ഹോക്കി ലോകകപ്പില്‍ ചിരവൈരികളായ പാകിസ്ഥാനെ തകര്‍ത്ത് ഇന്ത്യ രണ്ടാം റൗണ്ടിലേക്ക്. നെതര്‍ലന്‍ഡ്‌സിലെ ആംസ്റ്റല്‍വീനിലെ വാഗനര്‍ സ്റ്റേഡിയത്തില്‍ നടന്ന മത്സരത്തില്‍ മൂന്നിനെതിരെ അഞ്ചു ഗോളുകള്‍ക്കാണ് (5-3) ഇന്ത്യ വിജയിച്ചത്.

ഈ വിജയത്തോടെ പൂള്‍ ഡി-യില്‍ നിന്ന് രണ്ടാം സ്ഥാനക്കാരായി ഇന്ത്യ നോക്കൗട്ട് റൗണ്ടില്‍ (പൂള്‍ ഇ) ഇടംനേടി. ഇന്ത്യയ്ക്കായി ക്യാപ്റ്റന്‍ ഹര്‍മന്‍പ്രീത് സിങ് (5', 21'), അഭിഷേക് (11', 24') എന്നിവര്‍ ഇരട്ടഗോളുകള്‍ നേടി. വൈസ് ക്യാപ്റ്റന്‍ ഹാര്‍ദിക് സിങ് 35-ാം മിനിറ്റില്‍ ലഭിച്ച പെനാല്‍ട്ടി സ്‌ട്രോക്ക് ലക്ഷ്യത്തിലെത്തിക്കുകയും ചെയ്തു.

പാകിസ്ഥാനായി ഹന്നന്‍ ഷാഹിദ് (22', 46') രണ്ടു ഗോളുകളും സുഫിയാന്‍ ഖാന്‍ (25') ഒരു ഗോളും കരസ്ഥമാക്കി. മൂന്നുകളികളില്‍ ആറു പോയിന്റുമായാണ് പുളില്‍ ഇന്ത്യ രണ്ടാം സ്ഥാനക്കാരായത്. മൂന്നു കളിയിലും ജയിച്ച ഇംഗ്ലണ്ട് ഒന്‍പത് പോയിന്റ് നേടി ഗ്രൂപ്പ് ജേതാക്കളായി. അവസാന മത്സരത്തില്‍ ഇംഗ്ലണ്ട് വെയില്‍സിനെ  പരാജയപ്പെടുത്തിയിരുന്നു

മത്സരത്തിന്റെ അഞ്ചാം മിനിറ്റില്‍ തന്നെ ഹര്‍മന്‍പ്രീതിന്റെ ഡ്രാഗ്-ഫ്‌ളിക്കിലൂടെ ഇന്ത്യ ലീഡ് എടുത്തു. തുടര്‍ന്ന് കൃത്യമായ ഇടവേളകളില്‍ ഗോളുകള്‍ നേടി ഇന്ത്യ മത്സരം വരുതിയിലാക്കി. രണ്ടാം ക്വാര്‍ട്ടറിലും മൂന്നാം ക്വാര്‍ട്ടറിലും പാകിസ്ഥാന്‍ തിരിച്ചുവരവിന് ശ്രമിച്ചെങ്കിലും ഇന്ത്യന്‍ പ്രതിരോധം ശക്തമായി നിലകൊള്ളുകയായിരുന്നു. ഈ തോല്‍വിയോടെ പാകിസ്താന്‍ ലോകകപ്പില്‍ നിന്ന് പുറത്തായി. കഴിഞ്ഞ പത്തുവര്‍ഷമായി പാകിസ്ഥാനെതിരെ തോല്‍വി അറിയാത്ത കുതിപ്പാണ് ഇന്ത്യ തുടരുന്നത്.