അന്താരാഷ്‌ട്ര ബോക്‌സിങ് അസോസിയേഷന്റെ ഏറ്റവും പുതിയ ലോക റാങ്കിങ്ങിൽ ഇന്ത്യൻ താരങ്ങൾക്ക് മിന്നും നേട്ടം.

വനിതകളുടെ 57 കിലോഗ്രാം വിഭാഗത്തിൽ ഇന്ത്യൻ താരം ജെയ്‌സ്മിൻ ലംബോറിയ ലോക ഒന്നാം നമ്പറിലേക്ക്. ഏഷ്യൻ ചാമ്പ്യന്മാരായ പ്രിയ ഗംഗാസ് (60 കിലോഗ്രാം), വിശ്വനാഥ് സുരേഷ് (50 കിലോഗ്രാം) എന്നിവർ തങ്ങളുടെ വിഭാഗങ്ങളിൽ ആദ്യ മൂന്ന് സ്ഥാനങ്ങളിൽ ഇടംനേടി.

വനിതാ വിഭാഗത്തിൽ 48 കിലോഗ്രാം വിഭാഗത്തിൽ മിനാക്ഷി ലോക ഒന്നാം നമ്പർ സ്ഥാനം നിലനിർത്തി. ഇതേ വിഭാഗത്തിൽ പ്രീതി മൂന്നാം സ്ഥാനത്തേക്ക് ഉയരുകയും ചെയ്തു. 70 കിലോഗ്രാം വിഭാഗത്തിൽ അരുന്ധതി ചൗധരി, 80 കിലോഗ്രാമിൽ പൂജ റാണി, പ്ലസ് 80 കിലോഗ്രാമിൽ നൂപുർ എന്നിവർ ലോക രണ്ടാം റാങ്ക് സ്വന്തമാക്കി.

ഇന്ത്യയുടെ പ്രമുഖ താരങ്ങളായ നിഖാത് സരീൻ (51 കിലോഗ്രാം), ലൗവ്ലിന ബോർഗോഹെയ്ൻ (75 കിലോഗ്രാം) എന്നിവർ ലോകത്തെ മുൻനിര താരങ്ങൾക്കിടയിലുള്ള തങ്ങളുടെ സ്ഥാനം നിലനിർത്തി.
‌
പുരുഷ വിഭാഗത്തിൽ, അന്താരാഷ്‌ട്ര തലത്തിൽ തുടർച്ചയായി മികച്ച പ്രകടനം പുറത്തെടുത്ത സച്ചിൻ സിവാച്ചും നരേന്ദർ ബെർവാളും ആദ്യ അഞ്ച് സ്ഥാനങ്ങളിൽ ഇടംനേടി. 70 കിലോഗ്രാം വിഭാഗത്തിൽ ഹിതേഷ് ഗുലിയ ആറാം റാങ്കും, 65 കിലോഗ്രാമിൽ അവിനാഷ് ജംവാൾ എട്ടാം റാങ്കും നിലനിർത്തി. ഇവർക്ക് പുറമെ 75 കിലോഗ്രാം വിഭാഗത്തിൽ ആകാശും, 85 കിലോഗ്രാം വിഭാഗത്തിൽ ലോകേഷും ആദ്യ പത്ത് റാങ്കുകാരുടെ പട്ടികയിൽ ഇടം പിടിച്ചു.