ഐപിഎല്ലിൽ ഇന്ന് നടന്ന ആദ്യ മത്സരത്തിൽ കിംഗ്സ് ഇലവൻ പഞ്ചാബിന് ആറ് വിക്കറ്റ് ജയം. ഡൽഹിയുടെ 167 റൺസ് എന്ന ലക്ഷ്യം പിന്തുടർന്ന പഞ്ചാബ് നാല് വിക്കറ്റ് നഷ്ടത്തിൽ ലക്ഷ്യം കണ്ടു. ഐപിഎൽ ചരിത്രത്തിലെ വേഗമേറിയ അർദ്ധ സെഞ്ചുറി നേടിയ കെ എൽ രാഹുലിന്റെ ഇന്നിംഗ്സാണ് പഞ്ചാബിന് അനായാസ വിജയം സമ്മാനിച്ചത്.

14 പന്തിൽ 6 ബൗണ്ടറിയും നാലു സിക്സറുകളും അടങ്ങുന്നതായിരുന്നു രാഹുലിന്റെ ഇന്നിംഗ്സ്. കഴിഞ്ഞ വർഷം 15 പന്തിൽ 50 തികച്ച സുനിൽ നരെയെന്റെയും 2014ൽ 15 പന്തിൽ നിന്ന് തന്നെ 50 അടിച്ച യൂസഫ് പത്താന്റെയും റെക്കോർഡാണ് രാഹുൽ പഴങ്കഥയാക്കിയത്.

അർദ്ധ സെഞ്ചുറി നേടിയ കരുൺ നായരും മികച്ച ബാറ്റിംഗ് പ്രകടനം നടത്തി. ആദ്യം ബാറ്റ് ചെയ്ത ഡൽഹി, ക്യാപ്റ്റൻ ഗംഭീറിന്റെ അർദ്ധ സെഞ്ചുറിയുടെ മികവിൽ ഏഴ് വിക്കറ്റ് നഷ്ടത്തിൽ 166 റൺസ് നേടിയിരുന്നു.