എസ്എസ്എല്‍സി പരീക്ഷയ്ക്ക് നാളെ തുടക്കമാകും. ഇക്കുറി സംസ്ഥാനത്ത് 4,41,103 വിദ്യാര്‍ഥികളാണ് പരീക്ഷ എഴുതുന്നത്. സംസ്ഥാനത്തിനകത്തും പുറത്തുമായി 2935 പരീക്ഷാകേന്ദ്രങ്ങളാണ് ഒരുക്കിയിട്ടുള്ളത്. ആകെ പരീക്ഷയ്ക്ക് ഇരിക്കുന്നതില്‍ 2,24,564 ആണ്‍കുട്ടികളും 2,16,539 പെണ്‍കുട്ടികളുമാണുള്ളത്. ഇതില്‍ 1160 സര്‍ക്കാര്‍ സ്‌കൂളുകളിലായി 1,44,999 പേരും 1433 എയ്ഡഡ് സ്‌കൂളുകളിലായി 2,64,980 പേരും പരീക്ഷ എഴുതുന്നു. 453 അണ്‍എയ്ഡഡ് സ്‌കൂളുകളില്‍ നിന്നായി 31,118 വിദ്യാര്‍ഥികളാണ് ഇക്കുറി പരീക്ഷയ്ക്കുള്ളത്.

ഗള്‍ഫിലെ ഒന്‍പത് പരീക്ഷാ കേന്ദ്രങ്ങളിലായി 550 പേരും ലക്ഷദ്വീപിലെ ഒന്‍പതു കേന്ദ്രങ്ങളിലായി 789 വിദ്യാര്‍ഥികളും പരീക്ഷ എഴുതും ഏറ്റവും കൂടുതല്‍ വിദ്യാര്‍ഥികള്‍ പരീക്ഷ എഴുതുന്ന ജില്ലയും വിദ്യാഭ്യാസജില്ലയും മലപ്പുറം ആണ് . മലപ്പുറം ജില്ലയില്‍നിന്ന് 79,741 വിജ്യാര്‍ഥികളും വിദ്യാഭ്യാസ ജില്ലയില്‍ നിന്ന് 26,986 പേരും പരീക്ഷ എഴുതും. 2,268 വിദ്യാര്‍ഥികള്‍ പരീക്ഷയ്ക്കിരിക്കുന്ന കുട്ടനാട് വിദ്യാഭ്യാസ ജില്ലയിലാണ് ഏറ്റവും കുറവ്.
മലപ്പുറം എടരിക്കോട് പികെഎംഎച്ച്എസിലാണ് ഏറ്റവും കൂടുതല്‍ വിദ്യാര്‍ഥികള്‍ പരീക്ഷ എഴുതുന്നത്. 2,422 കുട്ടികളാണ് ഇക്കുറി എടരിക്കോട് സ്‌കൂളില്‍ പരീക്ഷയ്ക്കുള്ളത്. രണ്ടു കുട്ടികള്‍ പരീക്ഷയ്ക്കിരിക്കുന്ന ബേപ്പൂര്‍ ജിആര്‍എഫ്ടിഎച്ച്എസ് ആണ് ഇക്കുറി ഏറ്റവും കുറവ് വിദ്യാര്‍ഥികള്‍ പരീക്ഷയ്ക്കിരിക്കുന്ന സെന്റര്‍. കഴിഞ്ഞ വര്‍ഷത്തേക്കാള്‍ 15000 വിദ്യാര്‍ഥികളുടെ കുറവാണ് ഇക്കുറി ഉള്ളത്. നാളെ ആരംഭിക്കുന്ന പരീക്ഷ 28 നാണ് പൂര്‍ത്തിയാകുന്നത്.