വെറ്ററന്‍ താരം വസീം ജാഫറിന്റെ തകർപ്പൻ ബാറ്റിങ്ങിൽ വിദര്‍ഭയ്ക്ക് കൂറ്റൻ സ്കോർ. ഇറാനി ട്രോഫിയില്‍ രണ്ടാം ദിവസത്തെ കളി അവസാനിക്കുമ്പോൾ വസിം ജാഫർ ട്രിപ്പിൾ സെഞ്ച്വറിയിലേക്ക് കുതിക്കുകയാണ്. 285 റൺസുമായി പുറത്താകാതെ നിൽക്കുന്ന ജാഫറിന്റെ ഒപ്പം 44 റണ്‍സുമായി അപൂര്‍വ വാങ്കഡേയാണ് ക്രീസില്‍. വിദര്‍ഭ 598/3 എന്ന നിലയിലാണ്.

ഇറാനി ട്രോഫിയിലെ ഒരു താരം നേടുന്ന ഏറ്റവും ഉയർന്ന സ്കോറാണ് ജാഫർ സ്വന്തമാക്കിയത്. 266 റൺസ് നേടിയ മുരളി വിജയുടെ റെക്കോർഡാണ് ജാഫർ തകർത്തത്. റെസ്റ്റ് ഓഫ് ഇന്ത്യ ബൗളർമാരെ ഫലപ്രദമായി നേരിട്ട ജാഫർ ഫസ്റ്റ് ക്ലാസ് ക്രിക്കറ്റിൽ 18000 റൺസ് നേടുന്ന താരവുമായി. ജാഫറിന്റെ എട്ടാമത്തെ ഇരട്ട സെഞ്ചുറിയാണിത്.

രണ്ടാം ദിനമായ ഇന്ന് സെഞ്ച്വറി നേടിയ ഗണേഷ് സതീഷിൻറെ വിക്കറ്റ് മാത്രമാണ് വിദര്‍ഭയ്ക്ക് നഷ്ടമായൊള്ളു. മൂന്നാം വിക്കറ്റിൽ ഗണേഷ് സതീഷുമായി ചേര്‍ന്ന് 289 റണ്‍സാണ് വസീം ജാഫര്‍ നേടിയത്.120 റണ്‍സ് നേടിയ സതീഷിനെ സിദ്ധാര്‍ത്ഥ് കൗൾ പുറത്താക്കി. അശ്വിനും ജയന്ത് യാദവും ഓരോ വിക്കറ്റ് നേടി.