എന്താണ് ഗ്രീൻ വിസ...എങ്ങനെ അപേക്ഷിക്കാം...അറിയേണ്ടതെല്ലാം...ഇത് മുഴുവൻ വായിക്കു...
ജനപ്രീതി നേടിയ ഗോള്‍ഡന്‍ വിസയ്ക്കും അഞ്ച് വര്‍ഷ മള്‍ട്ടിപ്പിള്‍ എന്‍ട്രി ടൂറിസ്റ്റ് വിസയ്ക്കും ശേഷം അഞ്ച് വര്‍ഷത്തെ സാധുതയുള്ള ഗ്രീന്‍ വിസ അടുത്തിടെയാണ് യു എ ഇ പ്രഖ്യാപിച്ചത്. സെപ്റ്റംബര്‍ മുതല്‍ പ്രാബല്യത്തില്‍ വരുന്ന ഗ്രീന്‍ വിസ ഒരു റസിഡന്റ് വിസയാണ്. അത് വിസ ഉടമയെ അഞ്ച് വര്‍ഷത്തേക്ക് സ്വയം സ്‌പോണ്‍സര്‍ ചെയ്യാന്‍ അനുവദിക്കുന്നു. എന്തിനാണ് പുതിയ വിസ എന്ന് പരിശോധിക്കാം.
സ്‌പോണ്‍സറോ തൊഴിലുടമയോ ആവശ്യമില്ലാതെ അഞ്ചുവര്‍ഷം വരെ യു എ ഇയില്‍ ജോലി ചെയ്യാനും താമസിക്കാനും അനുമതി നല്‍കുന്നുവെന്നതാണ് ഗ്രീന്‍ വിസയുടെ ഏറ്റവും പ്രധാന ആകര്‍ഷണീയത. വിസ ലഭിക്കുന്നവര്‍ക്കു സ്വയം സ്‌പോണ്‍സര്‍ ചെയ്യാം.
യു എ ഇയിലെ മൊത്തം ജനസംഖ്യയുടെ 85 ശതമാനവും പ്രവാസികളാണ്. ഗ്രീന്‍ വിസ ഉണ്ടെങ്കിൽ പ്രവാസികള്‍ക്ക് യു എ ഇയില്‍ താമസിക്കാനും ജോലി ചെയ്യാനും എളുപ്പമാക്കും.
ഉയര്‍ന്ന ആസ്തിയുള്ള വ്യക്തികളെയും സംരഭകരെയും ഉന്നത വൈദഗ്ധ്യമുള്ള പ്രൊഫഷണലുകളെയും ആകര്‍ഷിക്കുന്നതിനായി യു എ ഇ നിരവധി വിസ, എന്‍ട്രി പരിഷ്‌ക്കാരങ്ങൾ കൊണ്ടുവന്നിട്ടുണ്ട് ..ഇതിന്റെ തുടര്‍ച്ചയാണു ഗ്രീന്‍ വിസ.
വിസ ഉടമകള്‍ക്കു 18 വയസ് വരെ പ്രായമുള്ള ആണ്‍കുട്ടികളെ സ്‌പോണ്‍സര്‍ ചെയ്യാം. അവിവാഹിതരായ പെണ്‍മക്കളെ സ്‌പോണ്‍സര്‍ ചെയ്യുന്നതിനു പ്രായപരിധിയില്ല. എല്ലാ സാഹചര്യത്തിലും കുടുംബത്തിന്റെ വിസയുടെ സാധുതയും കാലാവധിയും ഗ്രീന്‍വിസ ഉടമയുടെ വിസയുമായി സമന്വയിപ്പിക്കും. വിസ റദ്ദാക്കപ്പെടുകയോ കാലഹരണപ്പെടുകയോ ചെയ്തശേഷം ആറു മാസം വരെ യു എ ഇയില്‍ താമസിക്കാം.
ബാച്ചിലേഴ്‌സ് ബിരുദവും കുറഞ്ഞത് 15,000 ദിര്‍ഹം ശമ്പളവും സ്വന്തം പേരില്‍ ഒരു തൊഴില്‍ കരാറും ഉള്ള മാനവ വിഭവശേഷി, എമിറേറ്റൈസേഷന്‍ മന്ത്രാലയം നിര്‍ണ്ണയിക്കുന്ന ആദ്യത്തെ മൂന്ന് തൊഴില്‍ തലങ്ങളില്‍ വരുന്നവർ ഗ്രീൻ വിസയ്ക്ക് യോഗ്യരാണ്.
വിദഗ്‌ധ പ്രൊഫഷണലുകള്‍,ഫ്രീലാന്‍സര്‍മാരും സ്വയം തൊഴില്‍ ചെയ്യുന്നവരും,നിക്ഷേപകര്‍ അല്ലെങ്കില്‍ നിക്ഷേപത്തിൽ പങ്കാളികളായവർ എന്നിവർക്കെല്ലാം ഗ്രീൻ വിസയ്ക്ക് അപേക്ഷിക്കാം.
ഫ്രീലാന്‍സര്‍മാര്‍ക്കും സ്വയം തൊഴില്‍ ചെയ്യുന്നവര്‍ക്കും മാനനവ വിഭവശേഷി, എമിറേറ്റൈസേഷന്‍ മന്ത്രാലയം നല്‍കുന്ന സ്വയം തൊഴില്‍/ഫ്രീലാന്‍സ് പെര്‍മിറ്റ് ഉണ്ടായിരിക്കണം . കഴിഞ്ഞ രണ്ടു വര്‍ഷത്തെ വാര്‍ഷിക വരുമാനം 360,000 ദിര്‍ഹത്തില്‍ കുറയരുത്. അല്ലെങ്കില്‍ അപേക്ഷകര്‍ക്കു യു എ ഇ താമസക്കാലത്ത് സാമ്പത്തിക ഭദ്രത തെളിയിക്കാൻ കഴിഞ്ഞാലും മതി.
ജോലിയില്‍നിന്നു വിരമിച്ചശേഷം യു എ ഇയില്‍ ജീവിക്കാന്‍ ആഗ്രഹിക്കുന്നവര്‍ക്കും മാനദണ്ഡങ്ങള്‍ക്കു വിധേയമായി അഞ്ച് വര്‍ഷ ഗ്രീന്‍ വിസ അനുവദിക്കും.
https://www.facebook.com/Malayalivartha
