നൂഡില്‍സ് പ്രിയങ്കരരെ ഞെട്ടിപ്പിക്കുന്ന വാര്‍ത്തയാണ് ചൈനയില്‍ നിന്ന് പുറത്തു വരുന്നത്. ലോകത്തിലെ ഏറ്റവും കൂടുതല്‍ നീളമുള്ള നൂഡില്‍സ് നിര്‍മ്മിച്ചിരിക്കുകയാണ് ചൈന. കൈ ഉപയോഗിച്ച് നിര്‍മിച്ച ഈ നൂഡില്‍സിന്റെ നീളം 10,100 അടിയില്‍ കൂടുതലാണ്. ഇതിലൂടെ ഗിന്നസ് റെക്കോര്‍ഡും ചൈന സ്വന്തമാക്കിയിട്ടുണ്ട്.

2001ല്‍ ജപ്പാനില്‍ നിര്‍മിച്ച 1,800 അടി നീളമുള്ള നൂഡില്‍സിന്റെ റിക്കാര്‍ഡാണ് ചൈന പഴങ്കഥയാക്കിയത്. ചൈനയില്‍ ആഘോഷിക്കുന്ന പൊതു അവധി ദിനമായ സീനിയേഴ്‌സ് ഡേയിലാണ് നൂഡില്‍സ് നിര്‍മിച്ചത്. ചൈനയില്‍ ദീര്‍ഘായുസിന്റെ പ്രതീകമാണ് നൂഡില്‍സ്. നാല്‍പ്പത് കിലോഗ്രാം ഗോതമ്പു മാവ്, 26.8 ലിറ്റര്‍ വെള്ളം 0.6 ഗ്രാം ഉപ്പ് എന്നിവയുപയോഗിച്ച് നിര്‍മിച്ചിരിക്കുന്ന നൂഡില്‍സിന് 66 കിലോയിലധികം ഭാരമാണുള്ളത്.

സെന്‍ട്രല്‍ ചൈനയിലെ ഹെനാന്‍ പ്രവശ്യയില്‍ പതിനേഴു മണിക്കൂര്‍ നീണ്ട പരിശ്രമത്തിനു ശേഷമാണ് പാചകക്കാര്‍ ഈ നൂഡില്‍സ് നിര്‍മിച്ചത്.