2023നു​ മുമ്പ് പൂര്‍ണമായും ഇലക്​ട്രിക്​ യുഗത്തിലേക്ക്​ ചുവടുവെയ്ക്കുക എന്ന ലക്ഷ്യത്തോടെ ഇന്ത്യൻ വാഹനനിര്‍മാതാക്കള്‍ നിരവധി മോഡലുകൾ അവതരിപ്പിച്ചിരുന്നു. എല്ലാവരെയും ആകർഷിക്കുന്ന വാഹനങ്ങളുടെ കൂട്ടത്തിൽ ഒന്നാണ് ഒഖിനാവ പ്രെയ്​സ്​ എന്ന സ്​കൂട്ടർ.

പെട്രോള്‍ സ്​കൂട്ടർ അല്ലെങ്കിലും ഒഖിനാവക്ക് രൂപഭാവങ്ങളില്‍ പെട്രോള്‍ സ്​കൂട്ടറുകളുമായിട്ടാണ് സാമ്യം. ഫുള്‍ചാര്‍ജില്‍ 200 കിലോ മീറ്റര്‍ വരെ പുതിയ സ്​കൂട്ടറില്‍ നിന്ന്​ ലഭിക്കുമെന്നാണ്​ കമ്പനിയുടെ അവകാശവാദം. 59,899 രൂപക്കാവും ഒഖിനാവ ഇന്ത്യയില്‍ ലഭ്യമാവുക. 12 ഇഞ്ച്​ ടയറില്‍ മുന്നിലും പിന്നിലും ഡിസ്​ക്​ ബ്രേക്കുകള്‍ നല്‍കിയിരിക്കുന്നു.

അധിക സുരക്ഷക്കായി ഇ.എ.ബി.എസും ഉണ്ട്​. യാത്രസുഖത്തിനായി ടെലിസ്​കോപ്പിക്​ ഫോര്‍ക്ക്​ സസ്​പെന്‍ഷന്‍ മുന്‍വശത്തില്‍ ഡബിള്‍ ഷോക്ക്​ സസ്​പെന്‍ഷന്‍ പിന്നിലും നല്‍കിയിരിക്കുന്നു. ഇതിന്റെ എല്‍.ഇ.ഡി ഹെഡ്​ലൈറ്റ്​ ഡേ ടൈം റണ്ണിങ്​ ലൈറ്റുമാണ്​ സ്​കൂട്ടറില്‍ പെട്ടെന്ന്​ ശ്രദ്ധയാകര്‍ഷിക്കുക. ഹോണ്ട ഡിയോയുമായി ചെറുതല്ലാത്ത സാമ്യമുണ്ട്​ മുന്‍വശത്തിന്​ . 1000 വാട്ടി​ന്റെ ഇലക്​ട്രിക്​ മോട്ടോറാണ്​ സ്​കൂട്ടറിന്​ കരുത്ത്​ പകരുക. എന്‍ജിന്‍ പരാമവധി 3.35 ബി.എച്ച്‌​.പി കരുത്ത്​ നല്‍കും. 75 കിലോ മീറ്ററാണ്​ പരാമവധി വേഗം. രണ്ട്​ ബാറ്ററി ഒാപ്​ഷനുകളില്‍ വാഹനം ലഭ്യമാകും.

ആറ്​ മുതല്‍ എട്ട്​ മണിക്കൂറിനുള്ള ചാര്‍ജാവുന്ന വി.ആര്‍.എല്‍.എ ബാറ്ററിയും രണ്ട്​ മണിക്കൂറില്‍ ചാര്‍ജാവുന്ന ലിഥിയം-അയേണ്‍ ബാറ്റയും സ്​കൂട്ടറിനുണ്ട്​. സൈഡ്​ സ്​റ്റാന്‍ഡ്​ സെന്‍സര്‍, കീലെസ്സ്​ എന്‍ട്രി, ഫൈന്‍റ്​ മൈ സ്​കൂട്ടര്‍ തുടങ്ങിയ സുരക്ഷ സംവിധാനങ്ങളും സ്​കൂട്ടറില്‍ ഉള്‍പ്പെടുത്തിയിട്ടുണ്ട്​. 19.5 ലിറ്ററാണ്​ സീറ്റിനടിയിലെ സ്​റ്റോറേജ്​.