ഇംഗ്ലണ്ടിനെതിരായ ആദ്യ ടെസ്റ്റിൽ ന്യൂസീലൻഡ് മികച്ച നിലയിൽ. മഴ മൂലം രണ്ടാം ദിനം നേരത്തെ കളി അവസാനിച്ചപ്പോൾ നാല് വിക്കറ്റ് നഷ്ടത്തിൽ 229 റൺസ് എന്ന നിലയിലാണ് ന്യൂസീലൻഡ്. ഇതോടെ ഒന്നാം ഇന്നിംഗ്‌സിൽ ന്യൂസിലൻഡിന് 171 റൺസിന്റെ ലീഡായി.

ന്യൂസീലൻഡ് നായകന്റെ സെഞ്ചുറിയാണ് രണ്ടാം ദിവസത്തെ സവിശേഷത. കരിയറിലെ പതിനെട്ടാം സെഞ്ച്വറി നേടിയ കെയിന്‍ വില്യംസണ്‍ ന്യൂസിലൻഡിന് വേണ്ടി ഏറ്റവും അധികം ടെസ്റ്റ് സെഞ്ച്വറി നേടിയ താരമായി മാറി. രണ്ടാം ദിവസം 91 റണ്‍സിൽ നിന്നും ബാറ്റിംഗ് ആരംഭിച്ച വില്യംസണ്‍ വേഗത്തിൽ ശതകം പൂർത്തിയാക്കി.

എന്നാൽ സെഞ്ച്വറി നേടി അധികം വൈകാതെ വില്യംസണിനെ ജെയിംസ് ആന്‍ഡേഴ്സണ്‍ പുറത്താക്കി. 2010ല്‍ ഇന്ത്യയ്ക്കെതിരെ അരങ്ങേറ്റം കുറിച്ച വില്യംസണ്‍ 114 ഇന്നിംഗ്സുകളില്‍ നിന്നാണ് ഈ ചരിത്ര നേട്ടം സ്വന്തമാക്കിയത്.