അസ്സല്‍ നെയ്മറിനെ വെല്ലുന്ന വ്യാജനെയ്മര്‍!
ചെക്കന്‍ ബ്രസീലുകാരന്‍ തന്നെയാണ്. പേര് ഗബ്രിയേല്‍ ലൂക്കാസ്. വയസ്സ് 21.സാധാരണയായി ഉപയോഗിക്കുന്നത് ബ്രസീലിന്റെ മഞ്ഞനിറമുള്ള ഫുട്ബാള്‍ ജഴ്‌സി. അതെല്ലങ്കില്‍ പാരിസിലെ വിഖ്യാത ക്ലബ് പി.എസ്.ജിയുടേത്. അതില്‍ എഴുതിവച്ചിരിക്കുന്ന പേര് 'നെയ്മര്‍ ജൂനിയര്‍'. ഒരു കറുത്ത കണ്ണടയും ഉണ്ടാകും. അവന്‍ എവിടെപ്പോയാലും ഓട്ടോഗ്രാഫ് ഒപ്പിട്ടുവാങ്ങാനായി ഒരു നൂറു പേരെങ്കിലും കൂടും. ആരെയും പിണക്കാതെ ഒരു കള്ളച്ചിരിയോടെ അവന്‍ അതൊക്കെ ഒപ്പിട്ടുകൊടുക്കുകയും ചെയ്യും.
ഒരിക്കല്‍ ബ്രസീലിലെ ഏറ്റവും വലിയ പരസ്യക്കമ്പനി എഫ്.സി സാന്റോസിന്റെ പരിശീലനക്കളരിയില്‍ അവനെ കൂട്ടിക്കൊണ്ടുപോയി, ജഴ്‌സി അണിയിച്ചാണ് കൊണ്ടുപോയത്. നെയ്മര്‍ അപ്പോള്‍ അവിടെ പരിശീലനത്തില്‍ ഏര്‍പ്പെട്ടിരുന്ന സമയമായിരുന്നു. അവന്‍ അവിടെ എത്തിയപ്പോള്‍ വര്‍ഷങ്ങളോളം സാക്ഷാല്‍ നെയ്മര്‍ക്ക് ഒപ്പമുണ്ടായിരുന്നവര്‍ അത്ഭുതപ്പെട്ടു. ഇതില്‍ ഏതാണ് തങ്ങളുടെ നെയ്മര്‍, അസ്സല്‍ ഏത് അപരന്‍ ഏത് എന്ന് തിരിച്ചറിയാനാകാത്ത വിധം രണ്ടു നെയ്മര്‍മാര്‍. പക്ഷേ കാര്യമെന്തായാലും ശരിക്കുള്ള നെയ്മര്‍ക്ക് ചെക്കനെ അങ്ങ് പിടിച്ചു. അന്ന് മുതല്‍ അവര്‍ അടുത്ത കൂട്ടുകാരാണ്.
ഒരു പ്രമുഖ പരസ്യക്കമ്പനി ഒരു പടികൂടി മുന്നേറി. നെയ്മര്‍ക്ക് വേണ്ട പരസ്യ ചിത്രങ്ങളിലും സാഹസിക രംഗങ്ങളിലും അഭിനയിക്കാന്‍ അപരനെ അങ്ങ് നിയോഗിച്ചു. നെയ്മര്‍ ബാഴ്‌സലോണയില്‍ എത്തിയിട്ടും റിയോയില്‍ നിന്നുള്ള പരസ്യ വിഡിയോകള്‍ക്കൊന്നും ഒരു കുറവും വന്നില്ല. ഗബ്രിയേല്‍ ലൂക്കാസ് അഭിനയിച്ച് തകര്‍ക്കുകയും ചെയ്യുന്നു. എവിടെ ചെന്നാലും ഇപ്പോള്‍ ലൂക്കാസ് വി. ഐ.പി ആണ്. വിമാനത്താവളത്തിലും വന്‍കിട ഹോട്ടലുകളിലും ഒക്കെ പ്രത്യേക പരിഗണന. ചെക്കന്‍ അതൊക്കെ ശരിക്കും ആസ്വദിക്കുന്നു. എന്നാല്‍ ആളൊരു പാവമാണ്, സത്യസന്ധനും.
ഒരിക്കലും തനിക്ക് കിട്ടിയിരിക്കുന്ന ഭാഗ്യം ദുര്‍വ്വിനിയോഗം ചെയ്തിട്ടില്ല. അതുകൊണ്ടുതന്നെ ഡ്യൂപ് ആയി അഭിനയിക്കുന്നതോടൊപ്പം സാക്ഷാല്‍ നെയ്മറുടെ ഇഷ്ടക്കാരനായും കഴിയുന്നു.
https://www.facebook.com/Malayalivartha
