നിദാഹസ് ത്രിരാഷ്ട്ര ടൂർണമെന്റിൽ ഇന്ന് ശ്രീലങ്ക ബംഗ്ലാദേശിനെ നേരിടും. വിജയിക്കുന്ന ടീം ഫൈനലിൽ പ്രവേശിക്കുമെന്നതിനാൽ ഇരു ടീമുകൾക്കും ഇന്നത്തെ മത്സരം നിർണായകമാണ്. നേരത്തെ ബംഗ്ലാദേശിനെ പരാജയപ്പെടുത്തി ഇന്ത്യ ഫൈനലിൽ സ്ഥാനം ഉറപ്പാക്കിയിരുന്നു.

മൂന്ന് മത്സരങ്ങള്‍ വീതം കളിച്ച ഇരു ടീമുകൾക്കും രണ്ട് പോയിന്റ് മാത്രമാണുള്ളത്. എന്നാൽ നേരത്തെ ഇരു ടീമുകളും ഏറ്റുമുട്ടിയപ്പോൾ ശ്രീലങ്കയെ തകർത്ത് ബംഗ്ലാദേശ് വിജയം സ്വന്തമാക്കിയിരുന്നു. ലങ്ക ഉയര്‍ത്തിയ 215 റണ്‍സ് വിജയലക്ഷ്യം അഞ്ച് വിക്കറ്റ് നഷ്ടത്തില്‍ ബംഗ്ലാദേശ് മറികടക്കുകയായിരുന്നു.

മികച്ച ഫോമിലുള്ള മുഷ്ഫിക്കര്‍ റഹിമിലാണ് ബംഗ്ലാദേശിന്റെ പ്രതീക്ഷ. നിർണായക മത്സരത്തിൽ ഓള്‍റൗണ്ടര്‍ ഷക്കീബ് അല്‍ ഹസന്‍ ബംഗ്ലാദേശ് നിരയില്‍ എത്തുമെന്നാണ് സൂചന. പരുക്കിനെ തുടര്‍ന്ന് ടൂര്‍ണമെന്റിന് തൊട്ടുമുന്‍പാണ് ഷക്കീബിനെ പുറത്താക്കിയത്.