തൃക്കരിപ്പൂര് വീണ്ടും സെവന്സ് ടൂര്ണമെന്റിന്റെ ആരവത്തിലേക്ക്
കാല്പ്പന്തുകളിയെ എന്നും നെഞ്ചേറ്റുന്ന തൃക്കരിപ്പൂരില് 16 പ്രമുഖ സെവന്സ് ടീമുകളെ പങ്കെടുപ്പിച്ചു ബീരിച്ചേരി എഎഫ്സി സംഘടിപ്പിക്കുന്ന സെവന്സ് ടൂര്ണമെന്റിനായി തൃക്കരിപ്പൂര് മിനി സ്റ്റേഡിയം ഒരുങ്ങി. നീണ്ട ഇടവേളക്ക് ശേഷം നടക്കുന്ന രാത്രികാല ഫുട്ബോളിന് നാളെയാണ് തുടക്കം. തൃക്കരിപ്പൂര് ഗവ. വൊക്കേഷണല് ഹയര് സെക്കന്ഡറി സ്കൂള് മിനി സ്റ്റേഡിയത്തില് ഒരുക്കിയിരിക്കുന്നത് 4000 പേര്ക്കിരിക്കാവുന്ന ഗാലറിയാണ്.
മലബാര് ഫുട്ബോള് അസോസിയേഷനുമായി സഹകരിച്ചാണ്, ബീരിച്ചേരി അല്ഹുദ ആര്ട്സ് ആന്ഡ് സ്പോര്ട്സ് ക്ലബ്ബിന്റെ പതിനെട്ടാം വാര്ഷികാഘോഷത്തിന്റെ ഭാഗമായി സംഘടിപ്പിക്കുന്ന ടൂര്ണമെന്റിലെ മത്സരങ്ങളെന്ന് ഭാരവാഹികള് പത്രസമ്മേളനത്തില് അറിയിച്ചു. എല്ലാ ദിവസവും രാത്രി 7.30-നാണ് മത്സരം ആരംഭിക്കുക.
ജേതാക്കള്ക്ക് ഒരുലക്ഷം രൂപ പ്രൈസ്മണിയും വി.പി.പി. മുഹമ്മദ് കുഞ്ഞി പട്ടേലര് സ്മാരക റോളിങ്ങ് ട്രോഫിയും വി.പി.പി. അബ്ദുല്ഖാദര് സ്മാരക സ്ഥിരം ട്രോഫിയും സമ്മാനിക്കപ്പെടുന്ന ടൂര്ണമെന്റിന്റെ ആദ്യ മത്സരത്തില് മുസാഫിര് എഫ്സി രാമന്തളി കാസര്ഗോഡ് മൊഗ്രാല് ബ്രദേഴ്സുമായി ഏറ്റുമുട്ടും. ഉദ്ഘാടന ചടങ്ങില് പ്രളയത്തില് വീട് നഷ്ടപ്പെട്ട കര്ണാടകത്തിലെ കുടകിലുള്ള പാവപ്പെട്ട കുടുംബത്തിന് വീടൊരുക്കുന്ന ഫണ്ടിലേക്ക് ഒന്നേകാല് ലക്ഷം രൂപ സംഭാവനയായി നല്കും. രണ്ടാഴ്ച നീണ്ടു നില്ക്കുന്ന മത്സരം 27ന് സമാപിക്കും.
ടൂര്ണമെന്റിന്റെ വിളംബര ജാഥ ഇന്ന് വൈകുന്നേരം നാലിന് നടക്കും. ബീരിച്ചേരി റെയില്വേ ഗേറ്റ് പരിസരത്ത് നിന്നും ആരംഭിച്ചു മിനിസ്റ്റേഡിയത്തില് സമാപിക്കും. പത്ര സമ്മേളനത്തില് ടൂര്ണമെന്റ് കമ്മിറ്റി ഭാരവാഹികളായ വി.പി.പി. ഷുഹൈബ്, യു.പി. ഫാസില്, യു.പി. ഷാജഹാന്, മര്സൂഖ് റഹ്മാന്, കെ.പി. നസീര്, വി.പി.യു. മുഹമ്മദ്, എന്. ഇസ്മായില് എന്നിവര് പങ്കെടുത്തു.
https://www.facebook.com/Malayalivartha