരിക്കുന്നതിന് ഇടയിലാണ് ഒരു ചൈനീസ് കമ്പനി ഇന്ത്യയിലെ പ്രധാന കായിക മത്സരം സ്‌പോണ്‍സര്‍ ചെയ്യുന്നത്.
ഐപിഎല്‍ പതിമൂന്നാം സീസണ്‍ സെപ്റ്റംബര്‍ 19 മുതല്‍ നവംബര്‍ 10 വരെ യുഎഇയിലെ മൂന്ന് വേദികളിലായാണ് നടക്കുക. ദുബായ്, ഷാര്‍ജ, അബുദാബി എന്നിവയാണ് വേദികള്‍. ഫൈനല്‍ ഞായറാഴ്ച നടക്കാത്ത ആദ്യ സീസണ്‍ ആവും ഇത്. ഇത് രണ്ടാം തവണയാണ് യുഎഇ ഐപിഎല്ലിന് വേദിയാവുന്നത്. 2014ലെ പൊതു തെരഞ്ഞെടുപ്പ് സമയത്ത് ഐപിഎല്ലിലെ ആദ്യഘട്ടത്തില്‍ 20 മത്സരങ്ങള്‍ക്ക് യുഎഇ വേദിയായിരുന്നു.
https://www.facebook.com/Malayalivartha
