2023 ഏപ്രിലിൽ ആരംഭിക്കുന്ന 53 -മത് എൻ സി സി സ്പെഷ്യൽ എൻട്രി (നോൺ ടെക്‌നിക്കൽ) സ്‌കീം പ്രവേശനത്തിന് അപേക്ഷകൾ ക്ഷണിച്ചു.ഓൺലൈനായി അപേക്ഷിക്കാനുള്ള അവസാന തീയതി സെപ്റ്റംബർ 15. പുരുഷന്മാർക്ക് അൻപതും സ്ത്രീകൾക്ക് അഞ്ചും ഒഴിവുകളാണുള്ളത്.

ഇതിലേക്ക് അപേക്ഷിക്കാനുള്ള വിദ്യാഭ്യാസ യോഗ്യത 50% മാർക്കോടെ ബിരുദം/ തത്തുല്യം. എൻ സി സി സീനിയർ ഡിവിഷൻ/ വിങ്ങിൽ രണ്ട് അല്ലെങ്കിൽ മൂന്ന് വര്ഷം പ്രവർത്തിച്ചിരിക്കണം. എൻ സി സിയുടെ സി സർട്ടിഫിക്കറ്റ് പരീക്ഷയിൽ കുറഞ്ഞത് ബി ഗ്രേഡ് നേടിയിരിക്കണം. യുദ്ധത്തിൽ പരിക്കേറ്റവരുടെ/ കൊല്ലപ്പെട്ടവരുടെ/ കാണാതായവരുടെ ആശ്രിതർക്ക് സി സർട്ടിഫിക്കറ്റ് നിബന്ധന ബാധകമല്ല.

അപേക്ഷകർ അവിവാഹിതരായിരിക്കണം. ആദ്യ വർഷങ്ങളിൽ 50 % മാർക്ക് നേടിയ അവസാന വർഷ ബിരുദക്കാർക്കും അപേക്ഷിക്കാം. 2023 ഏപ്രിൽ ഒന്നിന് മുൻപ് ബിരുദം നേടിയതിന്റെ തെളിവ് ഹാജരാക്കണം.

കരസേനാ വെബ്സൈറ്റിൽ നൽകിയ നിർദിഷ്ട മാനദണ്ഡങ്ങളനുസരിച്ചു ശാരീരിക ക്ഷമതയുള്ളവരായിരിക്കണം.
എസ് എസ് ബി ഇന്റർവ്യൂവിന്റെയും ശാരീരിക ക്ഷമത പരിശോധനയുടെയും വൈദ്യ പരിശോധനയുടെയും അടിസ്ഥാനത്തിലാണ് തിരഞ്ഞെടുപ്പ് നടക്കുന്നത്. ഷോർട് ലിസ്റ്റ് ചെയ്യപെടുന്നവരെ എസ് എസ് ബി ഇന്റർവ്യൂവിന് ക്ഷണിക്കും. ബാംഗ്ലൂർ ഉൾപ്പെടെയുള്ള കേന്ദ്രങ്ങളിലാണ് ഇന്റർവ്യൂ.

തിരഞ്ഞെടുക്കപെടുന്നവർക്ക് ചെന്നൈ ഓഫീസേഴ്‌സ് ട്രെയിനിങ് അക്കാഡമിയിൽ 49 ആഴ്ച്ച പരിശീലനം. ഇത് വിജയകരമായി പൂർത്തിയാക്കുന്നവർക്ക് പോസ്റ്റ് ഗാജ്വേറ്റ്‌ ഡിപ്ലോമ ഇൻ ഡിഫെൻസ് മാനേജ്‌മന്റ് ആൻഡ് സ്ട്രാറ്റജിക്ക് സ്റ്റഡീസ് (മദ്രാസ് യൂണിവേഴ്സിറ്റി) യോഗ്യത ലഭിക്കും. ലെഫ്റ്റനന്റ് റാങ്കിലായിരിക്കും നിയമനം.

അപേക്ഷിക്കാനുള്ള പ്രായപരിധി 19 മുതൽ 25 വയസ്സുവരെയാണ്.കൂടുതൽ വിവരങ്ങൾ അറിയാൻ www.joinindianarmy.nic.in എന്ന വെബ്സൈറ്റ് സന്ദർശിക്കുക.