ഇറാനി ട്രോഫിയിൽ വിദര്‍ഭയ്ക്ക് കൂറ്റൻ സ്കോർ. 702/5 എന്ന നിലയില്‍ നാലാം ദിവസം ബാറ്റിംഗ് പുനരാരംഭിച്ച വിദര്‍ഭ 7 വിക്കറ്റ് നഷ്ടത്തിൽ 800 റൺസിന് ഡിക്ലര്‍ ചെയ്തു. നാലാം ദിനം സെഞ്ച്വറി നേടിയ അപൂർവ വാങ്കഡേ 157 റണ്‍സുമായി പുറത്താകാതെ നിന്നു.

മറുപടി ബാറ്റിങ്ങിനിറങ്ങിയ റെസ്റ്റ് ഓഫ് ഇന്ത്യയുടെ തുടക്കം തകർച്ചയോടെയായിരുന്നു. ഒരു ഘട്ടത്തിൽ 98/6 എന്ന നിലയിലേക്ക് വീണ റെസ്റ്റ് ഓഫ് ഇന്ത്യയെ ഹനുമന വിഹാരി-ജയന്ത് യാദവ് സഖ്യം കരകയറ്റുകയായിരുന്നു. നാലാം ദിവസം അവസാനിക്കുമ്പോള്‍ റെസ്റ്റ് ഓഫ് ഇന്ത്യ 236/6 എന്ന നിലയിലാണ്.

റെസ്റ്റ് ഓഫ് ഇന്ത്യയ്ക്ക് വേണ്ടി വിഹാരി 81 റണ്‍സുമായും ജയന്ത് യാദവ് 62 റണ്‍സും നേടി ക്രീസിലുണ്ട്. പൃഥ്വി 51 റണ്‍സ് നേടി പുറത്തായി. വിദര്‍ഭയ്ക്ക് വേണ്ടി നാല് വിക്കറ്റ് നേടി രജനീഷ് ഗുര്‍ബാനി മികച്ച പ്രകടനം നടത്തി.