സീസണിലെ തങ്ങളുടെ ആദ്യമത്സരത്തില്‍ ചെന്നൈ സൂപ്പര്‍ കിങ്‌സിനെ 16 റണ്‍സിനു കീഴടക്കി രാജസ്ഥാന്‍ റോയല്‍സിന് വിജയം. നേരത്തെ സഞ്ജു സാംസണ്‍ (32 പന്തില്‍ 74), ക്യാപ്റ്റന്‍ സ്റ്റീവ് സ്മിത്ത് (47 പന്തില്‍ 69) എന്നിവരുടെ അര്‍ധസെഞ്ചുറികളുടെയും അവസാന ഓവറില്‍ ജോഫ്ര ആര്‍ച്ചറുടെ മിന്നല്‍ പ്രകടനത്തിന്റെയും ബലത്തില്‍ രാജസ്ഥാന്‍ റോയല്‍സ് നിശ്ചിത 20 ഓവറില്‍ 7 വിക്കറ്റ് നഷ്ടത്തില്‍ 216 റണ്‍സെടുത്തു.

ഇന്ത്യന്‍ പ്രിമിയര്‍ ലീഗിലെ മലയാളി 'വെടിക്കെട്ട്' തുടരുന്നു. കഴിഞ്ഞ ദിവസം റോയല്‍ ചാലഞ്ചേഴ്‌സ് ബാംഗ്ലൂരിനായി ദേവ്ദത്ത് പടിക്കലായിരുന്നു താരമെങ്കില്‍, ഇത്തവണ രാജസ്ഥാന്‍ റോയല്‍സിനായി സഞ്ജു സാംസണിന്റേതായിരുന്നു ഊഴം. തകര്‍ത്തടിച്ച സഞ്ജു സാംസണ്‍ (32 പന്തില്‍ 74), ക്യാപ്റ്റന്‍ സ്റ്റീവ് സ്മിത്ത് (47 പന്തില്‍ 69) എന്നിവരുടെ അര്‍ധസെഞ്ചുറികളുടെയും അവസാന ഓവറില്‍ ജോഫ്ര ആര്‍ച്ചറുടെ മിന്നല്‍ പ്രകടനത്തിന്റെയും ബലത്തില്‍ നിശ്ചിത 20 ഓവറില്‍ 7 വിക്കറ്റ് നഷ്ടത്തില്‍ രാജസ്ഥാന്‍ 216 റണ്‍സെടുത്തു. സഞ്ജു പുറത്തായശേഷം രാജസ്ഥാന്റെ റണ്‍നിരക്ക് കുത്തനെ ഇടിഞ്ഞെങ്കിലും അവസാന ഓവറില്‍ ആര്‍ച്ചറിന്റെ ആളിക്കത്തലാണ് സ്‌കോര്‍ 200 കടത്തിയത്.

ടോസ് നേടിയ ചെന്നൈ ക്യാപ്റ്റന്‍ എം.എസ്.ധോണി രാജസ്ഥാനെ ബാറ്റിങ്ങിന് അയക്കുകയായിരുന്നു. ഓപ്പണറായി ഇറങ്ങിയ അരങ്ങേറ്റക്കാരന്‍ യശസ്വി ജയ്സ്വാളിനെ (6 പന്തില്‍ 6) മൂന്നാം ഓവറില്‍ ദീപക് ചഹാര്‍ പുറത്താക്കിയെങ്കിലും, രണ്ടാം വിക്കറ്റില്‍ സ്മിത്തും സഞ്ജുവും ചേര്‍ന്ന് 121 റണ്‍സാണ് വാരിക്കൂട്ടിയത്. സ്പിന്നര്‍മാരായ പിയൂഷ് ചൗളയെയും രവീന്ദ്ര ജഡേജയേയും സഞ്ജു കണക്കിന് 'തല്ലി'. എട്ടാം ഓവറില്‍ മാത്രം 28 റണ്‍സാണ് ചൗള വഴങ്ങിയത്. ചെന്നൈയ്ക്കായി സാം കറന്‍ മൂന്നു വിക്കറ്റെടുത്തു.

സഞ്ജുവിനെ 12-ാം ഓവറില്‍ ലുങ്കി എന്‍ഗിഡിയുടെ പന്തില്‍ ദീപക് ചഹാര്‍ കയ്യിലൊതുക്കിയപ്പോള്‍ രാജസ്ഥാന്‍ സ്‌കോര്‍ 132-2 എന്ന നിലയിലായി. ഒരുസമയത്ത് 250 കടക്കുമെന്ന് തോന്നിച്ച രാജസ്ഥാനെ, പിന്നീട് ചെന്നൈ ബോളര്‍മാര്‍ വരിഞ്ഞുമുറുക്കി. ഒരറ്റത്ത് ക്യാപ്റ്റന്‍ സ്റ്റീവ് സ്മിത്ത് നിലയുറപ്പിച്ചപ്പോള്‍ മറുവശത്ത് വിക്കറ്റ് കൊഴിഞ്ഞതാണ് തിരിച്ചടിയായത്. സഞ്ജുവിന് പിന്നാലെവന്ന ഡേവിഡ് മില്ലര്‍ റണ്ണൊന്നുമെടുക്കാതെ മടങ്ങി. ഒരു പന്തുപോലും നേരിടാനാകാതെ മില്ലര്‍ റണ്ണൗട്ടായാണ് മടങ്ങിയത്. റോബിന്‍ ഉത്തപ്പയും (9 പന്തില്‍ 5) കാര്യമായ സംഭവന ചെയ്തില്ല. ടീമിലെ പുതുമുഖം രാഹുല്‍ ടെവാട്ടിയയെ (8 പന്തില്‍ 10) സാം കറന്‍ വിക്കറ്റിനു മുന്നില്‍ കുടുക്കി. അതേ ഓവറില്‍ തന്നെ റയാന്‍ പരാഗിനെയും (4 പന്തില്‍ 6) കറന്‍ ധോണിയുടെ കൈകളില്‍ എത്തിച്ചു.

217 റണ്‍സ് പിന്തുടര്‍ന്ന ചെന്നൈയുടെ ഇന്നിങ്‌സ് 20 ഓവറില്‍ 6 വിക്കറ്റ് നഷ്ടത്തില്‍ 200 റണ്‍സില്‍ അവസാനിച്ചു. ഫാഫ് ഡുപ്ലെസി (37 പന്തില്‍ 72), ഷെയ്ന്‍ വാട്സന്‍ (21 പന്തില്‍ 33) എന്നിവര്‍ ചെന്നൈയ്ക്കായി പൊരുതിയെങ്കിലും വിജയത്തീരത്ത് എത്തിക്കാനായില്ല. നാല് ഓവറില്‍ 37 റണ്‍സ് വിട്ടുകൊടുത്ത് മൂന്നു വിക്കറ്റെടുത്ത രാഹുല്‍ ടെവാട്ടിയ ആണ് ചെന്നൈയെ എറിഞ്ഞുവീഴ്ത്തിയത്. മുരളി വിജയ് (21 പന്തില്‍ 21), സാം കറന്‍ (6 പന്തില്‍ 17), ഋതുരാജ് ഗെയ്ക്വാദ് (പൂജ്യം), കേദാര്‍ ജാദവ് (16 പന്തില്‍ 22), എം.എസ്.ധോണി( 17 പന്തില്‍ പുറത്താകാതെ 29), രവീന്ദ്ര ജഡേജ (2 പന്തില്‍ പുറത്താകാതെ 1) എന്നിങ്ങനെയാണ് മറ്റു ചെന്നൈ ബാറ്റ്‌സ്മാന്മാരുടെ സ്‌കോറുകള്‍.