ഇന്ത്യൻ പ്രീമിയർ ലീഗ് 14ാം സീസണിന്റെ താരലേലത്തിന് ആരംഭം.... താരലേലത്തിൽ 292 ക്രിക്കറ്റർമാരാണു ഭാഗ്യപരീക്ഷണത്തിനായി എത്തുക...
ഐപിഎൽ 14–ാം സീസണിനു മുന്നോടിയായുള്ള താരലേലത്തിന് ചെന്നൈയിൽ തുടക്കം കുറിച്ചു. 164 ഇന്ത്യൻ താരങ്ങൾ ഉൾപ്പെടെ 292 പേരാണു മിനി ലേലത്തിൽ പങ്കെടുക്കുന്നത്. 8 ടീമുകളിലായി പരമാവധി 61 താരങ്ങൾക്ക് അവസരമുണ്ട്. വിദേശ താരങ്ങളിൽ നിന്ന് 22 പേർക്കാണു ടീമുകളുടെ വിളിയെത്തുന്നത്.
താരലേലത്തിനു മുന്നോടിയായി എട്ടു ടീമുകളും ചേർന്ന് 139 താരങ്ങളെയാണ് നിലനിർത്തിയത്. 57 താരങ്ങളെ റിലീസ് ചെയ്തിട്ടുണ്ട്. ചെന്നൈയിൽ പുരോഗമിക്കുന്ന ഇന്ത്യൻ പ്രീമിയർ ലീഗിന്റെ താരലേലത്തിൽ പഞ്ചാബ് കിങ്സാണ് ശ്രദ്ധാകേന്ദ്രം. ടീമുകൾക്ക് അനുവദിച്ച ആകെ ലേലത്തുകയുടെ 75 ശതമാനവും ചെലവിടണമെന്ന ബിസിസിഐ നിർദേശമാണു കിങ്സിനെ ശ്രദ്ധാകേന്ദ്രമാക്കുന്നത്.
ലേലത്തിൽ 53. 2 കോടി രൂപയുടെ വമ്പൻ ബജറ്റുമായെത്തുന്ന കിങ്സിനു 9 താരങ്ങൾക്കായി 31.7 കോടി നിർബന്ധമായും ചെലവിടേണ്ടിവരും. വൈകീട്ട് മൂന്നിനു ആരംഭിച്ച താരലേലത്തിൽ 292 ക്രിക്കറ്റർമാരാണു ഭാഗ്യപരീക്ഷണത്തിനെത്തുന്നത്.
ട്വന്റി20 ക്രിക്കറ്റ് എന്നതു ബാറ്റ്സ്മാൻമാരുടെ പറുദീസയാണെന്ന വിശേഷണമുണ്ടെങ്കിലും ഇത്തവണത്തെ മിനി ലേലത്തിൽ ബോളർമാർക്ക് ആവശ്യക്കാരേറുമെന്നാണ് വിലയിരുത്തൽ. നിലവിലെ ജേതാക്കളായ മുംബൈ ഇന്ത്യൻസ് തുടങ്ങി മലയാളി താരം സഞ്ജു സാംസൺ നായകനാകുന്ന രാജസ്ഥാൻ റോയൽസ് വരെയുള്ള മിക്ക ടീമുകളും ബോളിങ് യൂണിറ്റിന്റെ കരുത്ത് വർധിപ്പിക്കുന്നത്.
https://www.facebook.com/Malayalivartha