ദുബായിലെ ബുര്‍ജ് ഖലീഫ ടവറും റിയാദിലെ കിങ്ഡം സെന്ററും, ലോകകപ്പ് ഗ്രൂപ്പ് ഘട്ടത്തില്‍ ക്രൊയേഷ്യ അര്‍ജന്റീനയെ തോല്‍പ്പിച്ചതിനു പിന്നാലെ ക്രൊയേഷ്യന്‍ നിറമണിഞ്ഞിരുന്നു. അറബ് നാടുകളില്‍ എത്രയോ ആരാധകരുള്ള ലയണല്‍ മെസ്സിയുടെ ടീം തോറ്റിട്ടും അങ്ങനെയൊരു സന്തോഷത്തിനു കാരണം ഒരേയൊരാളായിരുന്നു ഇപ്പോഴത്തെ ക്രൊയേഷ്യന്‍ ടീം കോച്ച് സ്‌ലാറ്റ്‌കോ ഡാലിച്ച്. അറബ് ക്ലബുകളായ അല്‍ ഹിലാലിനെയും അല്‍ ഐനിനെയും ലീഗ്, വന്‍കരാ മല്‍സരങ്ങളില്‍ തുടരെ വിജയങ്ങളിലേക്കു നയിച്ച പരിശീലകനാണ് അദ്ദേഹം.

സൗദി ക്ലബുകളായ അല്‍ ഫൈസലിയെയും അല്‍ ഹിലാലിനെയും യുഎഇ ക്ലബായ അല്‍ ഐനെയുമാണ് ഡാലിച്ച് പരിശീലിപ്പിച്ചത്. യുഎഇ പ്രഫഷനല്‍ ലീഗില്‍ ഏറ്റവും മികച്ച റെക്കോര്‍ഡുള്ള പരിശീലകനാണ് ഡാലിച്ച്. ലോക റാങ്കിങില്‍ 335-ാം സ്ഥാനത്തു നിന്നിരുന്ന അല്‍ ഐനെ രണ്ടു വര്‍ഷം കൊണ്ട് അദ്ദേഹം എത്തിച്ചത് 122-ാം റാങ്കില്‍. 2016-ല്‍ ഡാലിച്ചിന്റെ പരിശീലനത്തില്‍ എഎഫ്‌സി ചാംപ്യന്‍സ് ലീഗിന്റെ ഫൈനലിലുമെത്തി ക്ലബ്.

ക്രൊയേഷേയന്‍ ടീം ഫൈനലിലെത്തിയതോടെ ഡാലിച്ചിന് ക്രൊയേഷ്യ കഴിഞ്ഞാല്‍ ഏറ്റവും കൂടുതല്‍ ആശംസാസന്ദേശങ്ങള്‍ എത്തുന്നത് അറബ് നാടുകളില്‍ നിന്നുമാണ്. അവയെല്ലാം ഡാലിച്ച് തന്റെ ട്വിറ്ററില്‍ പങ്കുവയ്ക്കുന്നുമുണ്ട്.

അല്‍ ഐനില്‍ നിന്നും ഡാലിച്ച് ക്രൊയേഷ്യയിലെത്തുന്നത് അപ്രതീക്ഷിതമായിട്ടാണ്. ലോകകപ്പിനു യോഗ്യത നേടാന്‍ ടീം വിഷമിച്ചതോടെ ക്രൊയേഷ്യന്‍ ഫുട്‌ബോള്‍ ഫെഡറേഷന്‍ അപ്പോഴത്തെ കോച്ച് ആന്റെ സാസിച്ചിനെ പുറത്താക്കി. തുടര്‍ന്ന് അവര്‍ രക്ഷകനെ കണ്ടത് ഡാലിച്ചിലായിരുന്നു. ടീം ലോകകപ്പിനു യോഗ്യത നേടിയാല്‍ മാത്രമേ കരാര്‍ ഒപ്പിടൂ എന്നായിരുന്നു അന്ന് ഡാലിച്ചിന്റെ വാക്കുകള്‍. യുക്രെയ്‌നെതിരെ 2-0 വിജയത്തോടെ തുടങ്ങിയ ഡാലിച്ചിന്റെ ടീം പിന്നീട് ഗ്രീസിനെ തോല്‍പ്പിച്ച് ലോകകപ്പിനു യോഗ്യത നേടി. ഡാലിച്ച് മൂന്നു വര്‍ഷത്തേക്ക് കരാര്‍ ഒപ്പിട്ടു. ശേഷം ചരിത്രം!

കയ്യില്‍ മാന്ത്രിക വടിയില്ല എന്നാണ് കരാര്‍ ഒപ്പിട്ടപ്പോള്‍ ഡാലിച്ച്, ഫെഡറേഷന്‍ പ്രസിഡന്റും ഇതിഹാസ താരവുമായ സൂകറിനോടു പറഞ്ഞത്. പക്ഷേ, കയ്യില്‍ ചൂരല്‍ വടിയുണ്ടെന്ന് ലോകകപ്പിലെ ആദ്യ ആഴ്ച തന്നെ ഡാലിച്ച് തെളിയിച്ചു. നൈജീരിയ്‌ക്കെതിരെ പകരക്കാരനായി ഇറങ്ങാന്‍ വിസമ്മതിച്ച എസി മിലാന്‍ സ്ട്രൈക്കര്‍ നിക്കോള കാലിനിച്ചിനെ തൊട്ടടുത്ത ദിവസം തന്നെ നാട്ടിലേക്കു പറഞ്ഞയച്ചു.

സഹപരിശീലകന്‍ വുകോജെവിച്ചിന്റേതായിരുന്നു അടുത്ത ഊഴം. ക്വാര്‍ട്ടറിലെ ഷൂട്ടൗട്ട് വിജയത്തിനു ശേഷം ഡിഫന്‍ഡര്‍ വിദയോടൊപ്പം 'യുക്രെയ്‌ന് മഹത്വം' എന്നു പറഞ്ഞ് റഷ്യയെ ചൊടിപ്പിച്ച വുകോജെവിച്ചിനെയും ഫെഡറേഷന്‍ തിരിച്ചു വിളിച്ചു. നാട്ടില്‍ ടിവിയില്‍ ഇരുന്ന് കളി കാണുന്ന കാലിനിച്ചും വുകോജെവിച്ചുമാകും ക്രൊയേഷ്യയുടെ ഈ മുന്നേറ്റത്തില്‍ സന്തോഷിക്കാത്ത രണ്ടേ രണ്ടു ക്രൊയേഷ്യക്കാര്‍!