സംസ്ഥാനത്തുനിന്ന് 400 നഴ്‌സുമാർ നോർക്കാ റൂട്ട് വഴി ജോലിക്കായി ജർമനിയിലേക്ക് പോകുന്നു. ആദ്യഘട്ട അഭിമുഖം തിരുവനന്തപുരത്ത് 13 വരെ നടത്തും. നോർക്ക റൂട്ട്സും ജർമൻ ഫെഡറൽ എംപ്ലോയ്മെന്റ് ഏജൻസിയുമായി കഴിഞ്ഞ ഡിസംബറിൽ ഒപ്പുവെച്ച ട്രിപ്പിൾ വിൻ പ്രോഗ്രാമിന്റെ ഭാഗമായാണ് റിക്രൂട്ട്‌മെന്റ്. ഫെഡറൽ എംപ്ലോയ്‌മെന്റ് ഏജൻസിയിലെയും ജർമൻ ഏജൻസി ഫോർ ഇന്റർനാഷണൽ കോ-ഓപ്പറേഷനിലെയും ഉദ്യാഗസ്ഥർ നേരിട്ടെത്തിയാണ് അഭിമുഖം നടത്തുന്നത്.

തിരഞ്ഞെടുക്കപ്പെടുന്നവർക്ക് തിരുവനന്തപുരത്ത് ജർമൻ ഭാഷയിൽ ബി വൺ ലെവൽ സൗജന്യ പരിശീലനം നൽകും. ജർമനിയിലും ഭാഷാപരിശീലനം തുടരും. ജർമൻ രജിസ്ടേഷൻ നേടാനുള്ള പരിശീലനവും സൗജന്യമായി ലഭിക്കും.

ജർമൻ ഭാഷാ പ്രാവീണ്യമുള്ള നഴ്സുമാരുടെ റിക്രൂട്ട്മെന്റിനുള്ള ഫാസ്റ്റ്ട്രാക് പ്രോഗ്രാമിന്റെ ഭാഗമായി വാക് ഇൻ ഇന്റർവ്യൂ നടത്തും. ആറുമാസത്തിനുള്ളിൽ ബി വൺ, ബി ടു ലെവൽ സർട്ടിഫിക്കറ്റ് നേടിയ ഉദ്യോഗാർഥികൾക്ക് അഭിമുഖത്തിൽ പങ്കെടുക്കാം.ആദ്യ വർഷം അഞ്ഞൂറിലധികം നഴ്സുമാർക്ക് ജർമനിയിൽ നിയമനം ലഭിക്കുമെന്നാണ് പ്രതീക്ഷ. എൻജിനിയറിങ്, ഐ.ടി. ഹോട്ടൽ മാനേജ്മെന്റ് അടക്കമുള്ള മേഖകളിൽ ഒഴിവുകൾ പ്രതീക്ഷിക്കുന്നു.

ഈ മേഖലകളിൽ ഉദ്യോഗാർഥികളുടെ അക്കാദമിക നിലവാരം പരിശോധിക്കാനും ജർമനിയിലെ കരിക്കുലം തൊഴിൽ നിയമങ്ങൾ പരിചയപ്പെടുത്താനുമായി ജർമൻ ഉദ്യോഗസ്ഥരും സംസ്ഥാനത്തെ വിദഗ്ധരും ചേർന്ന് ഇൻഡോ ജർമൻ മൈഗ്രേഷൻ ഉന്നതതല ശില്പശാല നടത്തി.പത്രസമ്മേളനത്തിൽ നോർക്ക റൂട്ട്സ് വൈസ് ചെയർമാൻ പി.ശ്രീരാമകൃഷ്ണൻ 

ജർമൻ ഫെഡറൽ എംപ്ലോയ്മന്റ് ഏജൻസി ഇന്റർനാഷണൽ റിലേഷൻസ് കൺട്രി ഓഫീസർ സ്റ്റെഫാനി ഹാല, ജർമൻ ഏജൻസി ഫോർ ഇൻഷർനാഷണൽ കോ-ഓപ്പറേഷൻ പ്രോഗ്രാം മാനേജർ ഗുഡ്രുൻ നദോൽ, നോർക്ക റൂട്‌സ് സിഇഒ. കെ.ഹരികൃഷ്ണൻ നമ്പൂതിരി എന്നിവരും പങ്കെടുത്തു.