ക്രിസ്റ്റ്യാനോ റൊണാൾഡോ മാഞ്ചസ്റ്ററിൽ തിരിച്ചെത്തിയതിന് ശേഷം കളിക്കാരുടെ തീൻമേശയിലുണ്ടായ മാറ്റത്തെക്കുറിച്ച് വെളിപ്പെടുത്തിയിരിക്കുകയാണ് സഹതാരങ്ങളായ എറിക് ബെയ്ലിയും ലീ ഗ്രാന്റും. മികച്ച ശാരീരികക്ഷമത കാത്തുസൂക്ഷിക്കുന്ന ക്രിസ്റ്റ്യാനോയെ മാതൃകയാക്കി ഭക്ഷണശേഷമുള്ള ഡെസർട്ട് സഹതാരങ്ങൾ ഒഴിവാക്കിയെന്നും സൂപ്പർ താരത്തിന്റെ പ്ലേറ്റിൽ നോക്കിയാണ് മറ്റുള്ളവർ ഭക്ഷണം തെരഞ്ഞെടുക്കുന്നതെന്നും എറിക് ബെയ്ലി പറയുന്നു.

ക്രിസ്റ്റ്യാനോ യുവന്റസിൽ നിന്ന് മാഞ്ചസ്റ്ററിൽ എത്തിയതിന് ശേഷമുള്ള ആദ്യത്തെ പരിശീലന സെഷനിലാണ് സഹതാരങ്ങൾ പ്രിയതാരത്തിന്റെ ഭക്ഷണ രീതി പകർത്താൻ ശ്രമിച്ചത്. കാരിങ്ടൺ ബേസിലെ വാരാന്ത്യ പരിശീലനത്തിന് ശേഷം കളിക്കാരെല്ലാം ഭക്ഷണം കഴിക്കാനെത്തി. ഭക്ഷണത്തിന് ശേഷം ക്രിസ്റ്റ്യാനോ പുഡിങ് കഴിക്കുന്നില്ലെന്ന് കണ്ടതോടെയാണ് സഹതാരങ്ങളും അങ്ങനെ ചെയ്തത്. ഞങ്ങൾ ഡെസർട്ട് കഴിക്കുന്നത് നിർത്തിയിരിക്കുകയാണ്. ഉപേക്ഷിക്കുന്നതാണ് നല്ലതെന്നതിനാൽ ആരുമിപ്പോൾ‌ അത് കഴിക്കുന്നില്ല. ചില സമയത്ത് നമ്മൾ മാറേണ്ടി വരും.- ബെയ്ലി പറഞ്ഞു. ഏറെ കാലമായി ക്രിസ്റ്റ്യാനോ ഏറ്റവും മികച്ച താരമാണ്. എന്തുകൊണ്ടാണത് ? ആ ശരീരം. ശരീരത്തെ നമ്മൾ പരിചരിച്ചേ തീരൂ.

ഡിന്നർ സമയത്ത് നടന്ന ഒരു സംഭവം യുണൈറ്റഡ് ഗോൾകീപ്പർ ലീ ഗ്രാന്റും പങ്കുവയ്ക്കുന്നു. അന്നൊരു വെള്ളിയാഴ്ച രാത്രിയായിരുന്നു. ഞങ്ങളെല്ലാവരും ഹോട്ടലിലായിരുന്നു. വെള്ളിയാഴ്ച രാത്രികളിൽ ഭക്ഷണം കഴിച്ച ശേഷം മധുരം കഴിക്കാറുണ്ട്. ആപ്പിൾ ക്രംബിളോ ബ്രൗണിയും ക്രീമുമോ അങ്ങനെ എന്തെങ്കിലും കിട്ടും. എന്നാൽ ഒരു കളിക്കാരൻ പോലും ആപ്പിൾ ക്രംബിളും കസ്റ്റാർഡും തൊട്ടതേയില്ല. ബ്രൗണി എടുക്കാനും ഒരു കളിക്കാരനും പോയില്ല. എല്ലാവരും നിലത്തിരുന്നു. ക്രിസ്റ്റ്യാനോയുടെ പ്ലേറ്റിൽ എന്താണെന്ന് നോക്കാനായിരുന്നു ഒരാൾ എന്നോട് ചോദിച്ചത്. ‍

ഞങ്ങൾ അദ്ദേഹത്തിന്റെ പ്ലേറ്റിലേക്ക് നോക്കി. ഒരാൾക്ക് സങ്കൽപിക്കാവുന്നത്ര വൃത്തിയുള്ളതും ആരോഗ്യകരവുമായ പ്ലേറ്റായിരുന്നു അത്. ഒരു കളിക്കാരൻ പോലും ജങ്ക് ഫുഡ് കഴിക്കാൻ ധൈര്യം കാണിക്കാതിരുന്നത് എന്തുകൊണ്ടാണെന്ന് അപ്പോൾ ഞാൻ മനസിലാക്കി- ലീ ഗ്രാന്റ് പറഞ്ഞു. 20 ദശലക്ഷം യൂറോയ്ക്കാണ് കഴിഞ്ഞ ഓഗസ്റ്റിൽ ക്രിസ്റ്റ്യാനോ യുവന്റസ് വിട്ട് മാഞ്ചസ്റ്റർ യുണൈറ്റഡിലെത്തിയത്. രണ്ടാംവരവിൽ 13 മത്സരങ്ങളിൽ നിന്നായി താരം ഏഴ് ഗോൾ യുണൈറ്റഡിനു വേണ്ടി നേടി.