രാജ്യത്തൊട്ടാകെ എയര്പോര്ട്ട് മാതൃകയില് ബസ് പോര്ട്ടുകള് നിര്മ്മിക്കുന്നു; സംസ്ഥാനത്ത് തിരുവനന്തപുരം ഈഞ്ചക്കലില്
എല്ലാ സംസ്ഥാനങ്ങളിലും അത്യാധുനിക സൗകര്യങ്ങളോടുകൂടിയ ഒരു ബസ് പോര്ട്ടെങ്കിലും നിര്മിക്കുകയെന്ന കേന്ദ്രപദ്ധതിയുടെ ഭാഗമായി രാജ്യത്തെമ്പാടും എയര്പോര്ട്ട് മാതൃകയില് ബസ്പോര്ട്ടുകള് വരുന്നു. കേരളവും ഇതില് പങ്കാളിയാകും. തിരുവനന്തപുരം വിമാനത്താവളത്തിനടുത്ത് ഈഞ്ചക്കലില് ആണ് പോര്ട്ടല് വരുന്നത്. ദേശീയപാതയ്ക്കരികെ കെ.എസ്.ആര്.ടി.സി.യുടെ അഞ്ചരയേക്കര് സ്ഥലമാണ് ഇതിനായി വിനിയോഗിക്കുക.
കേന്ദ്ര പദ്ധതി പ്രകാരം നിലവിലെ ബസ് സ്റ്റേഷനുകള് വികസിപ്പിക്കുകയോ, പുതുതായി പോര്ട്ട് നിര്മിക്കുകയോ ചെയ്യാം. ബസ് ബേകള്, ടിക്കറ്റ് കൗണ്ടറുകള്, ഭക്ഷണശാലകള്, വിശ്രമകേന്ദ്രങ്ങള്, കുടിവെള്ളം, ശൗചാലയങ്ങള്, സ്വകാര്യ ബസുകള്ക്ക് പാര്ക്കിങ്ങിനുള്ള സൗകര്യം, സര്വീസ് കേന്ദ്രങ്ങള്ക്കുള്ള സൗകര്യം തുടങ്ങിയവ പോര്ട്ടിലുണ്ടാകണം.
സ്വകാര്യ ഓപ്പറേറ്റര്മാരുടെ ബസുകള്ക്കും പോര്ട്ടില് പ്രവേശനം അനുവദിക്കണമെന്നതാണ് പദ്ധതിയുടെ പ്രധാന വ്യവസ്ഥ. സ്വകാര്യ ഓപ്പറേറ്റര്മാര്ക്ക് ഇടംനല്കാത്ത പദ്ധതി പരിഗണിക്കില്ലെന്നും കേന്ദ്രം വ്യക്തമാക്കിയിട്ടുണ്ട്.
പദ്ധതിച്ചെലവിന്റെ 40 ശതമാനം കേന്ദ്രം വഹിക്കും. 60 ശതമാനം പൊതുസ്വകാര്യ പങ്കാളിത്തത്തോടെ കണ്ടെത്തണം. പണ ലഭ്യതയനുസരിച്ച് ഒന്നില്ക്കൂടുതല് താവളങ്ങള് സ്ഥാപിക്കാം.
https://www.facebook.com/Malayalivartha
